ტექნიკა ფეხბურთის სამსახურში"მანჩესტერ სიტიმ" "კარდიფთან" პირველი სახიფათო მომენტი მე-40 წამზე შექმნა: დავიდ სილვას გადაცემის შემდეგ ალვარო ნეგრედოს შეეძლო გატანა, თუმცა კევინ მაკნაუტონმა გარისკა და ბოსნიელს ფეხებში ჩაუვარდა.
ბრედლი ტერნერმა ბურთი იქაურობას ვერ გაარიდა. სილვას დამატებაზე შეეძლო თავის გამოჩენა, თუმცა მახვილი კუთხიდან კარს კარგად ვეღარ დაუმიზნა. მე-14 წუთზე ანგარიში მაინც გაიხსნა. გოლი რამდენიმე ფაქტორის გამო აღმოჩნდა მნიშვნელოვანი. უპირველესად იმიტომ, რომ ნილ სვორბრიკმა პრემიერლიგის ისტორიაში პირველად გამოიყენა გოლის ფიქსაციის სისტემა, რომელმაც დაადასტურა, რომ ბურთმა ხაზი გადაკვეთა. და რაც არანაკლებ მნიშვნელოვანია: სეზონის
ამავე რაოდენობის თამაშებში საუკეთესო შედეგი აქამდე 91 გოლი იყო. "სიტი" ერთ გოლს რომ არ დასჯერდებოდა, ამის გამოცნობა იოლი იყო. მასპინძლებმა სამჯერ კიდევ აიღეს დევიდ მარშალის კარი და თანაც, სამჯერვე კონტრშეტევაზე. თვეზე მეტი პაუზის შემდეგ ჩემპიონატში დაბრუნებულმა სერხიო აგუერომ ჯერ იაია ტურეს გაუკეთა პასი, შემდეგ კი უელსელთა დაცვის ბურჯი სტივენ კოლკერი გააპამპულა და ისე შეაგდო. "კარდიფის" მხრიდან ერთადერთი, ვინც რეალურად ცდილობდა სიტუაციის გამწვავებას, კრეიგ ნუნი იყო. 26 წლის გარემარბი მთელი თამაშის განმავლობაში აქტიურობდა და ალალად დაიმსახურა კონტრშეტევაზე გატანილი ლამაზი ბურთი. შეხვედრას წერტილი კუთხურის გათამაშების შემდეგ ფრეიზერ კემპბელმა დაუსვა.
იხილეთ ვიდეო
ისევ მეორე ტაიმის იმედად
ტრადიცია გვაუწყებს, რომ "არსენალს" მიმდინარე სეზონში გოლების უმეტესობა მეორე ტაიმში გააქვს. წესი არც ამჯერად დარღვეულა. "მეთოფეებმა" შეხვედრის ბედი მეორე 45 წუთში გადაწყვიტეს, არადა, ანგარიშის გახსნა დებიუტშივე შეეძლოთ (მე-4 წუთზე), როცა "პასების მეფედ" წოდებულმა მესუთ იოზილმა ზუსტად ის გააკეთა, რასაც მისგან ყველაზე ნაკლებად ველოდით: უხერხულ პოზიციაში მყოფმა პირდაპირ კარში დაარტყა, უკეთეს ვითარებაში მყოფი ოლივიე ჟირუ კი მშრალზე დატოვა.
სტუმრებს პირველ ტაიმში ასე თუ ისე გამოსდიოდათ კონტრშეტევაზე თამაში. მომენტები ჰქონდათ სტივ სიდუელს, აშკან დეჟაგასა და ალექსანდრ კაჩანიკლიჩს. თავის მხრივ, შორეული დარტყმებით ბევრს ცდილობდა სერჟ გნაბრი. 18 წლის გერმანელი თვალსა და ხელშუა ყალიბდება მაღალი დონის ფეხბურთელად და მალე ალბათ ძირითადისთვის ბრძოლაში სრულფასოვნად ჩაებმება.
მეორე ნახევარში "არსენალმა" დაცვაში ყველა ხვრელი გადაკეტა და მეტოქე საკუთარ ნახევარზე გამოკეტა. ფავორიტმა კუთვნილი სამი ქულა მაინც მიიღო. დიდწილად, ეს სანტი კასორლას წყალობით მოახერხა. 29 წლის ესპანელმა, ვინც მიმდინარე სეზონში რატომღაც სხვების ჩრდილში აღმოჩნდა, დუბლი შეასრულა. ანგარიშის გაზრდის საუკეთესო შანსი შეცვლაზე შესულ ლუკას პოდოლსკის ჰქონდა, მაგრამ მაარტენ სტეკელენბურგმა გერმანელს წარმოუდგენელი ძალის დარტყმა აუღო.
