პაოლო მალდინი: ესპანეთთან უშანსოდ არ ვართ

"მილანის" და იტალიური ფეხბურთის ლეგენდა პაოლო მალდინი პრესის ფურცლებზე იშვიათად ჩნდება, მისი ინტერვიუ კი ნამდვილად მისწრებაა. პაოლოს სათქმელი დაუგროვდა და ჯობია, საქმეზე გადავიდეთ...

- კონფედერაციათა თასს თუ ადევნებთ თვალს?
- ყველა თამაში ნამდვილად არ მინახავს, მაგრამ იტალიის ნაკრების მატჩებს მივადევნე თვალი. "სკუადრა აძურა" კარგად უტევს, დაცვაში კი სერიოზული პრობლემებია. თუმცა, ჩვენს ნაკრებში დიდებული უკანახაზელები არიან და მჯერა, რომ ხარვეზები მალე აღმოიფხვრება.

- მარიო ბალოტელის გარეშე ესპანეთთან რა შანსები გვაქვს?
- იტალიის ნაკრები ერთი გამოკვეთილი ფორვარდით თამაშობს და ასეთ დროს მარიო ბალოტელი მართლაც ფასდაუდებელია. სამწუხაროა, რომ ტრავმის გამო ბრაზილიაში ჯამპაოლო პაცინი ვერ გაემგზავრა, რომელიც ბალოს უპირველესი შემცვლელი იქნებოდა. ესპანეთი ფავორიტია, მაგრამ უშანსოდ არც ჩვენ ვართ.

- ბევრმა ბალოტელი იმის გამო გააკრიტიკა, რომ ბრაზილია ნაადრევად დატოვა და თუნდაც ტრავმიანი, გუნდთან ერთად არ დარჩა...
- ფეხბურთელებმა უკან გრძელი და დამღლელი სეზონი მოიტოვეს, ამიტომ მათი გაკრიტიკებისას მეტი სიფრთხილე გვმართებს. ჩემპიონთა ლიგის საკვალიფიკაციო ეტაპი არც ისე შორსაა, მარიოს კი შანსი მიეცა, ცოტა მეტი ხნით დაისვენოს, რაც უნდა გამოეყენებინა კიდეც. ბალოტელის ქმედებაში ცუდს ვერაფერს ვხედავ.

- "მილანის" სატრანსფერო კამპანიას როგორ შეაფასებთ?
- ახალგაზრდებზე აქცენტის გაკეთება, უდავოდ, გამართლებულია, სხვა საინტერესო კი ჯერჯერობით არაფერი მომხდარა. ფაქტია, კლუბის მესვეურებს ტრანსფერებისთვის დიდძალი თანხები არ აქვთ და ამიტომ ვარსკვლავთა მოსვლას არ ველოდები. კარგი იქნება, თუ ყველა რგოლში თითო მაღალი კლასის ფეხბურთელს დავიმატებთ.

- მასიმილიანო ალეგრის მილანური კარიერა ბეწვზე ეკიდა. თქვენ თუ ემხრობით კლუბის მესვეურთა საბოლოო გადაწყვეტილებას?
- მასიმილიანოს გათავისუფლება დიდი სისულელე იქნებოდა, რადგან არსებული რესურსით, უფრო მეტს ვერც სხვა მწვრთნელს მოვთხოვდით. "მილანი" ჩემპიონთა ლიგიდან "ბარსელონამ" გააგდო, გუნდმა, რომელმაც რამდენიმე დღის წინ კოლოსალურ თანხად ნეიმარი გაიფორმა. ესპანური და ინგლისური გრანდები ფინანსურად ბევრად ძლიერები არიან და მათთან კონკურენციაში, დღეს ნებისმიერი მწვრთნელი აუტსაიდერი იქნება. ამიტომ ალეგრის დატოვებას თავიდანვე მივესალმებოდი.

- კარლო ანჩელოტი მადრიდის "რეალის" მწვრთნელია. გაამართლებს ესპანელთა არჩევანი?
- ანჩელოტი ყველაზე უკეთ აკონტროლებდა გასახდელში ვითარებას, ვისთანაც კი ოდესმე მიმუშავია. კარლო სიმშვიდის გარანტია, რაც წარმატების ერთ-ერთი მთავარი ფორმულაა. სწორედ ამის ხარჯზე დაიპყრო მწვერვალები ჯერ "მილანში", შემდეგ "ჩელსიში" და შემდეგ პსჟ-ში. დარწმუნებული ვარ, ანჩელოტი მადრიდში წარმატებულად იმუშავებს.

- არის ვერსია, რომ ანჩელოტის "რეალში" თქვენი წაყვანა სურს...
- ასისტენტად თუ სერხიო რამოსს უნდა შევუწყვილდე დაცვაში? – ამის შესახებ არაფერი მსმენია და თუ რამე გავიგე, ნამდვილად არ დაგიმალავთ.

ყოველდღიური სპორტული გაზეთი "ლელო"

ასევე იხილეთ:
ჩეზარე პრანდელი: ნამდვილი ფეხბურთი წარსულიდან