სლოვენია-საქართველო 79:68 - მარცხიანი სტარტი, თუმცა შანსი არის [VIDEO]

სლოვენიის ნაკრებს 2011 წლის ევროპის ჩემპიონატზეც ვეთამაშეთ და 2013-შიც. პირველ შემთხვევაში მეორე პერიოდი 15:25 წავაგეთ, მეორე შემთხვევაში - 13:31, გუშინ - 13:24. მოკლედ, მეორე ათწუთეულში სლოვენიელებს ვერ ვაკავებთ. ევრო-2015-ზე მათთან საბოლოოდ სწორედ 11 ქულის სხვაობით დავმარცხდით. "მწვანეებმა" ყველაზე მეტი სამქულიანი მეორე პერიოდში ჩააგდეს - 5.

კიდევ ერთი საინტერესო პარალელი: 2011-ში სლოვენიელებმა ჩვენთან მატჩში 15 სამქულიანის რეალიზება მოახერხეს, 2013-ში - 9-ის, გუშინდელ მატჩში - 11-ის. სამივე შემთხვევაში სწორედ სამქულიანები იქცა საქართველოს ნაკრების მარცხის მთავარ მიზეზად. ამჯერად სამი პერიოდის შემდეგ მეტოქეს 19 მცდელობიდან 11 სამქულიანი ჰქონდა გამოყენებული (58%), საქართველომ კი 40 წუთში 20 შორეული ტყორცნა შეასრულა და მხოლოდ 3 ჩააგდო.

ჩვენს მეტოქეს სწორი გათვლა ჰქონდა, ფარქვეშ საქართველოს ვერ აჯობებდა და ამიტომაც გააკეთა აქცენტი პერიმეტრიდან ტყორცნებზე. როცა საამისოდ წინასწარ ხარ მომზადებული, გამოგივა კიდეც. გამოუვიდა 30 წუთის განმავლობაში და მეოთხე პერიოდის წინ 17 ქულით დაწინაურდა.

ასეთ უპირატესობას სლოვენიის მსგავსი გუნდი ხელიდან არ გაუშვებს, თუმცა მეოთხე რაუნდში საქართველოს ნაკრები გაცილებით აგრესიული დაცვით დაუხვდა სლოვენიელებს და არც შეტევაში აყოვნებდა - სწრაფი, ინდივიდუალური გარღვევებით მეტოქის დაცვას კარგად ჭრიდა თორნიკე შენგელია, რომელმაც 21-დან 9 ქულა მეოთხე რაუნდში ჩააგდო.

საფინალო სირენამდე 2 წუთით ადრე ანგარიშში სხვაობა -22-დან -8 ქულამდე დავიყვანეთ, მაგრამ წაგებას თავი მაინც ვერ დავაღწიეთ.

- პრესკონფერენციისას მთავარი მწვრთნელის, იგორ კოკოშკოვის მისამართით დაისვა შეკითხვა - მეოთხე პერიოდში სწრაფი, ინდივიდუალური გარღვევებით სოლიდური ჩამორჩენა შევამცირეთ, ასეთი ტიპის თამაშზე აქცენტის გაკეთებას მომავალ მატჩებში ხომ არ აპირებთო. მწვრთნელის პასუხი ასეთი იყო:

"სწრაფი გარღვევები ბოლოს მართლაც კარგად გამოგვივიდა, მაგრამ ეს ჩვენი დაცვის დამსახურება იყო. როცა დაცვაში მჭიდროდ თამაშობ და მეტოქეს შეცდომებსაც აშვებინებ, სწრაფი შეტევის საშუალებაც თავისთავად ჩნდება.

ასე რომ, მომავალ მატჩებში დაცვაში თამაშის გაუმჯობესებას დიდი მნიშვნელობა ექნება, ჩვენ ხომ ჯგუფის ფავორიტებთან, საბერძნეთთან, ხორვატიასთან და უშუალო კონკურენტ მაკედონიასთან დაგვრჩა შეხვედრები".

ევრობასკეტი 2015. C ჯგუფი. II ტური
ზაგრები, ხორვატია
6 სექტემბერი, 3890 მაყურებელი
სლოვენია-საქართველო 79:68
17:13, 24:13, 24:22, 14:20
მსაჯები: სერხიო სილვა (პორტუგალია), გენტაინ ჩიჩი (ალბანეთი), პეტრი მანტილა (ფინეთი)

ა გ მ წ ბ ქ
1. საბერძნეთი 2 0 157-135 4
2. ხორვატია 1 1 150-145 3
3. სლოვენია 1 1 152-148 3
4. ჰოლანდია 1 1 144-150 3
5. მაკედონია 1 1 143-156 3
6. საქართველო 0 2 140-152 2.

(იბეჭდება მცირე ცვლილებით)
ყოველდღიური სპორტული გაზეთი "ლელო"