იხილეთ ვიდეო
ტყუილი პენალტი
"ეტიჰადის" მატჩისგან განსხვავებით, "ენფილდზე" მომუშავე ჯონათან მოსს არ ჰქონია შანსი, რომ თანამედროვე ტექნოლოგიებისთვის მიემართა დასახმარებლად, თორემ 43 წლის სანდერლენდელი ლუის სუარესის ეფექტური ვარდნის შემდეგ პენალტს ნამდვილად არ დანიშნავდა.
სამწუხაროდ, ფეხბურთის მმართველ ორგანიზაციებს მიაჩნიათ, რომ მსაჯის შეცდომა ფეხბურთის ერთგვარი დანამატია, რომელიც სპორტის ამ სახეობას გარკვეულ ხიბლს მატებს. აი, ასეთ საეჭვოდ "მომხიბვლელ შეცდომებს" ეწირება ფეხბურთში სამართლიანობის განცდა.
ბირმინგემელებმა იანვარში ორჯერ ითამაშეს საკუთარ არენაზე და ორჯერვე დამარცხდნენ. პოლ ლამბერტის გუნდი სტუმრად უკეთ რომ თამაშობს, დიდი ხანია ცნობილია, მაგრამ "ენფილდზე" ნაჩვენები თამაშის ხარისხი, განსაკუთრებით, პირველი ტაიმის, ნაკლებად ჰგავდა ცხრილის შუაში გაჭედილი გუნდისას. სტუმრებს სიმონ მინიოლეს კარის აღება 4-5-ჯერ შეეძლოთ. ანდრეა ვაიმანის გოლი კლასიკურ კონტრშეტევას მოჰყვა. ავსტრიელმა თამაშგარეს ზღვარზე ითამაშა, თუმცა მარტინ შკრტელი ჩარჩა და წესი არ დარღვეულა. მეორე გოლი კი კრისტიან ბენტეკემ შეაგდო, რაშიც მეკარის უხეში შეცდომა დაეხმარა.
"წითლებმა" ერთი ბურთი პირველ ტაიმშივე გაქვითეს: კარისკენ ზურგით მდგარმა ჯორდან ჰენდერსონმა დენიელ სტარიჯი ქუსლით გაკეთებული პასით ბრედ გუზანთან პირისპირ დატოვა. თავდამსხმელს საქმის ბოლომდე მიყვანა აღარ გასჭირვებია. სუარესს 2:2-ის შემდეგ რამდენჯერმე შეეძლო გამარჯვების ბურთის გატანა. მაგალითად ურუგვაელის შორეული საჯარიმოც კმარა, რომელიც გუზანის კარს სულ მცირედით ასცდა.
იხილეთ ვიდეო
ფრანგული სერია გრძელდება
"აპტონ პარკზე" ოთხი გოლი გავიდა და ერთი ამდენი კიდევ უნდა გასულიყო. უცნაური იყო, რომ ამ მხრივ ყველაზე მეტად სწორედ გოლის ავტორები სცოდავდნენ. ლოიკ რემიმ მარტივ სიტუაციაში კი გაიტანა, თუმცა უფრო მარტივში ვერას გახდა. ასევე მოიქცა კარლტონ კოული, ვინც 1:2-ზე სიტუაციას ბოლომდე არ გამოეთიშა და მაიკ უილიამსონს საკუთარი კარი დაალაშქრინა. მოგვიანებით ყველასგან მიტოვებულმა კოულმა ხუთი მეტრიდან ერთი შეხებით დარტყმა გადაწყვიტა და ტექნიკამ უმტყუნა.
არადა, თავდამსხმელს დამუშავებასა და დამიზნებას არც არავინ უშლიდა. ერთხელ იოან კაბაიმაც ვერ გაისწორა სამიზნე, თუმცა რთული სიტუაციიდან, ორჯერ კი 28 წლის ფრანგი იდეალურად გაისარჯა. დამატებულ დროში გატანილი საჯარიმო "კაჭკაჭების" ფრანგული ლეგიონისთვის მიმდინარე სეზონში 29-ე აღმოჩნდა პრემიერლიგაში. სულ კი "ნიუკასლს" 32 გოლი აქვს ანგარიშზე.
