ტალანტები ტალანტების ქვეყნიდან: ვინ არის ბრაზილიის მომავალი?

ფეხბურთზე შეშლილ ბრაზილიას არასოდეს აკლდა ტალანტები. დღეს "სელესაო" ვერ არის ისეთი ძლიერი, როგორიც უნდა იყოს, თუმცა ფეხბურთის ქვეყანაში ნიჭიერი მოთამაშეები კვლავ ბლომად არიან. დღევანდელი ჩვენი წერილი 10 ბრაზილიელ ტალანტს ეხება.

უოლასი
პროტოტიპი: ფერნანდინიო
პოზიცია: საყრდენი ნახევარმცველი
კლუბი: გრემიო
დაბადების თარიღი: 1995 წლის 4 აპრილი

უოლასი დიდებულია დაცვითი ფუნქციების შესრულების დროს. მისი სტიქიაა ბურთის მოპოვება და საკუთარი გუნდის იერიშების დაწყება. ის ყველაზე ხშირად იღებს ბურთს "გრემიოში" ვეტერან, 29 წლის მაიკონთან ერთად. ერთი თვის წინ, "სპორტთან" მატჩისას, მან ქუსლის შიდა ნაწილით დიდებული საგოლე პასი მისცა პედრო როშას, შეფასებების მიხედვით უოლასი ბრაზილიის ჩემპიონატის მეექვსე საყრდენია.

მარკოს გილერმე
პროტოტიპი: ვილიანი
პოზიცია: შემტევი ნახევარმცველი
კლუბი: ატლეტიკო პარანაენსე
დაბადების თარიღი: 1995 წლის 5 აგვისტო

სადებიუტო სეზონში მარკოს გილერმე "ატლეტკო პარანაენსეს" საუკეთესო ბომბარდირი გახდა 11 ბურთით. მან ბრაზილიის 20-წლამდელთა ნაკრების შემადგენლობაში სამხრეთ ამერიკის ჩემპიონატზე ითამაშა. იქ გუნდის გამორჩეული სნაიპერი გახდა 4 გოლით. საინტერესოა, რომ ჭაბუკი კლუბის შემადგენლობაში 100 ნომრიანი მაისურით თამაშობს.

ნათანი
პროტოტიპი: ოსკარი
პოზიცია: შემტევი ნახევარმცველი
კლუბი: ვიტესი
დაბადების თარიღი: 1996 წლის 13 მარტი

ორი წლის წინ, შემოდგომაზე, ნათანმა 5 გოლი გაიტანა იუნიორთა მსოფლიოს ჩემპიონატზე. გასულ გაზაფხულზე კი მან ბრაზილიის ჩემპიონატში პირველად ითამაშა "ატლეტიკო პარანაენსეში". ის 4,5 მილიონ ევროდ იყიდა "ჩელსიმ" და ერთი წლით "ვიტესში" გაანათხოვრა. დიდებულად ურტყამს ორივე ფეხით. ჰოლანდიაში მან უკვე სამი ბურთი შეაგდო - ერთი არნემული კლუბის ძირითადში, ორი კი - დუბლებში.

მარლონი
პროტოტიპი: ლუსიო
პოზიცია: ცენტრალური მცველი
კლუბი: ფლუმინენსე
დაბადების თარიღი: 1995 წლის 7 სექტემბერი

უკვ ერთი წელია, ის "ფლუმინენსესა" და ბრაზილიის ახალგაზრდული ნაკრების ძირითადი შემადგენლობის მცველია. არის ძალიან ელეგანტური და "სუფთა" მოთამაშე - პრაქტიკულად არ ჯარიმდება. თავიდან საყრდენი ნახევარმცველი იყო და ამპლუა მოგვიანებით შეიცვალა. ამბობენ, რომ მისი გადაბირება"ბარსელონას" სურს.

კლეიტინიო
პროტოტიპი: რობინიო
პოზიცია: თავდამსხმელი
კლუბი: ფიგეირენსე
დაბადების თარიღი: 1995 წლის 25 ოქტომბერი

ბრაზილიის ახალგაზრდული ნაკრების შეტევის ლიდერი ძალიან ეფექტურია. მას მინდვრის ცენტრშიც და ფლანგზეც უპრობლემოდ შეუძლია რამდენიმე მოწინააღმდეგის გაბითურება. მას ფრთაზეც შეუძლია თამაში და გამოკვეთილ ფორვარდადაც. გატანაზე მეტად შედეგიანი გადაცემების გაკეთება უყვარს.

