ახალმა "მილანმა" დიდი ანგარიშით მოგებით დაიწყო

"მილანი" ახალი სეზონისთვის მზადებას შეუდგა და პირველი ამხანაგური მატჩიც გამართა - ლომბარდიული გრანდი შვეიცარიულ "ლუგანოს" დაუპირისპირდა და 4 უპასუხო გოლი გაუტანა მეტოქეს.

პირველი ტაიმი იტალიელებმა მინიმალური ანგარიშით მოიგეს, ერთადერთი გოლი კი ახალგაზრდა ფორვარდმა პატრიკ კუტრონემ გაიტანა. მეორე ნახევარში მილანელთა უპირატესობა კიდევ უფრო გამოიკვეთა და "ლუგანოს" კარში კიდევ 3 გოლი გავიდა - თავი ჯოვანი კროჩატამ, ხოსე სოსამ და გუსტავო გომესმა გამოიჩინეს. კარგი შთაბეჭდილება დატოვა ჟოზე მაურიმ, რომლის ანგარიშზეც ორი საგოლე პასია.

ვინჩენცო მონტელამ 4-3-3 ტაქტიკა აირჩია და როგორც მოსალოდნელი იყო, "ლუგანოს" შემტევი ფეხბურთი დაუპირისპირა. კარში მარკო სტორარი იდგა - დაცვის ფლანგებზე ინაციო აბატე და რიკარდო როდრიგესი, ცენტრში კი გაბრიელ პალეტა და მატეო მუსაკიო. ნახევარდაცვაში ფრანკ კესის, ანდრეა ბერტოლაჩის და რიკარდო მონტოლივოს ტრიო ვიხილეთ, თავდასხმაში კი ჰაქან ჩალჰანოღლუ, ფაბიო ბორინი და პატრიკ კუტრონე ირჯებოდნენ. მეორე ნახევარში მოედანზე ჟოზე მაური, კრისტიან საპატა, ლუკა ანტონელი, ჯოვანი კროჩატა, ხოსე სოსა, მბაიე ნიანგი, ნიკოლო ძანელატო, გაბრიელი, მატია დე შილიო, კარლოს ბაკა, გუსტავო გომესი, მატეო გაბია და სტეფან სიმიჩი გამოჩნდნენ...

ეს იყო პირველი მატჩი, რომელიც განახლებულმა "მილანმა" გამართა და რა გასაკვირია, რომ ამ შეხვედრამ დიდი ინტერესი გამოიწვია - გულშემატკივრებმა პრაქტიკულად ახალი გუნდი იხილეს. მატჩის შემდეგ ვინჩენცო მონტელა ჟურნალისტებს შეხვდა და ვრცლად ისაუბრა...

პირველი მატჩი
ძალიან კარგი სპარინგი იყო საკმაოდ კარგ გუნდთან და სასიხარულოა, რომ დამაჯერებელი გამარჯვება მოვიპოვეთ. "ლუგანო" სამოყვარულო გუნდი ნამდვილად არაა, მაღალი დონის ფეხბურთს თამაშობს და როგორც ნახეთ, პირველი ტაიმი მხოლოდ მინიმალური ანგარიშით მოვიგეთ. მთავარია, რომ ახალი ფეხბურთელები ვნახე საქმეში და მთლიანობაში, კმაყოფილი დავრჩი. გუნდს შეთამაშება სჭირდება და ამხანაგური შეხვედრები ჩვენთვის ჰაერივით საჭიროა. ახალ სეზონს კარგ ფორმაში უნდა შევხვდეთ, ამისთვის კი მოსამზადებელი ეტაპის იდეალურად დაგეგმვაა საჭირო.

ჰაქან ჩალჰაონოღლუ
მოქმედების დიდი დიაპაზონი აქვს. თუ დააკვირდით, ხშირად იყო შეტევის დამაგვირგვინებელ ფაზაში და ასევე ხშირად იწევდა უკან და სიღრმიდან იწყებდა იერიშებს. სწორედ ასეთი ფეხბურთელი გვჭირდებოდა, რომელსაც თამაშის წარმართვა შეუძლია. იცით, რომ ჰაქანი დიდი ხანი არ თამაშობდა ფეხბურთს, მაგრამ შეკრებაზე კარგ ფორმაში გამოცხადდა. შესაბამისად, მის პროფესიონალიზმთან კითხვის ნიშნები არ მაქვს და მჯერა, რომ ის გაამართლებს გაცემულ ავანსებს.