მიწას გაკრული ჩემპიონი
შეიძლება ყურს უცხოდ ხვდება, თუმცა "ჩელსი" "მანჩესტერ იუნაიტედთან" მატჩის წინ აშკარა ფავორიტად განიხილებოდა. ჟოზე მოურინიოს გუნდმა სტატუსი გაამართლა და ჯერ კიდევ მოქმედი ჩემპიონი მიწას გააკრა.
"განსაკუთრებულმა კაცმა" უპრინციპულეს მეტოქესთან რეკორდული მეასე მოგება იზეიმა პრემიერლიგაში. პორტუგალიელს ამისთვის მხოლოდ 142 თამაში დასჭირდა. აღსანიშნავია, რომ ალექს ფერგიუსონმა ამ ბარიერს 162 მატჩის შემდეგ უწია, ვენგერმა 179-ის, რაფა ბენიტესმა - 181-ის, წუხანდელმა მეტოქე დევიდ მოიესმა კი სულაც - 248-ის. მოუ მეთხუთმეტე მწვრთნელია, ვინც 100 მოგება ჩაიწერა აქტივში.
"ასიანთა კლუბი", ბუნებრივია, ლეგენდარულმა შოტლანდიელმა გახსნა. მეორე იქ ვენგერი შევიდა, მესამე - ჰარი რედნაპი. რაკი სტატისტიკაზე ამდენი ვილაპარაკეთ, ბარემ იმასაც გეტყვით, რომ მოიესს ჯერ კიდევ "ევერტონში" მუშაობისას ტრადიციული "დიდი ოთხეულის" ("მანჩესტერ იუნაიტედი", "ჩელსი", "ლივერპული", "არსენალი") წარმომადგენლებთან სტუმრად თამაში ძალიან უჭირდა. ტრადიცია გრძელდება "ეშმაკების" თავკაცის პოსტზეც. 48-ე შეხვედრაში მოიესს 18 ფრე და 30-ე წაგება დაუგროვდა.
იხილეთ ვიდეო
პრემიერლიგა. XXII ტური
სანდერლენდი-საუთჰემპტონი 2:2
გოლები: 0:1 როდრიგესი (4), 0:2 ლოვრენი (31), 1:2 ბორინი (32), 2:2 ე. ჯონსონი (71)
სანდერლენდი (4-1-4-1): მანონე - ბერდსლი, ოში, ბრაუნი, ალონსო - კატერმოული (61. გარდნერი) - ჯონსონი, ლარსონი (62. კოლბეკი), კი, ბორინი - ალტიდორი (71. ს. ფლეტჩერი)
საუთჰემპტონი (4-4-2): ბორუცი - ჩემბერსი, ფონტე, ლოვრენი (88. იოშიდა), შოუ - დევისი, კორკი, შნაიდერლინი, ლალანა (73. რამირესი - 87. ვორდ-პრაუსი) - ლამბერტი, როდრიგესი
გაფრთხილება: კატერმოული, კი -
კარში დარტყმა: 10-17 (5-8) კუთხური: 4-7 თამაშგარე: 5-1 ჯარიმა: 8-8 ბურთის ფლობა: 36%-64%
მაყურებელი: 38 115
არსენალი-ფულჰემი 2:0
გოლები: 1:0 კასორლა (57), 2:0 კასორლა (62)
არსენალი (4-2-3-1): შჩესნი - სანია, მერტეზაკერი, კოშელნი, მონრეალი - ფლამინი, უილშირი - გნაბრი (71. პოდოლსკი), იოზილი (86. ოქსლეიდ-ჩემბერლენი), კასორლა - ჟირუ
ფულჰემი (4-4-1-1): სტეკელენბურგი - რიტერი, ბარნი, ჰანგელანდი, რიჩარდსონი - სიდუელი, პარკერი, დეჟაგა (68. ბენტი), კაჩანიკლიჩი (86. კასამი) - დემპსი - ბერბატოვი
გაფრთხილება: არ ყოფილა
კარში დარტყმა: 22-8 (8-2) კუთხური: 4-4 თამაშგარე: 1-1 ჯარიმა: 5-7 ბურთის ფლობა: 59%-41%
მაყურებელი: 60 000
პალასი-სტოკი 1:0
