გუნდი-სიურპრიზი: მოგზაური რაიან ბერტრანი ცხოვრებას ნათელ ფერებში უყურებს

შეუძლებელია, ფეხბურთის გულშემატკივარი მიმდინარე სეზონში "საუთჰემპტონის" თამაშით არ აღფრთოვანდეს. "წმინდანების" რიგები ამ ზაფხულს ლამის დაიცალა. მათგან ყველა ჩავარდნას ელოდა, მაგრამ პირიქით კი მოხდა.

საინტერესოა "შიდა სამზარეულოდან" დეტალების გაგება, რაშიც ჩვენ რაიან ბერტრანი დაგვეხმარება - ფეხბურთელი, რომელიც შესაძლოა, ბევრისთვის შეუმჩნევლად, მაგრამ ამ ფორმაციის "საუთჰემპტონის" ერთ-ერთ ლიდერად იქცა

რაიან დომინიკ ბერტრანი სულ მოძრაობაშია, როგორც პირდაპირი, ასევე გადატანითი მნიშვნელობით. მარცხენა მცველი მუდამ წინ და უკან დარბის და კარიერის მხრივაც, თითქმის ყველა სეზონს სხვადასხვა გუნდში ატარებს.

ბერტრანი "ჯილინგემმა" აღზარდა, ხოლო 2005 წელს იგი "ჩელსიმ" შენიშნა და თავისთან წაიყვანა. თუმცა ლონდონელთა რიგებში ამ წლების განმავლობაში მას მხოლოდ 28 პრემიერლიგური მატჩი აქვს ჩატარებული. იგი ამჟამად "საუთჰემპტონშია" განათხოვრებული, იქამდე კი "ბორნმუთში", "ოლდემში", "ნორვიჩში", "რედინგში", "ნოტინგემსა" და "ასტონ ვილაში" გახლდათ.

მიმდინარე ჩემპიონატში ბერტრანი ისე კარგად თამაშობს, როგორც ჩანს, განვითარების შემდეგ საფეხურზე აინაცვლა. შესაძლოა, ყველას კარგად დავარცხნილი გრაციანო პელეს გოლები, დუშან ტადიჩის პასები, შეინ ლონგის შრომა, სადიო მანეს მოუსვენრობა, ვიქტორ ვანიამას უხეში ქარიზმა, მორგან შნედერლენის საიმედოობა უფრო ხვდება თვალში და რონალდ კუმანის "წმინდანების" საუცხოო თამაშს ამას "ვაბრალებთ", მაგრამ სინამდვილეში ბერტრანის წვლილი ამ ყველაფერში საკმაოდ დიდია.

რაიანი ფლანგიდან ბრწყინვალედ ერთვება შეტევებში, სახიფათო პასებს არიგებს, უშუალო მოვალეობასაც კარგად ასრულებს და გოლის გატანაც კი შეძლო. "საუთჰემპტონი" ბერტრანის მე-7 დროებითი გუნდია, "სენტ მერიზე" იგი უმაღლეს დონეზე სისტემატური სათამაშო პრაქტიკისთვის გადავიდა - მიზანი მიღწეულია.

"ქვეყნის გარშემო მოგზაურობა ჩემთვის პრობლემას არ წარმოადგენს. ბევრი ადგილი ვნახე, გამოცდილება დავაგროვე. სიმართლე ითქვას, არ მესმის, ჩემი პროფესიის ზოგი წარმომადგენელი რატომ წუწუნებს ხოლმე, მოგზაურობა და მუდამ სხვადასხვა ადგილას ყოფნა ძალიან სასიამოვნო და საინტერესოა. უშუალოდ "საუთჰემპტონში" კი თავს ისე ვგრძნობ, როგორც სახლში. ფანტასტიკური კლუბია, კარგი ხელმძღვანელობითა და ფეხბურთელებით. მოვიხიბლე მთლიანად ქალაქით და ფანებითაც, რომლებიც ძალიან კეთილგანწყობილნი არიან" - თქვა ბერტრანმა.

