იტალიურ ფეხბურთში რომ ფინანსური პრობლემებია, ეს ცხადია, მაგრამ თუ "გაძეტა დელო სპორტში" გამოქვეყნებულ ფინანსურ-სტატისტიკურ ანალიზს დავეყრდნობით, ვითარება უკეთესობისკენ იცვლება. თუ ტენდენცია შენარჩუნდა და პროგრესი გაგრძელდა, იტალიური საკლუბო ფეხბურთი აუცილებლად დაადგება პროგრესის გზას. თუ რას ვგულისხმობთ, ამას ქვემოთ შეიტყობთ:
გაზრდილი სახელფასო ბიუჯეტი
2011-12 წლების სეზონში, სერია A-ს კლუბების საერთო სახელფასო ხარჯი 1,1 მილიარდი ევრო იყო, რაც იტალიური საკლუბო ფეხბურთის რეკორდია. ამის შემდეგ დაიწყო ეკონომიკური კრიზისი და სახელფასო ბიუჯეტიც შემცირდა - მაგალითად, 2012-13 წლების სეზონში 1,03 მილიარდი ევრო იყო, მომდევნო სეზონში კი თანხა გასულ სეზონში სერია A-ს კლუბებმა ხელფასებში 882 მილიონი ევრო დახარჯეს, რაც პირველი ნიშანი იყო, რომ იტალიურმა ფეხბურთმა ყველაზე ცუდი უკან მოიტოვა და აღმავლობა დაიწყო. მიმდინარე სეზონში თანხამ 927 მილიონი ევრო შეადგინა, რაც უკვე აშკარა პროგრესია. მართალია, სარეკორდო 1,1 მილიარდ ევრომდე ბევრი უკლია, მაგრამ მთავარია, რომ ყინული დაიძრა და კლუბების ფინანსური მდგომარეობა უკეთესობისკენ იცვლება.
"იუვე" ყველაზე მეტს იხდის
სერია A-ს კლუბებიდან ხელფასებში ყველაზე მეტს "იუვენტუსი" იხდის და ეს ალბათ არავისთვისაა გასაკვირი. ტურინული გრანდის სახელფასო ბიუჯეტი 145 მილიონი ევროა. შემდეგ მოდის "ინტერი", რომელიც 120 მილიონ ევროს ხარჯავს, მესამე ადგილზე კი "რომაა", რომელიც წელიწადში ფეხბურთელების ხელფასებში 92 მილიონ ევროს ხარჯავს. მეოთხე ადგილზე "მილანია", ხუთეულს კი "ნაპოლი" აგვირგვინებს. მოდით, გავეცნოთ სრულ სტატისტიკას...1. იუვენტუსი 145 მლნ
2. ინტერი 120 მლნ
3. რომა 92 მლნ
4. მილანი 80 მლნ
5. ნაპოლი 75 მლნ
6. ლაციო 55 მლნ
7. ფიორენტინა 44 მლნ
8. სამპდორია 35 მლნ
9. ბოლონია 34 მლნ
10. ტორინო 32 მლნ
11. ჯენოა 30 მლნ
12. სასუოლო 28 მლნ
13. უდინეზე 28 მლნ
14. ატალანტა 24 მლნ
15. კალიარი 21 მლნ
16. პალერმო 20 მლნ
17. კიევო 18 მლნ
18. პესკარა 16.5 მლნ
19. ემპოლი 15.5 მლნ
20. კროტონე 14 მლნ
იგუაინი სათავეში
როგორც აღვნიშნეთ, "იუვენტუსი" ყველაზე მეტ ფულს ხარჯავს ხელფასებში, გონსალო იგუაინი კი ყველაზე მდიდარი ფეხბურთელია. 28 წლის არგენტინელი ფორვარდი სეზონში 7,5 მილიონ ევროს გამოიმუშავებს. ტურინულ გრანდში იგუაინის შემდეგ მირალემ პიანიჩი მოდის, რომლის წლიური გასამრჯელო 4,5 მილიონი ევროა. შემდეგ მოდიან სამი ხედირა და ჯანლუიჯი ბუფონი, რომლებიც სეზონში 4 მილიონ ევროს გამოიმუშავებენ. მხოლოდ ამათ შემდეგ დგანან ძირძველი ტურინელები: ჯორჯო კიელინი, ლეონარდო ბონუჩი და კლაუდიო მარკიზიო, რომელთა ჯამაგირი 3,5 მილიონ ევროს შეადგენს. ასეთივე ოდენობის ხელფასი აქვთ მარიო მანჯუკიჩს და დანი ალვეშს.
