2000 წლის 16 დეკემბერი სამუდამოდ ჩაიწერა მსოფლიო ფეხბურთის ისტორიაში. იტალიელმა პაოლო დი კანიომ დაინახა, რომ მოწინააღმდეგის მეკარე დაშავებული იყო და ცარიელ კარში გოლი არ გაიტანა. ისე, ხომ არ გაგახსენდათ კადრი ლეგენდარული ქართული ფილმიდან - "პირველი მერცხალი"? როცა იასონ კვირკველიამ (დოდო აბაშიძის გმირი) არ იკადრა დაუცველ კარში გატანა...
ხუმრობა იქით იყოს და, დი კანიოს რომ გაეტანა, "ვესტ ჰემი" აუცილებლად მოუგებდა პრინციპულ მეტოქე "ევერტონს". გატანას კი არაფერი უნდოდა - დი კანიო პრაქტიკულად ცარიელი კარის წინ იდგა, ის
მინდვრის ყველაზე "ცხელ" მონაკვეთში ზუსტად ასეთი მდგომარეობა იყო: კარს მხოლოდ მცველი ფარავდა. "ევერტონის" მეკარე პოლ ჯერარდი მინდორზე იწვა და ტკივილისგან იკლაკნებოდა...
ის დი კანიოს ხელს ვერაფრით შეუშლიდა. პაოლომ ამ დროს ბურთი ხელში აიღო და არბიტრს საშუალება მისცა, მატჩი შეეწყვიტა. მინდორზე მედპერსონალი გამოჩნდა. ფიფამ იტალიელი ფეხბურთელი სპეციალური პრიზით დააჯილდოვა...
მოგვიანებით, თავის ავტობიოგრაფიულ წიგნში დი კანიომ გაიხსენა თანამედროვე ფეხბურთის ერთ-ერთი დასამახსოვრებელი ეპიზოდი, რომელიც შემდეგ დაუწერელ კანონად იქცა ფეხბურთში:
"ასეთ რთულ სიტუაციებში მთავარია, დაზარალებულს დროულად აღმოუჩინონ სამედიცინო დახმარება. ხშირად ეს ფაქტორი გადამწყვეტიც კი ხდება. კვალიფიციურ ექიმს პირველ წუთებში შეუძლია მოთამაშისათვის მძიმე ტრავმის თავიდან აცილება.
კარში რომ დამერტყა, 60-80 წამი უაზროდ დაიკარგებოდა. შეიძლება, ეპიზოდი კიდევ უფრო დიდხანს გაგრძელებულიყო. ეს იმ შემთხვევაში მოხდებოდა, თუ მცველი დარტყმის ბლოკირებას მოახდენდა, ბურთი თამაშში დარჩებოდა და შეხვედრა გაგრძელდებოდა.
მე არაერთხელ მითქვამს, რომ როცა მინდორზე ვარ, ჩემთვის მოწინააღმდეგე - მტერია. მაგრამ იმ შემთხვევაში, ჯერარდი ვეღარ აღვიქვი მტრად.
მე გავიხსენე, რომ ის უბრალოდ ჩემი კოლეგა იყო და მას ძალიან უჭირდა. ის იმ წამს იყო ჩემი ძმა, ჩემსავით ფეხბურთზე უსაზღვროდ შეყვარებული და ჩემგან მხოლოდ წამიერი დახმარება სჭირდებოდა. მას შეეძლო, საერთოდ დაესრულებინა საფეხბურთო კარიერა. მოკლედ, რჩებოდა ერთადერთი ვარიანტი - თამაში აუცილებლად უნდა გაჩერებულიყო.
პუბლიკა ერთ წამს გაირინდა. წამებში ყველა მიხვდა, რაც მოხდა. "გუდისონ პარკი" აპლოდისმენტებისაგან კინაღამ დაინგრა. მხოლოდ რამდენიმე წამის მერე მივხვდი, რომ ეს ხალხი ტაშს მე მიკრავდა", - დაწერა დი კანიომ.
დი კანიოს მანამდე გაუგონარ საფეხბურთო რაინდობას რამდენიმე თანამედროვე გამოეხმაურა.
"ის ჩემთვის უბრალოდ ფეხბურთის რაინდია. ასეთები ალამაზებენ სპორტის იმ სახეობას, რომელიც ყველას ასე ძალიან გვიყვარს", - თქვა არსენ ვენგერმა.
"ერთია ქულები და მეორე - ადამიანის სიცოცხლე. დი კანიომ ისეთი რამ ჩაიდინა, რომ ამაზე, შესაძლოა, მთელი რომანი აიგოს", - ეს სვენ გორან ერიქსონის სიტყვებია.
დი კანიო ახლა 46 წლისაა. ფეხბურთელობისას ითამაშა "ლაციოში", "ტერნანაში", "იუვენტუსში", "ნაპოლიში", "მილანში", "სელტიკში", "შეფილდ უენსდეიში", "ვესტ ჰემში", "ჩარლტონსა" და "ჩისკო რომაში".
სამწვრთნელო ასპარეზზე მისი ბიოგრაფია შედარებით მოკრძალებულია. წვრთნიდა მხოლოდ ორ კლუბს - "სუინდონსა" და "სანდერლენდს". დიდი წარმატებისთვის არც ერთ კლუბში არ მიუღწევია.
საყოველთაოდაა ცნობილი დი კანიოს უცნაური პოლიტიკური გემოვნების შესახებ. მან საკუთარ თავს ღიად უწოდა "ფაშისტი", ოღონდ, იქვე განმარტა, რომ "ის ფაშისტია, მაგრამ არც ერთ შემთხვევაში არ არის რასისტი".
განსაკუთრებით "ლაციოში" ასპარეზობის დროს დი კანიოს არაერთხელ აღუნიშნავს გოლი ფაშისტური რიტუალით. ამიტომ ის კლუბის "ულტრასებს" განსაკუთრებით უყვართ.
დი კანიო არანაკლებ ცნობილი და პოპულარულია თავისი ტატუებით. მარჯვენა ბიცეფსზე მას ლათინურად აწერია "DUX", რაც ნიშნავს "ლიდერს" და თავის დროზე იტალიის დიქტატორის ბენიტო მუსოლინის საპატივცემულო აბრევიატურა გახლდათ იტალიაში.
პაოლოს ზურგზეც უამრავი ტატუ აქვს. აქ გამოირჩევა ბენიტო მუსოლინის რამდენიმე პორტრეტი. მხრებზე აქვს "ვესტ ჰემისა" და მამის გამოსახულებები.
ბოლო დროს დი კანიოს ცხოვრებაში მკვეთრად გაიზარდა იაპონური კულტურის როლი. ის სამურაების ყოფას ჩაუღრმავდა და რამდენჯერმე ეწვია იაპონიას, რათა უფრო ღრმად გარკვეულიყო მათი ყოფის რთულ თავისებურებებში.
დი კანიო გატაცებით სწავლობს ორ იაპონურ მიმდინარეობას - ჰაგარუკესა და ბუდიშოს, რომლებიც ასევე სამურაების ყოფასთანაა დაკავშირებული.
პარადოქსია, მაგრამ ფაქტია - დი კანიოს, ვინც მართლაც შესანიშნავი ფეხბურთელი იყო, არასოდეს უთამაშია იტალიის ნაკრებში...
ყოველკვირეული ჟურნალი "ლელო week"
როდესაც პროფესიაზე მაგლა კაცობა დგას!
ლაციოს ტიფოზი