ფილიპ ლამი: პეპი სიტის ახალ დონეზე გაიყვანს!

ჯეიმი კარაგერი აქტიური საფეხბურთო კარიერის დასრულების შემდეგ ჟურნალისტობას მისდევს.

მისი ინტერვიუები ყოველთვის ერთი ამოსუნთქვით იკითხება. ამჯერად ინგლისელის რესპონდენტია გერმანული და მსოფლიო ფეხბურთის ლეგენდა, ფილიპ ლამი.

- თქვენ დღეს მსოფლიოს ერთ-ერთი საუკეთესო ფლანგელი მცველი ხართ. ასაკი არ გეტყობათ. და მაინც, ორ წელიწადში წასვლას აპირებთ. რატომ?
- დასასრული ყველაფერს აქვს. მე ამ დღისათვის ქვეცნობიერად ვემზადები. მე ვთქვი,რომ 2018 წელს დავასრულებდი კარიერას და ეს ასეც მოხდება. შენც 35 წლის იყავი, როცა წახვედი. სწორად არ მახსოვს?

- როგორ ფიქრობ, ფლანგელი მცველის პოზიციაზე მოთამაშე ფეხბურთელები

შეიცვალნენ?
- ცხოვრებაში ყველაფერი იცვლება და ასეა ფეხბურთშიც. შეხედე მინდორს. ნახავ, რომ ფლანგელი მცველი დღეს აღარ არის სპეციალიზებული მხოლოდ თავის ვიწრო სპეციალიზაციაზე.

- "ბაიერნის" თამაშებს დიდი ყურადღებით ვუყურებთ იმიტომ, რომ პეპ გვარდიოლა ინგლისში მოდის. ჩაბი ალონსოს ხშირად ვურეკავ - ხოლმე. პეპი ხშირად გიცვლის პოზიციას...
- მე ჩვენი გუნდის ყველა საიდუმლოს ვერ გავამხელ, მაგრამ პეპი დიდებული მწვრთნელია. მას ახალ დონეზე გაჰყავს გუნდი, ახალ სიჩქარეზე. მე ამ სეზონშიც ფლანგზეც ვთამაშობდი და ნახევარდაცვის ცენტრშიც. გააჩნია, ვინ იყო მოწინააღმდეგე და რა ტაქტიკას ვირჩევდით.

- პეპმა გიწოდა ყველაზე ინტელექტუალი ფეხბურთელი, ვისთანაც მას ოდესმე უმუშავია. მან თქვა, რომ ყველაზე კარგად გესმით ტაქტიკური ნიუანსები. შენ რაში დაგეხმარა გვარდიოლა?
- საქმე მაშინ გამოდის, როცა ორი კარგად უგებს ერთმანეთს. მან ჩემს თამაშს მეტი კომბინაციურობა შემატა. ადრე, როგორც ტანით ძალიან პატარა, ბევრ რამეს მხოლოდ სისწრაფის ხარჯზე ვაკეთებდი. ახლა უფრო ჭკუით ვთამაშობ.

- ნახევარდაცვაში როგორ გრძნობ თავს?
- ეს სუპერია! 10 წელი ვითამაშე ფლანგზე. დგება პერიოდი, როცა გინდა, რომ რაღაც ახალი მოსინჯო, ახალ გამოწვევას შეეჭიდო...

- შენს კარიერაში იყო რამდენიმე საინტერესო მომენტი.მაგალითად, როცა "შტუტგარტში" გაგანათხოვრეს. ვიცი, რომ 2008 წელს "ბარსელონას" სურდა შენი გადაბირება. მომიყევი ამაზე...
- ჯერ კიდევ ფრანკ რაიკარდი იყო მწვრთნელი, მაგრამ ხელშეკრუკება რომ გამეფორმებინა, ჩემი მენეჯერი პეპი იქნებოდა.

- მე მთელი კარიერა "ლივერპულში" გავატარე. საინტერესოა, რატომ არ გადახვედი პრიმერაში, პრემიერლიგაში ან იტალიის ჩემპიონატში?
- მე აქ 12 წლის მოვედი. ფიქრიც კი არ მინდოდა იმაზე, რომ "ბაიერნს" უჩემოდ მოეგო, ვთქვათ, ჩემპიონთა ლიგა. ან თუნდაც ლიგაზე ამ გუნდის წინააღმდეგ მეთამაშა. ასეა, ჩვენ ყველას გვაქვს ჩვენი პრინციპები.

- მაშ, კლოპთანაც არ წახვალ "ლივერპულში"?
- შემდეგში (იცინის)... ხუმრობა იქეთ იყოს და, მე ევროპალიგას ინტერესით ვუყურე, ჩაბი ხშირად მიყვება იმ ფანტასტიკურ ატმოსფეროზე, რომელიც არის "ენფილდზე".

- არ გიმსჯელიათ პეპთან იმის თაობაზე, რომ ის დარჩენილიყო გუნდში და ერთად მოგეგოთ ჩემპიონთა ლიგა?
- გვარდიოლამ ჩვენ ახალ სიჩქარეზე გაგვიყვანა. მართალია, ჩემპიონთა ლიგა მასთან ერთად ვერ მოვიგეთ, მაგრამ ყველა სეზონში მოვიგეთ ბუნდესლიგა და გავდიოდით ჩემპიონთა ლიგის ნახევარფინალში. მგონი, ეს დიდებული შედეგია.

