პელეგრინის ტრიუმფი და მოურინიოს ვნებანი - "სიტი"-"ჩელსის" გამოხმაურება

პრემიერლიგის მეორე ტურში სეზონის პირველი სუპერმატჩი შედგა - ვიცე-ჩემპიონმა "სიტიმ" მოქმედი ჩემპიონი "ჩელსი" ჩაყლაპა.


"ქალაქელებმა" მეტოქეს ძალიან აჯობეს და უკვე 5-ქულიანი უპირატესობა აქვთ მასთან. "ჩელსი" კი ძალიან მძიმედ გამოიყურება. "ლურჯებმა" მეტოქეს პირველად ზუსტად 70-ე წუთზე დაურტყეს და 1998-99 წლების სეზონის შემდეგ პირველადაა, რომ დედაქალაქელები საწყისი ორი ტურის შემდეგ მოუგებლები არიან.

ჟოზე მოურინიო გრანდებთან და უშუალო კონკურენტებთან იშვიათად აგებს და ეს 0:3 ძალიან მწარე მარცხია. მიუხედავად ამისა, მან მატჩის შემდეგ ჩვეულებრივად ჩამოართვა ხელი მანუელ პელეგრინის, წარსულში გაცვლილი რამდენიმე მწარე კომენტარისა და "სიტყვების ომის" მიუხედავად, რომელშიც ჩილელი პორტუგალიელს ბოლომდე არ აჰყვა, მაგრამ ერთი-ორჯერ მაინც შეეპასუხა.

პელეგრინი აბსოლუტურად საფუძვლიანად იყო აღფრთოვანებული თავისი ბიჭების თამაშით და ხოტბას ასხამდა მათ. ხოლო მოურინიო შეშფოთებულ-დაბნეული გახლდათ და ცოტათი არაადეკვატურ-სუბიექტური კომენტარებიც გააკეთა.

მისი გუნდი არა მხოლოდ იშვიათად აგებს, არამედ უშუალოდ მანჩესტერული გუნდებისგან არ უშვებს ბევრ გოლს. მაგალითად, სამი ბურთი პირველად მიიღო. სტუმრად მანჩესტერულ კლუბებთან მოურინიოს "ჩელსის" ერთზე მეტიც კი არ გაეშვა.

მანუელ პელეგრინი: "ჩელსის" მსგავსი ძლიერი გუნდის წინააღმდეგ თამაში ყოველთვის ძალიან ძნელია. ლონდონელები ბევრი ფეხბურთელით იცავენ თავს და კონტრიერიშებისას უაღრესად სახიფათონი არიან. მათ კონტრშეტევის ორგანიზება ძალიან სწრაფად შეუძლიათ. თუმცა ჩვენ, ფაქტობრივად, სრულყოფილად ვითამაშეთ. არა მხოლოდ იმიტომ, რომ სამი გოლი გავიტანეთ. გაიხსენეთ პირველი ტაიმი, როდესაც კიდევ ერთი ამდენის გატანა შეგვეძლო. მხოლოდ ასმირ ბეგოვიჩის შესანიშნავი თამაშია იმის მიზეზი, რომ მეტი ვერ გავიტანეთ.

ფაქტობრივად, შეუძლებელია დომინირებდე "ჩელსის" წინააღმდეგ, მაგრამ ჩვენ ეს შევძელით და მეტოქეს მხოლოდ ერთი საგოლე შანსი მივეცით. ვთამაშობდით იმ სტილში, რომელიც მიყვარს და მომწონს. ყოველთვის მინდა, რაც შეიძლება მეტი გოლი გავიტანოთ. ძალიან კარგად ვითამაშეთ".

ჟოზე მოურინიო: "მეორე ტაიმში ჩვენ უკეთესი გუნდი ვიყავით. იმას ვაკეთებდით, რასაც მეტოქე პირველში - ვდომინირებდით. როდესაც "სიტიმ" იგრძნო, რომ პრობლემები ექმნებოდა, უმალვე აგუერო და სტერლინგი შეცვალა, რათა მდგომარეობა გაეკონტროლებინა. ამ დროს მეტოქემ სტანდარტულიდან გატანა მოახერხა და ამან ბევრი რამ შეცვალა. მეორე ნახევარში "სიტი" მხოლოდ გრძელი გადაცემებით თამაშობდა, პრობლემა არ გვექმნებოდა, მაგრამ მანჩესტერელთა მეკარე კარგად თამაშობდა და გატანა ვერ შევძელით".

