კონტე მხოლოდ 46 წლისაა და არაერთხელ განაცხადა, რომ ამ ასაკში, ეროვნულ ნაკრებში მუშაობა მისთვის ძალიან რთული გამოდგა. ანტონიოს საკლუბო ფეხბურთში სურდა დაბრუნება და ცდუნებას ვერ გაუძლო - მომდევნო სეზონიდან, იტალიელი სპეციალიოსტი პრემიერლიგაში იმუშავებს.
მწვრთნელთა თანავარსკვლავედი პრემიერლიგაში
ანტონიო კონტე "ჩელსის" ჩაუდგება სათავეში და სავარაუდოდ, რომან აბრამოვიჩს კოლოსალურ თანხებს დაახარჯინებს სატრანსფერო ბაზარზე. პეპ გვარდიოლა "მანჩესტერ სიტის" გაწვრთნის და არც ის დაინდობს კლუბის მესვეურთა ამბობენ, რომ "მანჩესტერ იუნაიტედს" ჟოზე მოურინიო ჩაიბარებს და ისიც რომ გაშლის ხელს სატრანსფერო ბაზარზე, ცხადზე უცხადესია. აგერ "ნიუკასლს" რაფაელ ბენიტესი ჩაუდგა სათავეში და აცხადებს, რომ ზაფხულში გუნდს სერიოზული გაძლიერება სჭირდება.
არც იურგენ კლოპი უნდა დავივიწყოთ, რომელსაც "ლივერპოულში" ჯერ არ მისცემია სატრანსფერო ფანჯრის თავის გემოზე გამოყენების საშუალება და ამას ზაფხულში აპირებს.
მომდევნო სეზონიდან, ინგლისურ კლუბებს სატელევიზიო ტრანსლირებიდან გაცილებით დიდი თანხები შეუვათ და ტრანსფერების ფულიც იქნება - მოკლედ, დიდი მწვრთნელები დიდ შოპინგს მოიწყობენ და შეეცდებიან, რომ მიაღწონ იმას, რასაც კლაუდიო რანიერი პრაქტიკულად უდანახარჯოთ და სატრანსფერო ბიუჯეტის გარეშე აკეთებს. ამ თემაზე, საინტერესოდ ისაუბრა ლეგენდარულმა იტალიელმა მწვრთნელმა ჯოვანი ტრაპატონიმ:
"ანტონიო კონტეც ინგლისში მიდის და მე მესმის მისი, რადგან იქ დიდი მწვრთნელები შეიკრიბებიან და სპორტული მოტივაციაც არნახული იქნება. ასეთი გამოწვევის მიღება ნებისმიერი მწვრთნელის ოცნებაა და თანაც, კონტე ჯერ ახალგაზრდაა იმისთვის, რომ ეროვნულ ნაკრებში იმუშაოს.
მომდევნო ზაფხულს, პრემიერლიგის გრანდები კოლოსალურ თანხებს დახარჯავენ ტრანსფერებში, რაც დიდი შეცდომა მგონია - სჯობს, გაიარონ კონსულტაცია კლაუდიო რანიერისთან და გაიგონ, თუ როგორ უნდა ჩემპიონატის მოგება ვარსკვლავების გარეშე".
ფავორიტი დონადონია
ვინ შეცვლის იტაილის ნაკრებში ანტონიო კონტეს? - თუ "გაძეტა დელო სპორტს" ვენდობით, ფავორიტი კანდიდატი რობერტო დონადონია. ასევე ახალგაზრდა, 52 წლის სპეციალისტი, მაგრამ კონტესგან განსხვავებით, მასზე ევროპული ფეხბურთის გრანდები არ ნადირობენ და შესაბამისად, ფედერკაკლჩოს შეთავაზებაზე უარის თქმა გაუჭირდება.დონადონი "ბოლონიას" მთავარი მწვრთნელია და თავის საქმეს შესანიშნავად აკეთებს. როდესაც "როსობლუში" დაინიშნა, გუნდი ღრმა კრიზისში იყო და სერია B-ში დაქვეითების ყველაზე რეალური კანდიდატი გახლდათ, თუმცა ახალ მწვრთნელთან ერთად, "ბოლონია" გარდაისახა, თამაშების უმეტესობა მოიგო და სატურნირო ცხრილის ზედა ნაწილში აინაცვლა.
დიახ, "როსობლუ" დღეს მე-9 ადგილზეა და პირველ რიგში, ეს სწორედ დონადონის დამსახურებაა.
