ცხელი სატრანსფერო ამბები ტურინიდან

იტალიური საფეხბურთო სამყაროს ყურადღების ცენტრში "აძურა" და "აძურინი" რჩებიან, მაგრამ აქა-იქ კლუბებზეც ვრცელდება საინტერესო ინფორმაციები. მაგალითად, აქტიურ სატრანსფერო კამპანიაშია ჩაბმული იტალიის ჩემპიონი "იუვენტუსი". სწორედ ტურინელთა ბანაკში შევიხედავთ...

პელუზო - სრულფასოვანი იუვენტინო
ფედერიკო პელუზო "ატალანტადან" "იუვენტუსში" იჯარის წესით გადავიდა, ტურინელებს კი ფეხბურთელის ბედი ამ ზაფხულს უნდა გადაეწყვიტათ... "კორიერე დელო სპორტის" ცნობით, "იუვეს" მესვეურები უკვე შეუთანხმდნენ ბერგამოულ კლუბს და სულ მალე ფედერიკო "ვეკია სენიორას" სრულფასოვანი წევრი გახდება. სატრანსფერო ფასი არ სახელდება. სამაგიეროდ, ვიცით, რომ პელუზოს 2017 წლამდე გათვლილი კონტრაქტი შეუდგინეს.

29 წლის პელუზომ გასულ სეზონში 25 შეხვედრაში მიიღო მონაწილეობა - ერთი გოლი გაიტანა და ორი საგოლე პასი მიითვალა. 3-5-2 სქემაში მეტწილად მარცხენა ნახევარმცველად ირჯებოდა, თუმცა რამდენჯერმე დაცვაშიც ითამაშა. ანტონიო კონტემ საგანგებოდ აღნიშნა, რომ პელუზომ გუნდი გააძლიერა - ამიტომ მისი გამოსყიდვა არავის გაკვირვებია.

ჯაკერინი რჩება
ბოლო პერიოდში ხშირად წერდნენ ემანუელე ჯაკერინის "იუვენტუსიდან" შესაძლო აბარგების შესახებ. 28 წლის შემტევი ნახევარმცველი "ვეკია სენიორას" ძირითად შემადგენლობაში ვერ ხვდება და კარგ შემთხვევაში, ბოლო 15-20 წუთი უწევს თამაში. არადა, ემანუელეს იტალიის ეროვნული ნაკრების მთავარი მწვრთნელი ენდობა და მას ხშირად სასტარტო თერთმეტეულში ათამაშებს.

"სკუადრა აძურას" ფეხბურთელისთვის გუნდში სათადარიგოთა სკამის "ხეხვა" მთლად სასიამოვნო არ უნდა იყოს და მისი სავარაუდო აბარგების შესახებ ხმები ამიტომ გავრცელდა. თუმცა ჯაკერინის აგენტმა გავრცელებულ ინფორმაციას ჭორი უწოდა:

"ჩემი კლიენტი ვერ იქნება ბედნიერი იმით, რომ გუნდში მეტწილად თადარიგში უწევს ყოფნა, მაგრამ ეს იმას არ ნიშნავს, რომ "იუვენტუსიდან" წასვლას აპირებს. კონფედერაციათა თასზე გამგზავრებამდე ემანუელე ანტონიო კონტეს ესაუბრა და ვიცი, რომ მისგან გარკვეული გარანტიები მიიღო. ასე რომ, ჯაკერინი არსად წასვლას არ აპირებს და ის ისევ "იუვენტუსში" ითამაშებს".

გაურკვევლობა ისლას გარშემო
გასულ ზაფხულს "იუვენტუსმა" მაურისიო ისლას სატრანსფერო უფლებების ნახევარი გამოისყიდა და 25 წლის ჩილელი "უდინეზედან" თავისთან წაიყვანა. ტურინულ-ფრიულური შეთანხმების თანახმად, პიემონტელებს სეზონის დასრულებისთანავე შეეძლოთ ფეხბურთელის სატრანსფერო უფლებების დარჩენილი ნახევრის გამოსყიდვა და სანაცვლოდ, უდინელთა ბიუჯეტში კიდევ 5 მილიონი ევროს გადარიცხვა.