ფრანკ კესი
ნახევარდაცვაში სწრაფი, აგრესიული და ამავდროულად, ტექნიკური ფეხბურთელი გვჭირდებოდა, ფრანკ კესი კი სწორედ ასეთია. ახალ გუნდთან შეგუება მასაც დასჭირდება, თუმცა ჩვენ ხელს მაქსიმალურად შევუწყობთ. ჩალჰანოღლუს მსგავსად, ისიც უაღრესად მოტივირებულია და თავს არ ზოგავს. ნახევარდაცვაში კონკურენცია იქნება და კესის სრულად მოუწევს შესაძლებლობების დემონსტრირება. "ატალანტაში" მას ბრწყინვალე სეზონი ჰქონდა და იმედი მაქვს, რომ ჩვენთან კიდევ უფრო მოუმატებს.

რიკარდო როდრიგესი
რიკარდო პირველი იყო, ვინც დავიმატეთ და მაშინვე ძალიან კმაყოფილი ვიყავი. დავიმატეთ პროფესიონალი, რომელსაც თვალდახუჭული შეგიძლია ენდო. როდრიგესმა "ლუგანოსთან" კარგად ითამაშა, თუმცა დასვენების შემდეგ, მასაც მოსამატებელი აქვს. ძირითად შემადგენლობაში გარანტირებული ადგილი არავის ექნება - დაცვის მარცხენა ფრთაზე მატია დე შილიოს და დავიდე კალაბრიას შეუძლიათ თამაში.

ჯანლუიჯი დონარუმა
ეს იყო გრძელი სატრანსფერო საგა, რომელიც დადებითად გადაწყდა - დონარუმა მილანისთვის იგივეა, რაც შვილი და ბედნიერები ვართ რომ შეთანხმება შედგა. ჯიჯო დიდი მეკარეა - მას მხარდაჭერა სჭირდება რომ კიდევ უკეთესად ათამაშდეს. დონარუმა ძალიან მოტივირებულია და ერთი სული აქვს, როდის დაიწყება ახალი სეზონი. დღეს უკვე თამამად შეგვიძლია ვთქვათ, რომ აღარ არსებობს კითხვის ნიშნები - ჯიჯო მილანელია და მშობლიურ გუნდში გააგრძელებს კარიერას.

მიზანი
ადრეც ვთქვი და კიდევ ერთხელ გავიმეირებ, რომ ჩვენი მიზანი ჩემპიონთა ლიგაზე დაბრუნებაა. კლუბის მესვეურები ყველაფერს აკეთებენ იმისთვის, რომ ახალ სეზონში გაცილებით უკეთ ვითამაშოთ, ვიდრე სერია A-ს წინა გათამაშებაში. გულშემატკივრები ჩვენგან სწორედ საუკეთესო ოთხეულში მოხვედრას ითხოვენ, მათი ხმა კი ჩვენთვის ყველაზე მნიშვნელოვანია.

ტრანსფერები
7 ახალი ფეხბურთელი გვყავს და ეს ძალიან კარგია. გუნდს გაძლიერება ყველა რგოლში სჭირდებოდა და მუშაობას თავიდანვე მიზანმიმართულად შევუდექით. ჯერ გავაანალიზეთ თუ სად გვჭირდებოდა გაძლიერება და როგორი ტიპის ფეხბურთელები უნდა დაგვემატებინა - მხოლოდ ამის შემდეგ დავიწყეთ მოლაპარაკებები. პროცესი გრძელდება და დიდი ალბათობით, კიდევ დავიმატებთ ერთ, ან ორ ფეხბურთელს. ეს უკვე ის გუნდია, რომელსაც მაღალი მიზნებისთვის ბრძოლა შეუძლია.

ყოველდღიური სპორტული გაზეთი "ლელო"