გოლი: 1:0 პანჩეონი (51)
პალასი (4-4-1-1): სპერონი - მარიაპა, გებიდონი, დელეინი, პარი - ჟედინაკი, ვორდი, პანჩეონი, ბოლასი (86. უილბრეჰემი) - გედიურა (68. ოკიფი) - შამახი (86. მოქსი)
სტოკი (4-2-3-1): ბატლენდი - კემერონი, შოუკროსი, უილსონი, პიტერსი - უელანი (58. აირლანდი), ნზონზი - უოლტერსი (79. გუიდეტი), ადამი, ასაიდი (72. არნაუტოვიჩი) - კრაუჩი
გაფრთხილება: - ნზონზი, არნაუტოვიჩი
კარში დარტყმა: 12-17 (6-2) კუთხური: 4-3 თამაშგარე: 2-2 ჯარიმა: 9-13 ბურთის ფლობა: 43%-57%
მაყურებელი: 24 440
სიტი-კარდიფი 4:2
გოლები: 1:0 ჯეკო (14), 1:1 ნუნი (29), 2:1 ნავასი (33), 3:1 ი. ტურე (76), 4:1 აგუერო (79), 4:2 ფ. კემპბელი (90+3)
სიტი (4-4-2): ჰარტი - საბალეტა, კომპანი, დემიკელისი, კოლაროვი - ი. ტურე, ხ. გარსია, ნავასი (83. კლიში), დ. სილვა (80. მილნერი) - ნეგრედო (64. აგუერო), ჯეკო
კარდიფი (4-4-1-1): მარშალი - ტეოფილ-კეტრინი, კოლკერი, ტერნერი, მაკნაუტონი (68. ჯონი) - მედელი, გუნარსონი (78. ეიკრემი), ნუნი, უიტინგემი (69. ბელამი) - მატჩი - კემპბელი
გაფრთხილება: ნეგრედო, კოლაროვი -
კარში დარტყმა: 24-7 (9-6) კუთხური: 10-7 თამაშგარე: 3-3 ჯარიმა: 6-5 ბურთის ფლობა: 62%-38%
მაყურებელი: 47 213
ნორვიჩი-ჰალი 1:0
გოლი: 1:0 რ. ბენეტი (87)
ნორვიჩი (4-2-3-1): რადი - რ. მარტინი, რ. ბენეტი, ბასონგი, ოლსონი - სნოდგრასი, ფერი, ჯონსონი, ხონასი (68. პილკინგტონი) - ვან ვოლფსვინკელი (80. ბეკიო), ჰუპერი
ჰალი (3-1-4-2): მაკგრეგორი - ჩესტერი (14. ფიგეროა), ბრუსი, დევისი - ჰადლსტოუნი - ელ-მუჰამადი, ლივერმორი, კორენი (82. ფრაიატი), როსენიორი - საგბო (67. ბოიდი), იელავიჩი
გაფრთხილება: ჯონსონი - ჰადლსტოუნი, როსენიორი, ფიგეროა
გაძევება: - ჰადლსტოუნი (89)
კარში დარტყმა: 25-10 (4-0) კუთხური: 10-8 თამაშგარე: 1-1 ჯარიმა: 8-16 ბურთის ფლობა: 56%-44%
მაყურებელი: 26 655
ვესტ ჰემი-ნიუკასლი 1:3
გოლები: 0:1 კაბაი (16), 0:2 რემი (33), 1:2 უილიამსონი (45+2-ს.კ-ში), 1:3 კაბაი (90+5)
ვესტ ჰემი (4-2-3-1): ადრიანი - ტეილორი, ჯონსონი, კოლინზი, რაცი - ნოუბლი, დიამე (62. კეროლი) - კოლისონი (46. მორისონი), დაუნინგი, ჯარვისი (73. ჟ კოული) - კ. კოული
ნიუკასლი (4-2-3-1): კრული - იანგა-მბივა, უილიამსონი, ს. ტეილორი, სანტონი (74. დამეტი) - ტიოტე, ანიტა (60. შ. ამეობი) - სისოკო, კაბაი, გუფრანი - რემი (78. ბენ არფა)
გაფრთხილება: არ ყოფილა
კარში დარტყმა: 11-19 (2-9) კუთხური: 4-3 თამაშგარე: 4-3 ჯარიმა: 9-6 ბურთის ფლობა: 48%-52%