"საუთჰემპტონი" 11 ტურის მერე დამაჯერებლად არის მეორე ადგილზე. ეს, მიუხედავად იმისა, რომ წავიდა მწვრთნელი მაურისიო პოჩეტინო, კლუბი დატოვეს შემდეგმა ფეხბურთელებმა - ლუკ შოუმ, ადამ ლალანამ, რიკი ლამბერტმა და დეიან ლოვრენმა, ხოლო ლიდერი ჯეი როდრიგესი ტრავმირებულია. ბერტრანს ეს წარმატება თურმე, სულაც არ აკვირვებს:

"ფანტასტიკურად დავიწყეთ და ბევრის გაოცება გამოვიწვიეთ, მაგრამ ვერ ვიტყვი, რომ ჩემთვის ეს დიდი სიურპრიზია. პირველსავე დღეს შევამჩნიე, რა მაღალი დონის ფეხბურთელებით იყო გუნდი დაკომპლექტებული და თავიდანვე მჯეროდა, რომ კარგი შედეგების ჩვენება შეგვეძლო. როგორც ხედავთ, წასული ფეხბურთელების ნოსტალგია არ გვაწუხებს" - ამბობს ბერტრანი.

კევინ ბონდი, ჯონ შერიდანი, გლედ რიოდერი, ბრაიან განი, ბრენდან როჯერსი, ბრაიან მაკდერმოტი, ბილი დევისი, კარლო ანჩელოტი, ანდრე ვილაშ-ბოაში, რობერტო დი მატეო, რაფაელ ბენიტესი, ჟოზე მოურინიო, პოლ ლამბერტი - ეს იმ მწვრთნელების ჩამონათვალია, რომლებთანაც ბერტრანს აქამდე უმუშავია. რონალდ კუმანი კი მე-14 სპეციალისტია, რომლის შეგირდადაც იგი გვევლინება და ჯერჯერობით თავკაცით კმაყოფილია, ისევე, როგორც ჰოლანდიელი თავისი ფეხბურთელით.

"იგი საკმაოდ მშვიდია, მაგრამ ეს ხელს არ უშლის ჩვენს მოტივირებაში. კუმანზე ყველაზე უკეთ მისი სათამაშო და სამწვრთნელო კარიერა მეტყველებს. მართლაც შემართულია და მოკრძალებული, კარგი და სასიამოვნო ადამიანია" - თქვა ბერტრანმა.

რაიანი შეტევებში აქტიურად ერთვება, მაგრამ გოლები იშვიათად გააქვს. მან იხუმრა კიდეც, კუმანმა იქნებ სხვადასხვა ხრიკი მასწავლოს, როგორ უნდა გავიტანო უფრო მეტი და ისეთივე წარმატებული გავხდე წინა ხაზზე, როგორიც თავად იყოო:

"სანამ გადმოვიდოდი, კარგი გასაუბრება გვქონდა. კუმანი მელაპარაკა მის სათამაშო სტილზე და ჩვენი ხედვები დაემთხვა. ის რეალურ შანსს მაძლევს, რომ საკუთარი შესაძლებლობები მაქსიმალურად გამოვავლინო. მწვრთნელს მოსწონს, როდესაც ფლანგის მცველები შეტევებში აქტიურად მონაწილეობენ და სახიფათო გადაცემებს აკეთებენ. დაცვაშიც დაუღალავად ვშრომობთ, რაზეც ის მეტყველებს, რომ ცოტა გოლი გვაქვს გაშვებული." - განმარტა ბერტრანმა.

გრაციანო პელე და დუშან ტადიჩი შესაძლოა, არც ისე ცნობილები იყვნენ, მაგრამ ახლა თითქმის ყველა მათზე ლაპარაკობს. იტალიელის აქტივში 11 ტურის მერე 6 გოლი და 2 საგოლე პასია, ხოლო სერბმა 6 საგოლე გადაცემა გააკეთა და ერთიც თავად გაიტანა.

"ისინი ძალიან კარგები არიან და ბრწყინვალედ თამაშობენ. შესაძლოა, ზოგი მათ თვალყურს არ ადევნებდა, მაგრამ ჰოლანდიაში ფანტასტიკური სტატისტიკა ჰქონდათ. შესაძლოა, პრემიერლიგაში უფრო უკეთაც გამოიყურებიან. მათ კიდევ უფრო შთამბეჭდავად ათამაშებას ველოდები." - ამბობს ბერტრანი.

