ალესიო რომანიოლი: 13 ნომერი ნესტას გამო ავიღე!

"გაძეტა დელო სპორტის" ჟურნალისტი "მილანის" ახალწვეულ მცველს, ალესიო რომანიოლის გაესაუბრა, რათა გულშემატკივრებისთვის ეს ნიჭიერი, 20 წლის მცველი ახლოს გაეცნო.

"როსონერის" ქომაგები რომანიოლიზე უდიდეს იმედებს ამყარებენ - ტანმაღალი უკანახაზელი "მილანის" დაცვის პოტენციურ ლიდერად ესახებათ. აღმოჩნდა, რომ რომანიოლის კერპი ლეგენდარული ალესანდრო ნესტაა და სხვათა შორის, ისევე, როგორც ნესტას, არც მას უყვარს ინტერვიუების მიცემა, რასაც მისი პასუხებიც მიგახვედრებთ.

- ალესიო, მიხაილოვიჩი როგორ არის?
- უკეთ. ყველანაირად უკეთაა. როგორც ადამიანი, არ შეცვლილა: ფეხბურთელებს პატივისცემით ეპყრობა და რასაც ფიქრობს, პირდაპირ ამბობს. რაც შეეხება სამწვრთნელო საქმიანობას - აშკარად პროგრესირებს. რასაც "სამპდორიას" მერე კიდევ უფრო დაბრძენებულია.

მე იმ ტაქტიკური სქემებით ვმსჯელობ, რასაც გვთავაზობს და რაზეც გვავარჯიშებს. სინიშა მეტოქეებს ახლა კიდევ უფრო დეტალურად აანალიზებს და ყოველთვის ზუსტ დასკვნებს დებს. მთავარია, ჩვენ, ფეხბურთელებმა შევასრულოთ მისი დავალებები ზუსტად. მიხაილოვიჩს იგივე პრინციპები აქვს, მაგრამ სხვა კაცია - დაბრძენდა.

- "რომაში" რატომ არ დარჩით?
- რომიდან წამოსვლას რამდენიმე მიზეზი ჰქონდა. დეტალებზე ვერაფერს გეტყვით. შევთანხმდით, რომ უმჯობესი იქნებოდა, ჩვენი გზები გაყოფილიყო.

- "მილანში" ადაპტაციის პროცესი როგორ მიდის?
- ადვილად. სიმართლე გითხრათ, მეგონა, რომ უფრო გამიჭირდებოდა. "მილანში" შესანიშნავი კოლექტივია, ბიჭები თავმდაბლები და მეგობრულები არიან.

- ახალგაზრდა მცველებს საერთოდ გამოცდილ მეწყვილეებთან ერთად უყვართ თამაში, თქვენი მეწყვილე კი "მილანის" დაცვის ცენტრშია ელია.
- ჰო, მაგრამ როდრიგო ხომ ჩემზე უფროსია... (იცინის) სულ რაღაც ორი წლით. მშვენიერი ფეხბურთელია, არ გაგვიჭირდება.

- პირადად თქვენ რა მხრივ უნდა გააუმჯობესოთ თქვენი თამაში?
- პირველ რიგში ფიზიკურ კონდიციებზე მაქვს სამუშაო. გარდა ამისა, უნდა ვისწავლო მოედანზე გაძლება, ნერვებმა რომ არ მიმტყუნოს და შემოქმედებით ფეხბურთს უნდა მივეჩვიო. დრო საკმარისზე მეტი მაქვს, პროგრესი 35-36 წლამდე არ უნდა შევწყვიტო.

- "ფლორენციაში" საშინელი სტარტი აიღეთ - პირველივე ტურში წაგება ცუდი ამბავია...
- ვიცოდით, რომ ეს არ იქნებოდა იოლი გასეირნება. მართალია, პირადად არ მინახავს "ფიორენტინას" ამხანაგური მატჩები, მაგრამ ვიცოდი, რომ ფლორენციელებმა "ჩელსისთან" და "ბარსელონასთან" კარგად ითამაშეს.

