პრემიერლიგა: "ტოტენჰემი" ყველაზე ახალგაზრდულია

ინგლისის ნაკრებს ევროპის ჩემპიონატის ფინალურ ეტაპზე ყველაზე ახალგაზრდული ნაკრები ეყოლება. ინგლისელთა საშუალო ასაკი 26 წელიც კი არ არის, ეს უკვე გაუწყეთ და ისიც გითხარით, რომ "ლომებს" ასეთი ახალგაზრდული ნაკრები დიდ საფეხბურთო ფორუმებზე 1958 წლის მერე არ ჰყოლიათ, ნახევარ საუკუნეზე მეტია...

ეს არც ისე გასაკვირი გახდება, თუ გავითვალისწინებთ იმას, რომ პრემიერლიგის 2015/16 წლების სეზონში გუნდების ძირითადი შემადგენლობების საშუალო ასაკს თუ ავიღებთ, ამ მხრივ, "ტოტენჰემს" ყველაზე ახალგაზრდული გუნდი გამოსდის. "დეზების" ბანაკიდან კი ნაკრებში 5 ფეხბურთელია. 5 ემისარი ჰყავს "ლივერპულსაც" და ჩვენ მიერ ნახსენებ სიაში მერსისაიდელები მეორე ადგილზე არიან. ამას "მანჩესტერ იუნაიტედის" 18 წლის თავდამსხმელი მარკუს რაშფორდიც დავუმატოთ და... ყველაფერი ცხადი ხდება.

კონკრეტულად ერთ მატჩში ყველაზე ახალგაზრდული გუნდი სწორედ "ლივერპულმა" გამოიყვანა, რომლის საშუალო ასაკი 24 წელიც არ იყო. მთლიანობაში კი, პირველზე, როგორც გითხარით, "ტოტენჰემია" საშუალო ასაკით 24 წელი და 238 დღე. ეს სტატისტიკა საკმაოდ საინტერესოა და გარკვეული დასკვნების გაკეთება შეიძლება, ისევე, როგორც, მომავალი წლების თაობაზე რაღაც-რაღაც პროგნოზების გამოთქმა.

მაგალითად, ჩემპიონი "ლესტერი" ამ სიაში ბოლოდან მე-6 ადგილზეა, საშუალო ასაკით 28 წელი და 51 დღე. ამ მხრივ, სულაც "გასავარდნ ზონაშია" "სიტი", კერძოდ კი, მე-18 ადგილზე - 28 წელი და 253 დღე. ასე რომ, პეპ გვარდიოლას გუნდის გადახალისება-გაახალგაზრდავებაზე მოუწევს ფიქრი და მუშაობა.

"მანჩესტერ იუნაიტედი" აქ მაინც გავიდა "ჩემპიონთა ლიგის ზონაში" და მე-4 ადგილზე აღმოჩნდა (26 წელი და 6 დღე). მანჩესტერელებს გავარდნილმა "ნიუკასლმა" გაასწრო - 25 წელი და 337 დღე.

რაც შეეხება ყველაზე ასაკოვან გუნდს, ამ კუთხით წინა სეზონში "ვესტ ბრომვიჩ ალბიონი" გამოირჩა, რომლის ძირითადი შემადგენლობის საშუალო ასაკი 38 ტურის ჯამში 29 წელი და 197 დღე გამოვიდა.

ტოტენჰემი - 24 წელი და 328 დღე
ლივერპული - 25 წელი და 241 დღე
ნიუკასლი - 25 წელი და 337 დღე
მანჩესტერი - 26 წელი და 8 დღე
ევერტონი - 26 წელი და 306 დღე
საუთჰემპტონი - 26 წელი და 322 დღე
ვესტ ჰემი - 26 წელი და 348 დღე
ასტონ ვილა - 27 წელი და 35 დღე
ჩელსი - 27 წელი და 112 დღე
არსენალი - 27 წელი და 142 დღე
სანდერლენდი - 27 წელი და 276 დღე
სტოკი - 27 წელი და 290 დღე
ბორნმუთი - 28 წელი და 12 დღე
სუონსი - 28 წელი და 42 დღე
ლესტერი - 28 წელი და 51 დღე
კრ. პალასი - 28 წელი და 55 დღე
ნორვიჩი - 28 წელი და 62 დღე
სიტი - 28 წელი და 253 დღე
უოტფორდი - 28 წელი და 257 დღე
ვესტ ბრომვიჩი - 29 წელი და 197 დღე

ყოველდღიური სპორტული გაზეთი "ლელო"