შინაგან საქმეთა სამინისტროს აკადემიის გუნდმა მიმდინარე სეზონში პირველი მარცხი განიცადა. არჩილ ჟღენტის გაწვრთნილმა აკადემიელებმა ჩემპიონატი ზედიზედ 5 მოგებით დაიწყეს, მე-6 შეხვედრა კი უიღბლო გამოდგა. ნიკოლოზ ჩერქეზიშვილისა და ლაშა თოიძის გაწვრთნილმა "ჰიუნდაიმ", სწორი და გააზრებული თამაშის წყალობით, აკადემიელებს პირველი მარცხი აგემეს.
შეხვედრა გარდამავალი უპირატესობით მიმდინარეობდა. ორივე გუნდს შეეძლო გამარჯვება, თუმცა ბოლო წუთებში ჰიუნდაელებმა მეტი სიზუსტე და მობილიზება გამოავლინეს და დამსახურებულად გაიმარჯვეს.
მე-3 წუთისთვის "შსს-აკადემია" 11:2-ს იგებდა და თითქოს ყველაფერი აკადემიელთა ზედიზედ მე-6 გამარჯვებისკენ მიდიოდა, თუმცა "ჰიუნდაიმ" თამაში დაალაგა და 17:13-ით გალიდერდა.
ბოლო ათწუთეულში საინტერესო ბრძოლა გაიმართა. აკადემიელებმა ჩამორჩენის 5 ქულამდე შემცირება მოახერხეს, თუმცა ალექსანდრე ბოლქვაძისა და სანდრო სანაძის შედეგიანობით, საფინალო სირენამდე 6 წუთით ადრე "ჰიუნდაი" 11 ქულით - 69:58 დაწინაურდა.
აკადემიელები ვა-ბანკზე წავიდნენ და შორ სროლებზე გადავიდნენ. ლევან ლოლიშვილმა და ლევან გორდულაძემ 2-ჯერ სამქულიანები ჩააგდეს და როცა ამ უკანასკნელმა შედეგიან გარღვევას ზუსტი საჯარიმოც მოაყოლა, ანგარიში გათანაბრდა - 71:71. სწორედ აქ გამოავლინეს ჰიუნდაელებმა მტკიცე ხასიათი და დაცვაში სუსტ თამაშს შეტევაში გააზრებული მოქმედება მოაყოლეს.
ბოლქვაძემ თამაში საკუთარ თავზე აიღო, დრიბლინგით დროც გაიყვანა და ჯერ 2 საჯარიმო ჩააგდო, მომდევნო შეტევაშიც უმნიშვნელოვანესი ბურთი ჩააგდო, რითაც საფინალო სირენამდე 23 წამით ადრე "ჰიუნდაი" 4 ქულით დააწინაურა.
მატჩის ბედიც აქ გადაწყდა. "ჰიუნდაიმ" თამაში მშვიდად მიიყვანა გამარჯვებამდე, რაშიც ლომის წილი 28 ქულით ბოლქვაძემ დაიდო.
სანაძის ანგარიშზე 18 ქულა დაგროვდა, ხოლო კახა გიორგაძის ანგარიშზე 12 ქულაა. "შსს-აკადემიაში" 13 ქულით ლევან გოგალაძე გამოირჩა, გორდულაძემ კი შეხვედრა 12 ქულით დაასრულა.
მატჩისშემდგომი კომენტარები:
არჩილ ჟღენტი ("შსს-აკადემიის" მთავარი მწვრთნელი):
"ჩემს გუნდს არ ვამართლებ, ძალიან ცუდად ვითამაშეთ და წაგებას ვიმსახურებდით, თუმცა უკმაყოფილო ვარ მსაჯ ზაზა მაჩალაძის მოქმედებით, რომელმაც საკვანძო მომენტში ისეთი ჯარიმა მოგვცა, რითაც წაგება გადაგვიწყვიტა".
ნიკოლოზ ჩერქეზიშვილი ("ჰიუნდაის" მთავარი მწვრთნელი):
"მნიშვნელოვანი გამარჯვება მოვიპოვეთ, რაშიც ცალკე მონდომება, ცალკე იღბალიც დაგვეხმარა. მართალია, მეტოქეს აკლდა ლერი კვანტალიანი, მაგრამ ჩვენც 2 წამყვანი მოთამაშე არ გვყავდა - კახა ტომარაძე და ლუკა ზაქრაძე. ითამაშეს ბიჭებმა, მოინდომეს და დამსახურებულად გაიმარჯვეს".
წყარო: u-20.ge
