პრემიერლიგა. XXVI ტური: "იუნაიტედი" უკვე აუტსაიდერებთან აგებს [VIDEO]

13 თებერვალს ინგლისის პრემიერლიგის 26-ე ტურის 7 შეხვედრა გაიმართა.

"მანჩესტერ იუნაიტედი" სტუმრად გასავარდნ ზონაში მყოფ "სანდერლენდთან" დამარცხდა - 1:2. მატჩის დასაწყისში ვაჰბი ხაზრიმ გახსნა ანგარიში, პირველი ტაიმის ბოლოს ანტონი მარსიალმა გაათანაბრა. მატჩის მიწურულს "იუნაიტედის" მეკარე დავიდ დე ხეამ საკუთარი კარი დალაშქრა.

ქულებთან ერთად "მანჩესტერმა" მატეო დარმიანიც დაკარგა, იტალიელმა მხარი ამოიგდო.

ლუი ვან გაალი (მანჩესტერი): "დღეს "სანდერლენდი" ძალიან აგრესიული იყო, ჩვენ ვერაფრით ჩავიგდეთ ხელში მატჩის სადავეები. ახლა "მანჩესტერს" ძალიან გაუჭირდება ჩემპიონთა ლიგაზე მოხვედრა. ასეთ სიტუაციაში უფრო იოლი ევროპალიგის მოგებაა და ამ გზით მოხვედრა გაისად ლიგაზე".

სემ ელარდაისი (სანდერლენდი): "მანჩესტერთან" მოგება საოცრებაა, თუმცა დამსახურებული საოცრება".

"ჩელსიმ" "ნიუკასლს" უმასპინძლა და 5:1 გაანადგურა. დუბლი შეასრულა პედრო როდრიგესმა, თითო გოლი დიეგო კოშტას, ვილიანისა და ბერტრან ტრაორეს ანგარიშზეა. პრესტიჟის გოლი ლონდონელთა კარში "ნიუკასლის" ახალწვეულმა ანდროს ტაუნსენდმა გაიტანა.

გუს ჰიდინკი (ჩელსი): "დიდებულად დავიწყეთ თამაში, პრესინგით შევეცადეთ მეტოქის გაკვირვება და ჩვენ ეს გამოგვივიდა. ვნახე, რომ გუნდს სიამოვნებდა თამაში. ჩემთვის მთავარი კი დაცვაში საიმედო თამაში იყო. ყველამ დისციპლინირებულად და მაღალ დონეზე ითამაშა. მართალია, არ ვაგებდით, მაგრამ ვერც ვიგებდით ბოლოს, კარგია, რომ ეს შეიცვალა".

სანდერლენდი-მანჩესტერი 2:1
გოლები: 1:0 ხაზრი (3), 1:1 მარსიალი (39), 2:1 დე ხეა (82 ს. კ.)

სუონსი-საუთჰემპტონი 0:1
გოლი: 0:1 ლონგი (69)

ბორნმუთი-სტოკი 1:3
გოლები: 0:1 იმბულა (9), 0:2 აფელაი (52), 0:3 ხოსელუ (55), 1:3 რიტჩი (57)

კრ. პალასი-უოტფორდი 1:2
გოლები: 0:1 დინი (16-პენ), 1:1 ადებაიორი (45), 1:2 დინი (82)
გაძევება: სუარე (90. კრ. პალასი)

ევერტონი-ვესტ ბრომვიჩი 0:1
გოლი: 0:1 რონდონი (14)

ნორვიჩი-ვესტ ჰემი 2:2
გოლები: 1:0 ბრეიდი (54), 2:0 ჰულეჰენი (65), 2:1 პაიე (74), 2:2 ნოუბლი (76)

ჩელსი-ნიუკასლი 5:1
გოლები: 1:0 დ. კოშტა (5), 2:0 პედრო (9), 3:0 ვილიანი (17), 4:0 პედრო (59), 5:0 ბ. ტრაორე (83), 5:1 ტაუნსენდი (90)

14 თებერვალი
არსენალი-ლესტერი 16:00
ასტონ ვილა-ლივერპული 18:05
სიტი-ტოტენჰემი 20:15

1. ლესტერი - 53 ქულა; 2. ტოტენჰემი - 48; 3. არსენალი - 48; 4. სიტი - 47; 5. მანჩესტერი - 41.