ფრიულელები დიდი ხანია ელოდებიან ტურინელთა გადაწყვეტილებას, თუმცა ჯერჯერობით ვერანაირი პასუხი ვერ მიიღეს - ამიტომ პრესასთან საგანგებო განცხადება "უდინეზეს" ვიცე-პრეზიდენტმა ჯინო პოცომ გააკეთა:

"კარგი იქნება, თუ ტურინელები მალე ჩამოყალიბდებიან მაურისიო ისლასთან დაკავშირებით. თუ უნდათ მისი ბოლომდე გამოსყიდვა, იციან, რამდენი უნდა გადაიხადონ - თუ არა და გვითხრან, როგორ მოვიქცეთ. არც იმის წინააღმდეგნი ვართ, რომ მაურიოსიო რომელიმე მესამე კლუბში აღმოჩნდეს, აღებულ თანხას კი ჩვენ და ტურინელები შუაზე გავიყოფთ. მოკლედ, ხელშეკრულებით ყველაფერი იდეალურადაა დალაგებული და მთავარია, ტურინელებმა არჩევანი გააკეთონ".

სავარაუდოდ, პიემონტელები ისლას გამოსყიდვაზე უარს იტყვიან და პოცოს თქმის არ იყოს, მას რომელიმე მესამე გუნდს შესთავაზებენ. ცნობილია, რომ ისლას გადაბირებით მილანის "ინტერია" დაინტერესებული და მზადაა, მიზნის მისაღწევად ჯიბეზე ხელი გაიკრას.

ფელიპე მელოს უარი
ფელიპე მელომ ორი სეზონი თურქულ "გალათასარაიში" გაატარა, მაგრამ მთელი ეს პერიოდი მის სატრანსფერო უფლებებს "იუვენტუსი" ფლობდა. თურქებმა 29 წლის ბრაზილიელის გამოსყიდვა არ ისურვეს და შედეგად, მელო ტურინულ გრანდს დაუბრუნდა. საინტერესოა, სად ითამაშებს მომდევნო სეზონში ფელიპე? - ამ თემაზე კომენტარი თავად ფეხბურთელმა გააკეთა:

"ბოლო ორი სეზონი სტამბულში გავატარე და სამი ტროფეი მოვიგე. ამით ძალიან ვამაყობ. საწყენია, რომ თურქებმა ჩემი გამოსყიდვა არ ისურვეს და ტურინში მომიწია დაბრუნება. უკვე ველაპარაკე ანტონიო კონტეს და პირდაპირ ვუთხარი მას, რომ "იუვენტუსში" თამაში არ მსურს. "იუვე" წარსულია, სადაც არ მსურს დაბრუნება. იმედია, ტურინელები ახალი კლუბის მოძებნაში დამეხმარებიან და ჩემს სანაცვლოდ დიდ თანხას არ მოითხოვენ".

ამ თემაზე "იუვეს" სპორტულმა დირექტორმა ჯუზეპე მაროტამაც გააკეთა კომენტარი და პირველ რიგში, თვიოთონ ფეხბურთელს მიანიშნა, რომ ასე მარტივად არ არის საქმე:

"ფელიპე მელოს "იუვენტუსში" თამაში არ სურს და ბუნებრივია, მის აზრს ვითვალისწინებთ. ბრაზილიელს ტრანსფერზე დავაყენებთ და მასში იმ თანხას მოვითხოვთ, რაც რეალურად ღირს. ზუსტ ოდენობას ვერ დავასახელებ, რადგან ეს თემა ჯერ კიდევ გასავლელია. თუმცა, ერთი ფაქტია, მელო 3 და 5 მილიონი ვერ ეღირება. "გალათასარაის" ბოლო წარმატებებში მან ლომის წილი დაიდო და ფასიც შესაბამისი ექნება. თუ ფეხბურთელის გამოსყიდვას არ მოისურვებენ, ჩვენთან მოუწევს თამაში.

პირდაპირ ვიტყვი, რომ მისი ისევ იჯარით გაშვება არ გვსურს - ფაქტია, "გალათასარაიმ" მელოს სამსახურით კარგად ისარგებლა და თუ ხელფასს არ ჩავთვლით, მასში არაფერი გადაუხდია. ასეთი რამ ვეღარ განმეორდება".

ფელიპე მელოს "იუვენტუსთან" 2015 წლის 1 ივლისამდე აკავშირებს ხელშეკრულება და მაროტას კომენტარიდან გამომდინარე, არ არის გამორიცხული, მისი ბოლომდე შესრულება მოუწიოს.

ყოველდღიური სპორტული გაზეთი "ლელო"

ასევე იხილეთ:
ტურინის "იუვენტუსი" კარლოს ტევესში 12 მილიონს იხდის