- "მილანმა" თქვენს სანაცვლოდ 25 მილიონი ევრო გადაიხადა. ეს წნეხსაც ნიშნავს.
- არა, წნეხის ქვეშ არ ვგრძნობ თავს. უბრალოდ, ეს დამატებითი პასუხისმგებლობაა, რომელსაც არ გავურბივარ. სატრანსფერო თანხის გამო პრობლემას ვერ ვხედავ. მხოლოდ იმაზე ვფიქრობ, რომ იმედები გავამართლო. მინდა, რომ "მილანში" დიდხანს თამაში დავიმსახურო.

- პასუხისმგებლობას მე-13 ნომერიც გმატებთ?
- არა, თუმცა როგორც კი "მილანში" გადმოვედი, მაშინვე ვითხოვე, იქნებ, 13 ნომერი მომცეთ-მეთქი - იმიტომ, რომ ალესანდრო ნესტა ჩემი კერპია. მე მხოლოდ მასზე ვფიქრობდი და არა დამატებით პასუხისმგებლობაზე.

- ბერლუსკონი უკვე გაიცანით?
- კი. "პერუჯასთან" მატჩის წინ გვერდით ჩამიარა, ხელი ჩამომართვა და წარმატებები მისურვა.

- ცენტრალური მცველის ამპლუა თავად აირჩიეთ, თუ ძალით დაგაყენეს დაცვის ცენტრში?
- ბავშვობაში ნახევარმცველობა მინდოდა. ბურთის კონტროლი მომწონდა. ზინედინ ზიდანზე ვგიჟდებოდი - ზიზუ ბურთს უნიკალურად ამუშავებდა, მე კი მის თამაშზე ვგიჟდებოდი. დაცვაში "რომას" პრიმავერაში თამაშისას გადამიყვანეს. იმიტომ, რომ მაღალი ვარ.

- 1982 წელს იტალია მსოფლიოს ჩემპიონი გახდა, ფინალში ცაცია მცველმა კაბრინიმ პენალტი ვერ გაიტანა. 2006-ში იტალია ისევ გახდა მსოფლიოს ჩემპიონი და ამჯერად ცაცია მცველის, გროსოს გადამწყვეტი პენალტით. თქვენ როგორ ურტყამთ თერთმეტმეტრიანებს?
- ბავშვობაში ვურტყამდი ხოლმე და სულ გამქონდა...

- დაგვისახელეთ სამი ეპითეტი, რომლებითაც მიხაილოვიჩს დაახასიათებთ.
- პირდაპირი, პატიოსანი, ამბიციური.

- ახლა კი სამი ეპითეტი, რომლებითაც საკუთარ თავს დაახასიათებთ.
- ახალგაზრდა, ცივსისხლიანი, ცაცია.

- თქვენ ზდენეკ ზემანის მეთაურობით გქონდათ დებიუტი, მერე კი მიხალოვიჩის შეგირდი იყავით და ეს ორი სპეციალისტი ერთმანეთისგან რადიკალურად განსხვავდებიან. მიუხედავად ამისა, ორივე თქვენზე ჩამოვიდა ფსონს. როგორ ფიქრობთ, რატომ?
- ზემანი ახალგაზრდა ფეხბურთელებს ყოველთვის დიდ დროს უთმობდა. ალბათ ჩემში პოტენციალი დაინახა. მიხაილოვიჩს კი ისე მოვწონვარ, რომ "მილანში" წამომიყვანა. ერთი ტექსტური შეტყობინებაც კი საკმარისი გამოდგა იმისათვის, რომ "მილანში" გადმოსვლას დავთანხმებოდი.

- გარსიას "რომას" ძირითად შემადგენლობაში თამაშის გარანტია რომ მოეცა, დედაქალაქში დარჩებოდით?
- არა მგონია. თანაც, დაპირება არაფერს ნიშნავს. მთავარი საქმეა.

- სოციალური ქსელებით სარგებლობთ?
- იშვიათად. უფრო მეტს ვკითხულობ, თავად კი ცოტას ვწერ.

