საფრანგეთის თასზე მორიგი სენსაცია დაფიქსირდა და ამჯერად ტურნირს "პარი სენ ჟერმენი" დაემშვიდობა. პარიზელები ლიგა 1-ის ერთ-ერთ აუტსაიდერ "ევიანთან", რა თქმა უნდა, ფავორიტებად მიიჩნეოდნენ და კარლო ანჩელოტის შეგირდებმა სტატუსის გამართლება თავიდანვე დაიწყეს - მატჩის მეცხრე წუთზე ხავიერ პასტორემ კრისტოფ ჟალეს გადაცემით ისარგებლა და ანგარიში გახსნა. საინტერესოა, რომ საგოლე შეტევა დევიდ ბექჰემის შესანიშნავი გადაცემით დაიწყო. ამის შემდეგ სტუმრებს ანგარიშის გაზრდის შანსები ჰქონდათ, მაგრამ ტიაგო სილვამ და ალექსმა ვერ ივარგეს; მასპინძლებისგან კი ყველაზე სახიფათო საბერ ხელიფა იყო, თუმცა ტუნისელს პირველ ტაიმში არ გაუმართლა.
120 წუთი ფრედ დასრულდა და დაინიშნა პენალტების სერია, რომელიც გაცილებით უკეთ მასპინძლებმა შეასრულეს. "პარი სენ ჟერმენის" მხრიდან 11-მეტრიანი ზლატან იბრაჰიმოვიჩმა (მეკარე ბერტრან ლაკემ აუღო) და ტიაგო სილვამ (ხარიხა) ვერ გამოიყენეს. საბოლოოდ, 4:1 პენალტების სერიაში და 1/2-ფინალში "ევიანი" გავიდა.
აღსანიშნავია, რომ პსჟ-მ ლიგის თასზეც 11-მეტრიანების სერიაში წააგო ("სენტ ეტიენთან"), ხოლო თუ ამას დავამატებთ იმ ფაქტს, რომ ჩემპიონთა ლიგაში პარიზელები "ბარსელონასთან" არ დამარცხებულან (2:2 შინ და 1:1 გასვლაზე), აღმოვაჩენთ, რომ სამივე სათასო ტურნირიდან კარლო ანჩელოტის გუნდი ისე გავარდა, რომ ძირითად დროში თამაში არ წაუგია.
სხვათა შორის, "ევიანთან" გამართული მატჩი პსჟ-ის ისტორიაში თასზე ჩატარებული მე-200 შეხვედრა იყო. კარლო ანჩელოტი კი მატჩის შემდეგ ძალიან უკმაყოფილო იყო:
"ძალიან გაბრაზებული ვარ. თამაში შეიძლება წააგო, მაგრამ ჩვენ დღეს არ გვიბრძოლია. ზოგიერთი ფეხბურთელი მხოლოდ საკუთარი თავისთვის თამაშობდა და არა გუნდისთვის. ბურთს ძალიან იოლად ვკარგავდით და ბევრ არაზუსტ გადაცემას ვაკეთებდით. დღეს ჩვენ ნამდვილი კატასტროფა შეგვემთხვა და ჩემი აზრით, ეს იყო სეზონის ყველაზე ცუდი მატჩი," - განაცხადა იტალიელმა.
მეორე მეოთხედფინალში ლიგა 2-ის "ლანსი" "ბორდოს" მასპინძლობდა და თავიდან უგებდა კიდეც, თუმცა გრეგორი სერტიჩმა და შეიკ დიაბატემ (დუბლი) ყველაფერი თავის ადგილზე დააყენეს. საბოლოოდ, ფრანსის ჟიოს ამჟამინდელმა გუნდმა მისი ყოფილი კლუბი დაამარცხა და თასის მომდევნო ეტაპზე გავიდა.
თამაშების დასრულების შემდეგ ნახევარფინალის კენჭისყრა გაიმართა. მატჩები 7 მაისს გაიმართება, გუნდები კი ასე დაწყვილდნენ:
"ტრუა"-"ბორდო", "ევიანი"-"ლორიანი".
აქვე ვთქვათ, რომ შემორჩენილ გუნდთაგან თასი "ბორდოს" (3-ჯერ, ბოლოს 1987 წელს) და "ლორიანს" (2002 წელს) აქვთ მოგებული. "ტრუა" ერთხელ იყო ფინალში (1956 წელს), "ევიანს" კი ფინალში არასდროს უთამაშია.
საფრანგეთის თასი. 1/4-ფინალი
ლანსი-ბორდო 2:3
გოლები: 1:0 კარასო (11-საკ. კარში), 1:1 სერტიჩი (59), 1:2 დიაბატე (81), 1:3 დიაბატე (85), 2:3 ბერგდიხი (90).
ევიანი-პსჟ 1:1 პენ. 4:1
გოლები: 0:1 პასტორე (9), 1:1 ხელიფა (44).
გაძევება: ტიაგო მოტა (118. პარი სენ ჟერმენი).
პენალტების სერია: 1:0 სორლენი, 1:0 იბრაჰიმოვიჩი (მეკარე), 2:0 საგბო, 2:0 ტიაგო სილვა (ხარიხა), 3:0 ხელიფა, 3:1 ლავეცი, 4:1 ბარბოსა.
ყოველდღიური სპორტული გაზეთი "ლელო"
ასევე იხილეთ:
"სენტ ეტიენის" წლის პირველი მარცხი