დანილო ბარბოსა
პროტოტიპი: ლუის გუსტავო
პოზიცია: საყრდენი ნახევარმცველი
კლუბი: ვალენსია
დაბადების თარიღი: 1996 წლის 28 თებერვალი

ბრაზილიის სერია B-ში რამდენიმე შეხვედრა ჩაატარა და მერე პორტუგალიურ "ბრაგაში" გადაბარგდა. გუნდის მთავარმა მწვრთნელმა, სერჟიო კონსეისაომ ბარბოსა იმ პოზიციაზე დააყენა, სადაც ადრე გუნდის კაპიტანი, კუშტოდიუ თამაშობდა. "ვალენსიამ" ის 15 მილიონ ევროდ იყიდა. აქვს ძლიერი დარტყმა, დრიბლინგი და კარგი პასები.

გაბრიელი
პროტოტიპი: ნეიმარი
პოზიცია: შემტევი ნახევარმცველი
კლუბი: სანტოსი
დაბადების თარიღი: 1996 წლის 30 აგვისტო

უდიდეს ტალანტად და ნეიმარის მემკვიდრედ ითვლება. "სანტოსთან" ფეხბურთელის მიერ გაფორმებული კონტრაქტის პირობების თანახმად, გაბრიელის მსურველმა გუნდმა 50 მილიონი ევრო უნდა გადაიხადოს. ის "სანტოსის" საუკეთესო ბომბარდირი გახდა 21ბურთით, მანვე შეაგდო კლუბის ისტორიაში საიუბილეო, 12 000-ე გოლი.

მალკოლმი
პროტოტიპი: დუგლას კოშტა
პოზიცია: შემტევი ნახევარმხცელი
კლუბი: კორინთიანსი
დაბადების თარიღი: 1997 წლის 26 თებერვალი

"კორინთიანსის" მარცხენა გარემარბმა ევროპული სკაუტები ნახევარი წლის წინ დააინტერესა. მან ჯერ შესანიშნავად ითამაშა მსოფლიოს ახალგაზრდულ ჩემპიონატზე, მერე კი ბრაზილიის პირველობაზე შეაგდო გოლი და საგოლე გადაცემა უბოძა ვაგნერ ლავს. მალკოლმზე ძალიან ხშირად ჯარიმდებიან. მას აქვს ყველა საფეხბურთო პლუსი და უკვე მზადაა ევროპაში სათამაშოდ.

ჟერსონი
პროტოტიპი: რონალდინიო
პოზიცია: შემტევი ნახევარმცველი
კლუბი: ფლუმინენსე
დაბადების თარიღი: 1997 წლის 25 მაისი

ჟერსონი ჯერ "ბარსელონას" სამიზნე იყო, მერე კი "რომასი". ვალტერ საბატინიმ, რომაელთა სპორტულმა დირექტორმა მას ბრაზილიაში ჩააკითხა. თან "რომას" ათნომრიანი მაისურა ჩაუტანა, რომელსაც ფეხბურთელის გვარი ეწერა. "რომას" ქომაგები გაბრაზდნენ - მათ ჩათვალეს, რომ ამ ჟესტით "იმპერატორი", ფრანჩესკო ტოტი დამცირდა. საბატინიმ თავი იმით იმართლა, რომ მას ეს ხრიკი მოლაპარაკების წარმატებით დასრულებისათვის სჭირდებოდა. ჟერსონი, ვისაც ფანტასტიკური მარცხენა აქვს, ჯერ ისევ ბრაზილიაში თამაშობს. გადაწყვეტილია, რომ ზამთარში ის მაინც გადავა იტალიაში. 6 თვეს "ბოლონიაში" ითამაშებს და მერე "რომას" შეუერთდება.

კენედი
პროტოტიპი: რონალდო
პოზიცია: თავდამსხმელი
კლუბი: ჩელსი
დაბადების თარიღი: 1996 წლის 8 თებერვალი

მას სახელი ამერიკის პრეზიდენტის საპატივცემულოდ დაარქვეს. ასეთები ჩვენ უკვე გვახსოვს - ლინკოლნი "შალკედან", ჯეფერსონი "ალანიიდან", ნიქსონი "ფლამენგოდან"დაბრაზილიის ჩემპიონატის ორგზის ბომბარდირი ვაშინგტონი. კენედიმ, ვისაც დიდებული დარტყმა და დრიბლინგი აქვს, ორი წლის წინ გაიბრწყინა სამხრეთ ამერიკის ჩემპიონატზე მან 6 გოლი გაიტანა. ის ჯერ "ფლუმინენსეს" ძირითადში დამკვიდრდა, ზაფხულში კი 6,5 მილიონ გირვანქად გადავიდა "ჩელსიში".

ცოტა ხნის წინ პრემიერლიგაში მის დებიუტს მაღალი შეფასება მისცა ჟოზე მოურინიომ.

ყოველდღიური სპორტული გაზეთი "ლელო"