ცალკე საუბრის თემაა ის სიმშვიდე და დამაჯერებლობა, რომლითაც "სიტი" პირველ ორ ტურში გამოირჩა. აქამდეც გვითქვამს - მანჩესტერელები თითქოს გაბრაზდნენ წინა სეზონის წარუმატებლობაზე, გაიაზრეს საკუთარი პოტენციალი და ძალიან შემართულები არიან. ჩილელმა სპეციალისტმაც სწორედ ამაზე ისაუბრა და თავისი სიტყვებით ჩვენი ვარაუდი გაამართლა.

"ის, რაც წინა სეზონში მოხდა, კარგი გაკვეთილი იყო და ფეხბურთელები უფრო მშივრები და გაბრაზებულები არიან. ახლა მათ ყველა შეხვედრის მოგება უნდათ", - განაცხადა პელეგრინიმ.

"სიტისა" და "ჩელსის" მატჩი გამორჩეული იმითაც გახლდათ, რომ ჟოზე მოურინიომ ჯონ ტერი შეცვალა, რაც აქამდე არასოდეს გაეკეთებინა. მის ხელში ლონდონელთა კაპიტანს 176 მატჩი შეუცვლელად ჰქონდა ჩატარებული.

მანჩესტერელებთან მატჩის შესვენებაზე კი ტერის მოქმედებით უკმაყოფილო პორტუგალიელმა იგი კურტ ზუმათი ჩაანაცვლა. ზოგადად კი, ჯონი 2013 წლის მაისის მერე არ შეეცვალათ. ზედმეტმა კითხვებმა ამგვარი გადაწყვეტილების შესახებ მოუ გააღიზიანა.

"იმ მომენტში ჩემთვის ნათელი იყო, რომ ზუმას უნდა ეთამაშა. უსვამდით თუ არა იმავე კითხვებს რაფა ბენიტესს, ანდრე ვილაშ-ბოაშს, რობერტო დი მატეოს? მწვრთნელებს, რომლებიც მას არ ათამაშებდნენ ხოლმე? მე ამ საკითხზე არ უნდა მელაპარაკებოდეთ, რადგან სწორედ მე ვათამაშებ ჯონს ყველა შეხვედრაში, მე გავხადე ჯონი კაპიტანი და სხვა მწვრთნელებთან გადატანილი რთული პერიოდების შემდეგ მე დავეხმარე მდგომარეობიდან გამოსვლაში.

ჩემი კაპიტანი შევცვალე, მაგრამ ის სათადარიგოთა სკამზეც კაპიტნად დარჩა, სამკლავური უბრალო ფორმალობაა.

რა რეაქცია ჰქონდა მას? გასახდელში სიხარულისგან არ ცეკვავდა, მაგრამ ეს გადაწყვეტილება ნორმალურად მიიღო", - განაცხადა "განსაკუთრებულმა".

პრინციპული მატჩის ასეთი ანგარიშით წაგება გვერდზე გადავდოთ. უფრო შემაშფოთებელი ლონდონელთა თამაშის ხარისხია. უფანტაზიო, პრიმიტიული იერიშები და დაცვის შეცდომები. აქცენტი, პირველ რიგში, შეტევაზე გავაკეთოთ, სადაც მოურინიოს ჰყავს დიეგო კოშტა, რადამელ ფალკაო და ლოიკ რემი, მაგრამ...

ჯერ ერთი, იქამდე ბურთს მიტანა უნდა და მხოლოდ ედენ აზარის მცდელობები ყოველთვის საკმარისი არ არის; თანაც ბელგიელს ძალიან მჭიდროდ მეურვეობენ ხოლმე. ოსკარი დაშავდა და ოპტიმალურ ფორმაში ვერ ჩადგა. ვილიანიც ვერ ბრწყინავს, მონდომების მიუხედავად. ხუან კუადრადო ჯერჯერობით გუნდშია და შეცვლაზეც შემოვიდა, მაგრამ კოლუმბიელი ვერაფერს გამორჩა, ის პრემიერლიგას ვერ მოერგო, ყოველ შემთხვევაში, ჯერჯერობით.

