არიან ფეხბურთელები, რომელთა თამაში მოგვენატრება და ასეთია ანდრეა პირლო. 36 წლის იტალიელმა საბოლოო გადაწყვეტილება მიიღო და კარიერას "ნიუ იორკ სიტიში" გააგრძელებს. ანდრეა ამერიკაშია, ახალი გუნდის მატჩს დაესწრო და შემდეგ მინდორზე გავიდა, რათა თანაგუნდელებს მისალმებოდა - დავიდ ვილიას გადაეხვია, კარგა ხანს ებაასა, დანარჩენებს კი ხელი ჩამოართვა და შემდეგ გულშემატკივრებისთვისაც მოიცალა. ის, რაც ტრიბუნებზე ხდებოდა, ცალკე სალაპარაკო თემაა - ქომაგები ფეხზე დაუდგნენ ვეტერან იტალიელს და კარგა ხანი ტაში და ოვაციები არ წყდებოდა. პირლო უკვე ლეგენდაა და "ნიუ იორკ სიტის" თამაშზე მისმა გამოჩენამ
მომდევნო კვირას, პირლო ახალ კლუბთან 2-წლიან ხელშეკრულებას გააფორმებს და სეზონში 6 მილიონ ევროს მიიღებს, ბონუსების ჩათვლით კი, თანხა 7 მილიონამდე შეიძლება ავიდეს. ანდრეამ ამერიკელ ჟურნალისტებს კომენტარი მისცა:
"ძალიან სასიამოვნოა, რომ გულშემატკივრები ასე თბილად დამხვდნენ, ჩემი ვალი კი ის გახლავთ, რომ მათი ნდობა გავამართლო. "ნიუ იორკ სიტიში" შესანიშნავი შემადგენლობაა და ამ გუნდს მე და ფრენკ ლემპარდიც დავემატებით. ბევრს ჰგონია, რომ ამერიკაში ფეხბურთი ნაკლებად პოპულარულია, მაგრამ ასე ნამდვილად არაა - პირიქით, აქ უამრავი ადამიანი ერკვევა სპორტის უპირველეს სახეობაში და ტრიბუნებიც მუდმივად სავსეა. კანადაში ქალთა მსოფლიოს ჩემპიონატი მიმდინარეობს და ისიც კი უდიდეს ინტერესს იწვევს. ყველაფერს გავაკეთებ, რომ ამერიკაში საკუთარი შესაძლებლობები სრულად წარმოვაჩინო".
პირლოსთან ერთად, ამერიკული ლიგა ბევრად სანახაობრივი გახდება და კიდევ უფრო მეტ გულშემატკივარს მიიზიდავს, ევროპული ფეხბურთი კი კიდევ ერთმა დიდმა ფეხბურთელმა, დიდმა მაესტრომ დატოვა.
როგორც აღმოჩნდა, ჩემპიონთა ლიგის ფინალურ მატჩში ჩვენ ვემშვიდობებოდით არა მხოლოდ ჩავის, არამედ პირლოსაც. მართალია, ანდრეა ევროპის ჩემპიონატზე აპირებს ჩასვლას და ამერიკაში კიდევ მინიმუმ 2 წელი თამაშს, მაგრამ ევროპულ საკლუბო ფეხბურთს დაემშვიდობა, ეს კი იმას ნიშნავს, რომ პირლო ჩვენ მოგვენატრება...
ყოველდღიური სპორტული გაზეთი "ლელო"