- როგორი იქნებოდა თქვენი პოსტი "მილანის" ფანებისთვის მისასალმებლად?
- ბედნიერი ვარ, რომ მსოფლიოს ერთ-ერთ ყველაზე ტიტულოვან კლუბში მოვხვდი.

- 20 წლის ასაკში ასეთი პროგრესი იშვიათია. ხომ არ ფიქრობთ, რომ ასეთი ტრამპლინი ნაადრევი იყო? ნესტა "მილანში" რომ გადმოვიდა, 26 წლის იყო. ტიაგო სილვა - 25-ის...
- პროგრესი და ტრამპლინი ასაკიდან არ გამომდინარეობს. ასეთი რამ მაშინ ხდება, როცა საჭიროა. კარგმა ფეხბურთელმა თავისი შესაძლებლობები უშიშრად უნდა წარმოაჩინოს. მე ზუსტად ვიცი, რომ გულშემატკივრები ჩემგან ძალიან ბევრს ელიან.

- იტალიის ჩემპიონატში მესამე ადგილზე გასვლას დათანხმდებოდით?
- ვნახოთ, რა და როგორ იქნება. უმჯობესია, ამ თემას იანვარში დავუბრუნდეთ. შეზღუდვები არ მიყვარს - იქნებ მეტიც შევძლოთ?

- ბევრი ამბობს, რომანიოლის რუგანი ჯობიაო...
- მიუხედავად იმისა, რომ ისიც ცენტრალური მცველია და მეც, ჩვენ ერთმანეთისგან განვსხვავდებით. ვინ ჯობია - ეს თქვენ გადაწყვიტეთ...

- მაგრამ "იუვე" ხომ ჯობია "მილანს"?
- "იუვეს" თავისი ხიბლი და უპირატესობები აქვს - შემთხვევითი არაა, ტურინელები ზედიზედ ოთხჯერ რომ გახდნენ ჩემპიონები. მიუხედავად იმისა, რომ პირლო, ტევესი და ვიდალი წავიდნენ, "იუვენტუსი" ერთი ნაბიჯით წინაა და ერთი თავით მაღლა დგას. "იუვე" ახლაც პოულპოზიციაზეა, მერე მოვდივართ "მილანი", "რომა", "ინტერი", "ნაპოლი", "ლაციო" და "ფიორენტინა".

- ეთანხმებით იმ მოსაზრებას, რომ იგებს ის, ვინც ნაკლებ გოლს უშვებს?
- ჰო, მაგრამ გოლების გატანაც საჭიროა. წინააღმდეგ შემთხვევაში 0:0 დაფიქსირდება, ასეთი ანგარიშით კი ცხრილში ბევრ ქულას არავინ დაგიწერს. საიდუმლო იმაშია, რომ გუნდი ყველა რგოლში ძლიერი უნდა იყოს. ვფიქრობ, რომ "მილანი" კარგადაა დაკომპლექტებული.

- თქვენი აზრით, ვინ არის დღეს იტალიის ჩემპიონატის საუკეთესო თავდამსხმელი?
- გონსალო იგუაინი. საინტერესო იქნება ედინ ჯეკოს წინააღმდეგ თამაშიც.

- ანტონიო კონტესთან კავშირი გაქვთ?
- კონტე მიცნობს და იცის, რაც შემიძლია, მაგრამ ახლა მხოლოდ ახალგაზრდულ ნაკრებზე ვფიქრობ. თუმცა, რა თქმა უნდა, მთავარ ნაკრებში თამაშზე ვოცნებობ.

- თავისუფალ დროს რას აკეთებთ?
- მეგობრებთან ერთად რესტორნებში დავდივარ. გურმანი ვარ, გემრიელი კერძები ძალიან მიყვარს. უფრო ჩვენი, იტალიური. აი, სუში და ეგეთები არ მიყვარს.

დოსიე
ალესიო რომანიოლი
დაიბადა: 1995 წ. ანციო
ამპლუა: მცველი
კარიერა: რომა - 2012-15; სამპდორია - 2014-15 (იჯარა).

ყოველდღიური სპორტული გაზეთი "ლელო"