ბოლო ცნობებით, "იუვეს" მესვეურები ბონუჩისთვის ახალ კონტრაქტს ამზადებენ, რის შემდეგაც ლეონარდო წელიწადში 5 მილიონ ევროს მიიღებს და იგუაინის შემდეგ ყველაზე ძვირად ღირებული "იუვენტინო" გახდება. აქვე ვთქვათ, რომ იგუაინი არა მარტო "იუვენტუსშია" ყველაზე მაღალანაზღაურებადი ფეხბურთელი, არამედ მთელ სერია A-ში.
მაინც უკმაყოფილო იკარდი
"ინტერში" ყველაზე მაღალანაზღაურებადი ფეხბურთელი მაურო იკარდია, რომელიც სეზონში 3,6 მილიონ ევროს გამოიმუშავებს. მიუხედავად ამისა, ის უკმაყოფილოა თავისი ხელფასით და მთელი ზაფხულის განმავლობაში ამ თემით აქტიურად სპეკულირებდა. მაუროს ცოლი და პირადი აგენტი ვანდა არ მალავს, რომ მისი სურვილია, იკარდიმ წელიწადში 5 მილიონი ევრო მიიღოს, რის გამოც აქტიურ მოლაპარაკებებს აწარმოებდა "ნაპოლის" და პრემიერლიგის რამდენიმე კლუბის მესვეურებთან. საბოლოოდ, იკარდი "ინტერში" დარჩა და ვნახოთ, რა გაგრძელება ექნება ამ ისტორიას.
იკარდის შემდეგ "ინტერში" ყველაზე მეტს კონდოგბია და იოვეტიჩი იღებენ, რომელთა გასამრჯელო 3.5 მილიონი ევროა. არადა, იოვეტიჩს "ნერაძურის" ახალი მწვრთნელი ფრანკ დე ბური არ ენდობა და ის ევროპალიგის განაცხადშიც კი არ შეიყვანა. დიდია შანსი, ზამთრის სატრანსფერო პერიოდში იოვეტიჩმა "ინტერი" დატოვოს და მილანური გრანდის მესვეურებმა საბიუჯეტო ხარჯი შეიმსუბუქონ.
აღსანიშნავია, რომ თანამედროვეობის ერთ-ერთი საუკეთესო მეკარე სამირ ჰანდანოვიჩი მხოლოდ 2.5 მილიონ ევროს გამოიმუშავებს და მასაც არაერთხელ უწინასწარმეტყველეს სხვა გუნდში გადაბარგება.
იგუაინის შემდეგ დე როსი
გონსალო იგუაინის შემდეგ სერია A-ს ყველაზე მაღალანაზღაურებადი ფეხბურთელი დანიელე დე როსია. 33 წლის ნახევარმცველი წელიწადში 6.5 მილიონ ევროს გამოიმუშავებს. საგულისხმოა, რომ "რომას" მთავარმა მწვრთნელმა ლუჩანო სპალეტიმ დე როსის კაპიტნის სამკლავური ჩამოართვა და ალესანდრო ფლორენცის გადასცა. თუ დე როსის ახალი კონტრაქტი შესთავაზეს, ასაკის გათვალისწინებით, ალბათ, გაცილებით დაბალ ხელფასს მიიღებს."რომაში" ასევე დიდი ხელფასი აქვს ედინ ჯეკო, რომელიც 4,5 მილიონ ევროს იღებს, შემდეგ კი მოჰამედ სალაჰი მოდის 3.5-მილიონიანი ჰონორარით. რაჯა ნაინგოლანის გასამრჯელო 3.2 მილიონი ევროა, ხუთეულს კი კევინ სტროტმანი აგვირგვინებს 2,8-მილიონიანი შემოსავლით.