- ტიტულები ერთი მხარეა და რა მოგცა მასთან მუშაობამ საფეხბურთო განათლების კუთხით, რა შეგემატა, როგორც ფეხბურთელს? გავიდა თუ არა შენი კარიერა ახალ სიმაღლეზე?
- ის მეტია, ვიდრე უბრალოდ ტიტულების მომპოვებელი მწვრთნელი. შემთხვევითი არ არს, რომ 30 წლის ასაკში ჩემს კარიერაში დადგა მომენტი, როცა მე ვიგრძენი საკუთარ თამაშში უკეთესობა.

- გაიხსენეთ ის წელი, როცა იუპ ჰაინკესის ხელმძღვანელობით ყველა შესაძლო ტიტული მოიგეთ. მაშინ თქვენ გერმანიაში "დორტმუნდის" ჰეგემონია დაამხეთ...
- ორი წელი არ გვქონდა ტიტული მოგებული და ხალხის მხრიდან შეკითხვები წამოვიდა, ეს ბუნებრივია. როცა "ბაიერნში" თამაშობ, წნეხი ძალიან დიდია.

- რატომ ყიდულობთ "დორტმუნდის" საუკეთესო ფეხბურთელებს? ჯერ იყო მარიო გიოტცე, მერე რობერტ ლევანდოვსკი, ახლა მატს ჰუმელსი...
- ჰუმელსი კარგი მოთამაშეა (იცინის). თუ გადახედავთ ჩვენი კლუბის მიერ განვლილ გზას ბოლო სეზონებში, ნახავთ, რომ მინიმუმი ჩემპიონთა ლიგის ნახევარფინალია. ასეთ მოთხოვნებს შესაბამისი ფეხბურთელები სჭირდება.

- ფრიც ვალტერი, ფრანც ბეკენბაუერი, ლოთარ მათეუსი და ფილიპ ლამი - მეოთხეკაპიტანი ხართ, ვისთან ერთადაც ბუნესმანშაფტმა მსოფლიოს პირველობა მოიგო. კარგად ჟღერს?
- საერთოდ არ ჟღერს ცუდად!

- 2014 წელს გერმანიის ნაკრების შემადგენლობაში მსოფლიოს ჩემპიონატზე საყრდენად ითამაშეთ. ნაკრებში როგორ შეეგუეთ ამ როლს?
- გუნდში მეტი დროა ადაპტაციისათვის, ვიდრე ნაკრებში. არც ეროვნულ გუნდში გამჭირვებია. ეს მას შემდეგ მოხდა, რაც ბასტიანმა და სამიმ ტრავმები მიიღეს.

- რას გრძნობდით, როცა ბრაზილიაში გაემგზავრეთ მსოფლიოს ჩემპიონატზე? თქვენ ხომ მუნდიალი 1990 წლის შემდეგ არ გქონდათ მოგებული...
- ეს ჩვენთვის დიდი გამოცდილება იყო. გუნდში გამოცდილებისა და ახალგაზრდობის დიდებული შერწყმა მოხდა. შედეგიც სახეზეა. გერმანიამ მსოფლიოს ჩემპიონატი მოიგო.

- ფინალზე ჩემს შვილთან ერთად წავედი. მაშინ მარიო გიოტცემ დამატებით დროში დააწინაურა გერმანია, მაგრამ გონსალო იგუაინს დიდებული შანსი ჰქონდა...
- მესისაც ჰქონდა შანსი.. სხვათა შორის, ალჟირთანაც დიდი ბრძოლა გადაგვხდა...

- ამბობენ, რომ გერმანიის ნაკრებში შეიძლება გიხილოთ ევროპის ჩემპიონატზე. ამის სურვილი ქვეყანაში არის...
- არა, გამორიცხულია. დაგპატიჟებ ჩემს ოჯახში, სადაც იქნება ბარბექიუ, ლუდი და გერმანიის ქომაგობა.

- პეპ გვარდიოლა ინგლისში - ბევრი იოპტიმისტურად უყურებს ამას, ბევრი პირიქით...
- "სიტიმ" აშკარად ტოპ-მწვრთნელი მიიღო. ის გუნდს გაიყვანს ახალ სიმაღლეზე.

- თუ გახსოვთ, რა გითხრათ პეპმა, როცა პირველად ნახეთ?
- ეს იყო წინასასეზონო პერიოდი. ტელეფონით დამირეკა. მაშინვე მივხვდი, რომ საქმისადმი მისი დამოკიდებულება იყო ზედმიწევნით სერიოზული.

- კარიერის დასრულების შემდეგ სამწვრთნელო მოღვაწეობას ხომ არ აპირებთ?
- ზუსტად ვიცი, რომ არასოდეს ვიქნები მწვრთნელი. ეს ჩემს ხასიათში არ ზის.

- იქნებ, მენეჯმენტში გსურთ მუშაობა ისე, როგორც კარლ-ჰაინც რუმენიგეს...
- "ბაიერნის" ბევრი ყოფილი ფეხბურთელი მუშაობს ამ პოზიციაზე. მე მაინც მინდა, რომ "ბაიერნის" ქომაგების გულში დავრჩე, როგორც კლუბისათვის მნიშვნელოვანი ფეხბურთელი.

- თუ 2018 წელს დაასრულებთ კარიერას, ჩემპიონთა ლიგის მოგების მხოლოდ ორი შანსი გექნებათ...
- ძალიან ბედნიერი ვიყავი, როცა ჩემპიონთა ლიგა მოვიგე და კიდევ მინდა, ეს ბედნიერება განვიცადო. ამისთვის ყველაფერს გავაკეთებ.

ყოველდღიური სპორტული გაზეთი "ლელო"