ახლა მეორე: დიეგო კოშტა ისეთი ეფექტური ვეღარ არის, როგორიც წინა სეზონში გახლდათ და უკმაყოფილება აგრესიულობაში გადასდის. ფალკაო ჯერ ბოლომდე მზად არ გახლავთ, მაგრამ შეცვლაზე შემოსულს გატანა შეეძლო, რაც "ბოროტმა" ჯო ჰარტმა არ დაანება. რემის კი შანსი არ მისცემია.

მოურინიო კი ჯერ კიდევ წინა ზაფხულისა და ზამთრის პერიოდში საუბრობდა - გაძლიერება გვჭირდებაო და, ალბათ, ახლაც ასე ფიქრობს. ჩანს კიდეც, რომ ასეა. თუმცა პორტუგალიელს, ალბათ, ტრანსფერებზე ლაპარაკი და წუწუნი "აუკრძალეს", რის გამოც ის მომენტს არ უშვებს ხელიდან და კონკურენტების მიერ დახარჯულ თანხებსა და მათ გაძლიერებაზე საუბრობს, რითაც მიგვანიშნებს, რომ "ჩელსი" არ გადახალისებულა და შესაბამისად, შეიძლება გაუჭირდეს კიდეც.

ვინ იცის, მოურინიომ რომან აბრამოვიჩს შეაგნებინა, რომ დიდი ფულის დახარჯვა ამ სატრანსფერო ფანჯრის დროსაც არის საჭირო და აუცილებელი, რადგან ბოლო დროს ისევ დაიწყო საუბრები "ჩელსის" ინტერესზე ამა თუ იმ ფეხბურთელის მიმართ. ყურადღების ცენტრში ანტუან გრიზმანია, რომლის "ატლეტიკოდან" წამოყვანასაც "ლურჯები" ადრეც ცდილობდნენ.

გარდა ამისა, დაცვაში "ჩელსის" მთავარი სამიზნე ჯონ სტოუნსი რომ არის, ალბათ, ესეც კარგად მოგეხსენებათ, მაგრამ ახალგაზრდა ინგლისელის თაობაზე "ევერტონთან" მოლაპარაკება წინ ვერ მიდის. ლონდონელები "გალათასარაის" უკანახაზელს, ალექს ტელესსაც უტრიალებენ და თურმე სტამბოლელებს 5 მილიონი ფუნტიც შესთავაზეს, რაც "გალას" ეცოტავა.

"სიტიმ" მძლავრად, თავბრუდამხვევად, ლამაზად, ენერგიულად და შედეგიანად დაიწყო და ყველაზე მთავარი ის არის, რომ ეს ყველაფერი, ჯერჯერობით, რაჰიმ სტერლინგის გარეშე ხდება.

ყველაზე ძვირად ღირებულ ინგლისელ ფეხბურთელს პირველ ორ ტურში 49 მილიონი ფუნტისა კი არა, პენის ღირებული საქმე არ გაუკეთებია. მომენტებში კლასსა და პოტენციალს ავლენს ხოლმე, მაგრამ მარგი ქმედების კოეფიციენტზე რა მოგახსენოთ.

სტერლინგს დრო სჭირდება, რომ ახალ გუნდსა და მის სათამაშო სტილს შეეგუოს და "ქალაქელებსაც" დრო სჭირდებათ იმისთვის, რომ რაჰიმი ბოლომდე შეიგუონ და მიიღონ. ექსლივერპულელმა დაინახა, რომ ვარსკვლავური იმიჯი და ფრაზები მის ტალანტზე საკმარისი არ არის.

მან ბევრი უნდა იმუშაოს, რომ "სიტიში" შესამჩნევი გახდეს, რადგან იქ ნიჭიერები, ვარსკვლავები და "ძვირფასები" მის გარეშეც მრავლად იყვნენ და არიან.

დავიდ სილვამ და განსაკუთრებით, იაია ტურემ, სეზონი უაღრესად შთამბეჭდავად დაიწყეს და პირველ ტურში ძალიან პროდუქტიულები იყვნენ. ცდა არც მეორეში დააკლეს, მაგრამ "ჩელსისთან" შეხვედრაში, უპირველეს ყოვლისა, მაინც ფერნანდინიო გამოირჩეოდა, რომელიც დამსახურებულად უნდა დავასახელოთ მატჩის საუკეთესო მოთამაშედ.