ბაკა და ჰამშიკი სათავეში
მარეკ ჰამშიკი და კარლოს ბაკა წელიწადში 3.5 მილიონ ევროს იღებენ და თავიანთ გუნდებში ყველაზე მაღალანაზღაურებადი ფეხბურთელები არიან. "ნაპოლიში" ჰამშიკს კალეხონი მოჰყვება, რომელსაც 3 მილიონი ევრო აქვს, მილიკი და რეინა კი 2.5 მილიონს იღებენ. გონსალო იგუაინის გაშვების შემდეგ ნეაპოლური კლუბის მესვეურებმა სახელფასო ბიუჯეტი შეიმცირეს.ბაკას შემდეგ "მილანში" ყველაზე მეტ ხელფასს ლუის ადრიანო იღებს, რომლის გასამრჯელო 3 მილიონი ევროა და მიუხედავად ამისა, დროის დიდ ნაწილს სათადარიგოთა სკამზე ატარებს. 2.5 მილიონი ევრო აქვთ რიკარდო მონტოლივოს და კეისუკე ჰონდას, ხუთეულს კი ინაციო აბატე აგვირგვინებს 2.3-მილიონიანი შემოსავლით.
ყველაზე ღარიბები
ყველაზე ღარიბი კლუბი "კროტონეა", რომლის სახელფასო ბიუჯეტი 14 მილიონი ევროთი განისაზღვრება, ყველაზე დაბალანაზღაურებადი ფეხბურთელი კი "სამპდორიას" ჰყავს. გენუური გუნდის შემადგენლობაში ლიტველი მეკარე ტიტას კრაპიკასი ირიცხება, რომელიც წელიწადში 18 000 ევროს იღებს, რაც თვეში მხოლოდ 1 500 ევროა.უკვე წლებია, სერია A-ს ერთ-ერთი ყველაზე ღარიბი კლუბი "ემპოლია", რომელიც ხელფასებში მხოლოდ 15.5 მილიონ ევროს ხარჯავს. ტოსკანურ გუნდში ყველაზე მაღალანაზღაურებადი ფეხბურთელი რიკარდო საპონარაა, რომელიც 900 000 ევროს იღებს წელიწადში, ყველაზე დაბალანაზღაურებადი კი - ქართველი რომან ჭანტურია, რომელიც 60 000 ევროს გამოიმუშავებს. მართალია, ჭანტურია იჯარით უნგრულ "ჰონვედში" გადავიდა, თუმცა, როგორც ჩანს, ხელფასს იტალიური კლუბისგან მიიღებს.
უკონკურენტო ალეგრი
სერია A-ს ყველაზე მაღალანაზღაურებადი მწვრთნელი მასიმილიანო ალეგრია, რომელიც წელიწადში 5 მილიონ ევროს იღებს. "იუვენტუსის" მწვრთნელის შემდეგ ყველაზე მეტს ლუჩანო სპალეტი შოულობს, რომლის ხელფასი 3 მილიონი ევროა. შემდეგ მოდის "ინტერის" დამრიგებელი ფრანგ დე ბური 2.5-მილიონიანი შემოსავლით. "მილანის" მწვრთნელ ვინჩენცო მონტელას 2.2-მილიონიანი ხელფასი აქვს, შემდეგ კი სინიშა მიხაილოვიჩი და პაულო სოუზა მოდიან, რომლებიც, შესაბამისად, "ტორინოსა" და "ფიორენტინაში" 1.5 მილიონ ევროს გამოიმუშავებენ.
მდიდრების სიმბოლური გუნდი
ბუფონი (იუვენტუსი, 4 მლნ) - დანი ალვეში (იუვენტუსი, 3.5 მლნ), ბონუჩი (იუვენტუსი, 3.5 მლნ), კიელინი (იუვენტუსი, 3.5 მლნ), ალექს სანდრო (იუვენტუსი, 3.5 მლნ) - პიანიჩი (იუვენტუსი, 4.5 მლნ), დე როსი (რომა, 6.5 მლნ), ხედირა (იუვენტუსი, 4 მლნ) - იკარდი (ინტერი, 3.6 მლნ), ჯეკო (რომა, 4.5 მლნ), იგუაინი (იუვენტუსი, 7.5 მლნ).
ყოველდღიური სპორტული გაზეთი "ლელო"