მაყურებელი: 33 343
ლივერპული-ასტონ ვილა 2:2
გოლები: 0:1 ვაიმანი (25), 0:2 ბენტეკე (36), 1:2 სტარიჯი (45+2), 2:2 ჯერარდი (53-პენ)
ლივერპული (4-4-2): მინიოლე - ჯონსონი, კ. ტურე, შტრტელი, სისოხო - ჰენდერსონი, სტერლინგი, ჯერარდი, კოუტინიო (46. ლეივა - 66. ალენი) - სტარიჯი, სუარესი
ასტონ ვილა (4-3-3): გუზანი - ბაკუნა, ვესტვუდი, ვლაარი, ბერტრანი (82. ლუნა) - კლარკი, ელ აჰმადი (62. სილა), დელფი - ვაიმანი, აგბონლაჰორი (49. ჰოლტი), ბენტეკე
გაფრთხილება: სტერლინგი - კლარკი, ელ აჰმადი, ბერტრანი, ბაკუნა
კარში დარტყმა: 14-12 (6-3) კუთხური: 2-3 თამაშგარე: 3-1 ჯარიმა: 14-18 ბურთის ფლობა: 56%-44%
მაყურებელი: 44 737
სუონსი-ტოტენჰემი 1:3
გოლები: 0:1 ადებაიორი (35), 0:2 ჩიკო (53-ს.კ-ში), 0:3 ადებაიორი (71), 1:3 ბონი (78)
სუონსი (4-3-2-1): ტრემელი - რანხელი, ჩიკო, უილიამსი, დევისი - ამატი, შელვი (51. ლამა), ბრიტონი - რუტლეჯი, პოსუელო - ბონი
ტოტენჰემი (4-2-3-1): ლორისი - უოლკერი, დოუსონი, კირიკეში, როუზი - დემბელე, ბენტალები - ლენონი (79. ნაუტონი), ერიქსენი, შადლი (67. სიგურდსონი) - ადებაიორი
გაფრთხილება: ამატი, ბონი - როუზი
კარში დარტყმა: 13-11 (3-5) კუთხური: 8-4 თამაშგარე: 2-2 ჯარიმა: 6-11 ბურთის ფლობა: 56%-44%
მაყურებელი: 20 769
ჩელსი-იუნაიტედი 3:1
გოლები: 1:0 ეტოო (17), 2:0 ეტოო (45), 3:0 ეტოო (49), 3:1 ერნანდესი (78)
ჩელსი (4-2-3-1): ჩეხი - ასპილიკუეტა, ტერი, კეჰილი, ივანოვიჩი - ლუისი, რამირესი - აზარი, ოსკარი (68. მიკელი), ვილიანი (86. მატიჩი) - ეტოო (79. ტორესი)
იუნაიტედი (4-4-1-1): დე ხეა - რაფაელი, ვიდიჩი, ევანსი, ევრა (52. სმოლინგი) - ჯონსი, კერიკი, ვალენსია, იანგი (66. ერნანდესი) - იანუზაი - უელბეკი
გაფრთხილება: ლუისი - იანგი, ვალენსია, რაფაელი
გაძევება: - ვიდიჩი (90+1)
კარში დარტყმა: 13-10 (6-4) კუთხური: 5-4 თამაშგარე: 2-2 ჯარიმა: 15-21 ბურთის ფლობა: 44%-56%
მაყურებელი: 41 615
20 იანვარი
ბრომვიჩი-ევერტონი 00:00
ბომბარდირები: 22 - ლუის სუარესი (ლივერპული), 14 - სერხიო აგუერო (მანჩესტერ სიტი), 11 - ლოიკ რემი (ნიუკასლი), იაია ტურე (მანჩესტერ სიტი), დენიელ სტარიჯი (ლივერპული)
მომდევნო ტური
28 იანვარი:
მანჩესტერ იუნაიტედი-კარდიფი, ნორვიჩი-ნიუკასლი, საუთჰემპტონი-არსენალი, სუონსი-ფულჰემი, კრისტალ პალასი-ჰალი, ლივერპული-ევერტონი
29 იანვარი:
ასტონ ვილა-ვესტ ბრომვიჩი, ჩელსი-ვესტ ჰემი, სანდერლენდი-სტოკი, ტოტენჰემი-მანჩესტერ სიტი
ყოველდღიური სპორტული გაზეთი "ლელო"