პელე, რომელმაც "საუთჰემპტონში" კარგი თამაშის წყალობით უკვე ნაკრებში მიწვევაც დაიმსახურა და "სკუადრა აძურას" მაისურით გოლის გაიტანაც მოასწრო, ყოველთვის კარგი ვარცხნილობით და ბრიოლინით შელამაზებულ-დაყენებული თმით გამოირჩევა; გრაციანო გრაციოზულია, მაგრამ ბერტრანის თქმით, გრაციანო აბსოლუტურად ჩვეულებრივი ბიჭია, არც ქედმაღალია და არც "მარიაჟი" და ვიზუალურ მხარეს იმდენ დროს სულაც არ უთმობს, როგორც ბევრს ჰგონიაო.

სხვათა შორის, ბერტრანს ჩემპიონთა ლიგაზე დებიუტი 2012 წელს ჰქონდა - ფინალში, სადაც მისმა "ჩელსიმ" პენალტების სერიაში "ბაიერნს" მოუგო, რაიანმა მინდორზე შეაბიჯა და ყველაზე პრესტიჟული საკლუბო ტურნირის თასიც აღმართა. ამ შეჯიბრებაზე "წმინდანების" მოხვედრა მას სავსებით რეალურად მიაჩნია.

"ბოლო მომენტში გავიგე, რომ ძირითად შემადგენლობაში ვიქნებოდი და ფინალში თამაში მომიწევდა. სიმართლე ითქვას, არ ვნერვიულობდი. ჩემი ერთ-ერთი პირველი მწვრთნელი ბილ დევისი, რომელიც "ნოტინგემში" ყოფნისას მავარჯიშებდა, სულ გვიყვიროდა - ითამაშეთ, იფიქრეთ თამაშზე და არა მიზეზსა და შანსზე - თავში ეს სიტყვები მიტრიალებდა და მობილიზებული ვიყავი. მატჩთან დაკავშირებით ყველაფერი დეტალურად მახსოვს, მაგრამ ჩანაწერი მას მერე არ მინახავს, ზუსტად არ ვიცი, რატომ. ალბათ, მაშინ ვნახავ, როდესაც კარიერას დავასრულებ.

ამ მიღწევას პატივს ვცემ და მახარებს, მაგრამ არ მინდა, მხოლოდ ამის გარეშე ვიტრიალო, რადგან წინ კიდევ არაერთი სეზონი და ბევრი ტურნირია. ჩვენ ყველა შეჯიბრებაზე წარმატებას ვგეგმავთ და ვუმიზნებთ. იგივე ჩემპიონთა ლიგის საგზურის მოპოვება სავსებით რეალურად მიმაჩნია და უნდა დავამტკიცოთ, რომ ასეა" - თქვა ბერტრანმა.

"საუთჰემპტონისადმი" სკეპტიკურად განწყობილი ადამიანები დიდი ინტერესით ელიან უახლოეს ორთვიან მონაკვეთს. საქმე იმაშია, რომ პრემიერლიგის უახლოეს 10 მატჩში "სენტ მერის" ბინადრები შეხვდებიან "ევერტონს", "ჩელსის", "მანჩესტერ სიტის" და ორ-ორჯერ "არსენალსა" და "მანჩესტერ იუნაიტედს", ანუ უახლოესი 10 ტურიდან 7-ში "წმინდანებს" ძალიან რთული ბრძოლები ელით.

რაიან ბერტრანი კი თავდაჯერებას არც ამ რთული თამაშების წინ კარგავს: "რა თქმა უნდა, ვიაზრებთ, რომ სეზონი ძალიან გრძელია და ყველაფერი ასე მარტივად არ იქნება. ამიტომაც ვმუშაობთ ბევრს. შეხედეთ გუნდებს, თითქმის ყველა კარგავს ქულებს, ჩვენ კი კარგ ფორმაში ვართ და უნდა ვცადოთ, რომ ასევე გავაგრძელოთ და მოგება არ შევწყვიტოთ ".

დოსიე
რაიან დომინიკ ბერტრანი
დაიბადა: 1989 წ. ლონდონი (ბრიტ)
ამპლუა: მარცხენა მცველი
კარიერა: 2006-დან "ჩელსი". იჯარით - ბორნმუთი, ოლდჰემი, ნორვიჩი, რედინგი, ნოტინგემი, ასტონ ვილა, საუთჰემტონი
ინგლისის ნაკრები: 2 თამაში

ყოველდღიური სპორტული გაზეთი "ლელო"