ბრაზილიელმა ძალიან ბევრი იმუშავა, ცენტრშიც კარგი იყო, დაცვასაც დაეხმარა, შეტევასაც, დიეგო კოშტაც გააბრაზა და ბოლოს, ლამაზი გოლითაც დააგვირგვინა ყველაფერი.

შეუძლებელია თვალი დახუჭო იმაზე, თუ რა შემართულია ვენსან კომპანი. ბელგიელ მცველს უკვე ორი გოლი აქვს და ისედაც ქებას იმსახურებს. 2013 წლის დეკემბრის მერე მას ზედიზედ ორი ბურთი არ გაეტანა.

ტრადიციულად, მეტოქის კარზე დაგეშილი და შეუჩერებელი იყო სერხიო აგუერო. ბეგოვიჩი რომ არა, კუნს, წესით, მეტიც უნდა გაეტანა. იგი ისევ 20 და მეტი გოლის განწყობაზეა, მაგრამ არ დაგვავიწყდეს, რომ თავის შანსს ელოდება უილფრიდ ბონიც, რომელიც ამჯერად შეცვლაზე შემოვიდა. პელეგრინის მისი სახით ძალიან საიმედო, უმაღლესი კლასის ფორვარდი ჰყავს, რომელმაც, როგორც ჩანს, ადაპტაციის პერიოდი საბოლოოდ და წარმატებით გაიარა და უკვე მთელი მისი ბრწყინვალებითაა "სიტის" განკარგულებაში.

გამოვარჩიოთ ფლანგებიც. მარჯვნიდან ხესუს ნავასი იყო რეაქტიული. იგი ამ დიდი კონკურენციის ფონზე ცდილობს ძირითადში ადგილის დამკვიდრებას, ხოლო მთელ მარცხენა ფლანგს ალექსანდრ კოლაროვი აკონტროლებს შეტევაში თავისი გაუთავებელი ჩართვებით, სახიფათო სტანდარტულებითა და გამჭოლი გადაცემებით. სერბი სეზონს კარგ ფორმაში ხვდება და მწვრთნელიც ხედავს ამას - ამიტომაც აყენებს ძირითადში.

"ამ ტემპში, ასეთი შემართებითა და თავდაჯერებით თამაში ყველაფერს შესაძლებელს ხდის. ძალიან გვიხარია, რომ ფანები ასე გავაბედნიერეთ. მიდი, "სიტი"! - დაწერა სოციალურ ქსელში აგუერომ.

ვენსან კომპანი: "55 ათასი ფანი, მათი საოცარი გულშემატკივრობა და ჩვენი ბრწყინვალე თამაში. ეს კარგი დღე იყო".

"ძალიან შთამბეჭდავი თამაში "სიტისგან". გუნდი თავიდანვე დამსახურებულად ჩაუდგა ცხრილს სათავეში", - გარი ლინეკერი.

ალან შირერი: "მოქმედი ჩემპიონები აბსოლუტურად ყველა კომპონენტში აშკარად დაიჩაგრნენ. ყოჩაღ "სიტი".

"უკვე მეორე მატჩია, "ჩელსი" ძალიან მძიმედ გამოიყურება. ჟოზეს მთელი გენიის გამოყენება მოუწევს, რომ ამ სეზონში ტიტული შეინარჩუნოს", - განაცხადა რიო ფერდინანდმა.

როგორც "სიტის", ასევე "ჩელსის" საგარეო თამაშები ელოდებათ და ადვილი შეხვედრა არც ერთი იქნება. "ქალაქელები" "გუდისონ პარკზე" "ევერტონს" ესტუმრებიან. "ლურჯებს" კი "ვესტ ბრომვიჩთან" აქვთ ვიზიტი. მათი ბოლო სტუმრობა "ალბიონთან" ძალიან ცუდად დამთავრდა - 0:3. თუ იმასაც გავითვალისწინებთ, რომ "ვესტ ბრომს" ჯერ არ მოუგია და ტონი პულისი გაბრაზებულია...

ბარემ ისიც აღვნიშნოთ, რომ ეს ორი გამორჩეული ტაქტიკოსის დუელი იქნება - შარშანწინდელ სეზონში საუკეთესოდ დასახელებული პულისის და შარშანდელის საუკეთესოდ აღიარებული მოურინიოსი.

ყოველდღიური სპორტული გაზეთი "ლელო"