აქვე ვთქვათ, რომ დონადონი 2006-2008 წლებში უკვე მუშაობდა იტალიის ნაკრებში, გუნდი ევროპის ჩემპიონატზე გაიყვანა, იქ კი მეოთხედფინალში ესპანეთთან დამარცხდა, თუმცა მხოლოდ თერთმეტმეტრიანების სერიაში.
იმ ესპანეთმა ჩემპიონატი მოიგო და შემდეგ, კიდევ ორ დიდ საფეხბურთო ფორუმზე იპირველა. მოკლედ, დონადონის კვალიფიკაცია არ დაეწუნება, დანარჩენს კი დრო გვიჩვენებს. თავად მწვრთნელი არ მალავს, რომ მისთვის იტალიის ნაკრებში დაბრუნება დიდი გამოწვევა იქნება:
"დღეს, "ბოლონიას" მწვრთნელი ვარ და მხოლოდ ამ გუნდზე ვარ ორიენტირებული, თუმცა რა იქნება ხვალ, რთული სათქმელია.Aარ დავმაკლავ, რომ "სკუადრა აურაში" დაბვრუნების პერსპექტივა მხიბლავს და წინადადებას სიამოვნებით განვიხილავდი. 2008 წლის ევოპის ჩემპიონატზე, ძლიერი გუნდი გვყავდა და მხოლოდ თერთმეტმეტრიანების სერიაში დავმარცხდით. მას შემდეგ, მეც დიდი სამწვრთნელო გამოცდილება მივიღე და დღეს, გაცილებით თავდაჯერებული ვარ".
კაპელო: არასდროს თქვა, არადროს!
იტალიის ეროვნული ნაკრების მთავარი მწვრთნელობის ერთ-ერთ კანდიდატად ფაბიო კაპელო განიხილება, რომელიც ბოლოს რუსეთის ნაკრებს ედგა სათავეში, დღეს კი სპორტული კომენტატორია. ამ თემაზე თავად მწვრთნელმა ისაუბრა:"რუსეთიდან წამოსვლის შემდეგ, საფეხბურთო კომენტატორად დავიწყე მუშაობა და ახალი საქმე ძალიან მომწონს. მწვრთნელობა უდიდესი წნეხი და პასუხისმგებლობაა, ტელევიზიაში კი ეს წნეხი მომეხსნა და თავს იდეალურად ვგრძნობ.
სიმართლე გითხრათ, უამრავი წინადადება მივიღე დაწყებული ევროპული კლუბებიდან, დამთავრებული არაბული ქვეყნებით, მაგრამ თითოეულ მათგანზე უარი ვთქვი და მსურს კომენტატირის ამპლუაში დავრჩე. თუმცა, იტალიის ნაკრები სულ სხვა გამოწვევაა და ამ ეტაპზე, ჩემი პოზიციის დაფიქსირებისგან თავს შევიკავებ. როდესაც "სკუადრა აძურაზე" მეკითხებიან, ყოველთვის ასე ვპასუხობ: არასდროს თქვა, არასდროს!"
ვინ არის საუკეთესო?
დავუბრუნდეთ ჯოვანი ტრაპატონის, რომელსაც ერთი შეხედვით მარტივი, მაგრამ ავადროულად, რთული კითხვა დაუსვეს: ვინ არის დღეს საუკეთესო იტალიელი მწვრთნელი? - აქვე პასუხი:"რამდენიმე სპეციალისტი უნდა გამოვარჩიოთ, მათ შორის კარლო ანჩელოტი, მასიმილიანო ალეგრი და ანტონიო კონტე. რა თქმა უნდა, არ უნდა დავივიწყოთ კლაუდიო რანიერი, რომელიც ინგლისში სასწაულებს სჩადის. ასევე, ძალიან მომწონს ლუჩანო სპალეტი, რომლის ხელშიც "რომა" გარდაისახა.
შესანიშნავად მუშაობს მაურიციო სარი და ასევე, დიდ პატივს ვცემ პრემიერლიგაში წასულ ფრანჩესკო გვიდოლინს. თითოეულ მათგანს დავასახელებდი საუკეთესოდ, მაგრამ დღეს, კონკრეტულად ამ მომენტში, საუკეთესო მაინც რანიერია. "ლესტერს" ძალიან ვგულშემატკივრობ და თუ ეს გუნდი გაჩემპიონდა, ეს იქნება 21- საუკუნის ყველაზე დიდი საფეხბურთო სენსაცია".
ყოველდღიური სპორტული გაზეთი "ლელო"
