2004 წლის შემდეგ საქართველოს ნაკრების მთავარ მწვრთნელებთან მიმართებაში ქართულ საკალათბურთო საზოგადოებას ყოველთვის ჰქონდა ერთი პრეტენზია - რატომ არ ესწრება ნაკრების დამრიგებელი შიდა ჩემპიონატის მატჩებს. ამა წლის თებერვალში იგორ კოკოშკოვის ნაცვლად მთავარ მწვრთნელად ბერძენი ილიას ზუროსი დაინიშნა და უკვე მესამედ ჩამოვიდა თბილისში. იგი საქართველოს ჩემპიონატის ნახევარფინალებსაც დაესწრო და აცხადებს, რომ ნაკრებში ახალი სახეები აუცილებლად გამოჩნდებიან.
"საქართველოში ხშირად ჩამოვალ, - გვპირდება ზუროსი, - ეს აუცილებელია არა მხოლოდ იმისთვის, რომ შიდა ჩემპიონატის კალათბურთელებს დავაკვირდე, არამედ იმისთვისაც, რომ უფრო კარგად გავიცნო საქართველო, ქართული ხასიათი,
მართალია, ერთ წელიწადში სიტუაციაში ისე ვერ გავერკვევი, როგორც ჩემი წინამორბედი. იგორ კოკოშკოვი ხომ რამდენიმე წლის განმავლობაში მუშაობდა საქართველოს ნაკრებში. თუმცა ვცდილობ, ოფიციალურ მატჩებამდე მაქსიმალურად კარგად შევისწავლო ქართული რესურსი".
როგორც უკვე მოგახსენეთ, ბერძენი სპეციალისტი საქართველოში მესამედ ჩამოვიდა. სამივე შემთხვევაში დაესწრო ეროვნული ჩემპიონატის შეხვედრებს. გვარებიც ჩაინიშნა, თუმცა მედიასთან მათი გაცხადებისგან თავი შეიკავა.
მალე დავბრუნდები და გაფართოებულ შემადგენლობასაც გამოვაქვეყნებო.
"საქართველოს ჩემპიონატს რეგულარულად ვადევნებ თვალს. ვაკვირდები კალათბურთელებს, ვეცნობი მწვრთნელებს. როდესაც საქმე ეროვნულ ნაკრებს ეხება, მასში საუკეთესოები უნდა იყვნენ წარმოდგენილნი, საამისოდ კი დიდი სელექცია და დაკვირვებაა საჭირო. შედეგს სწორი შერჩევა მოგვცემს.
საქართველოს ნაკრებში არის ბირთვი, რომელიც გუნდში წლების განმავლობაში თამაშობს და უცხოურ კლუბებშიც წარმატებით გამოდის.
ცხადია, ნაკრები ამ კალათბურთელებზე აეწყობა, მაგრამ ახალი თაობის წარმომადგენლებიც უნდა დავამატოთ. ეს არა მხოლოდ სადღეისოდაა აუცილებელი, არამედ მომავალში ნაკრების სიძლიერისთვისაც".
როდესაც ილიას ზუროსი ნაკრების გაფართოებულ შემადგენლობას გამოაცხადებს, იქ აუცილებლად შეგვხვდება ამერიკული გვარი, ოღონდ მწვრთნელმა მისი ვინაობის გამხელისგან თავი შეიკავა. ერთი რამ დაბეჯითებით შეგვიძლია გითხრათ, ეს არ იქნება ჯეიკობ პულენი, უკანახაზელი, რომელიც საქართველოს ნაკრებს 2015 წლის ევრობასკეტზე ეხმარებოდა.
გასარკვევია ასისტენტების ვინაობაც. მთავარმა მწვრთნელმა გვითხრა, ამ საკითხზე მუშაობა აქტიურად მიმდინარეობს და თანაშემწეების გვარებსაც მალე გაგვანდობს.
"დღეს მხოლოდ ერთი მწვრთნელის დასახელება შემიძლია, რომელიც ჩემს შტაბში იმუშავებს. ეს არის ფიზმომზადების ბერძენი სპეციალისტი გეორგიოს ვავეცისი. იგი ამჟამად ყუბანის "ლოკომოტივში" გეორგიოს ბარძოკასის ასისტენტია".
შემადგენლობაზე საუბრისას ილიას ზუროსი კონკრეტულ კალათბურთელებზე კონკრეტულად არაფერს ამბობს.
"ქართველი ლეგიონერების თამაშს მუდმივად ვადევნებ თვალს. მათ აქამდეც ვიცნობდი, თუმცა ამ სეზონში ყველას გარჯას სხვა თვალით ვაკვირდები. ზაზა ფაჩულიას კარგი სეზონი აქვს. მის მსგავსად კიდევ ბევრი ატარებს გამორჩეულ სეზონს. ჩვენთვის მთავარია, სანაკრებო შეკრებისას ყველა ჯანმრთელად იყოს და აქ იყოს.
საქართველოს ნაკრებში ახლა ვიწყებ მუშაობას და მინდა წარმატებული შედეგი მქონდეს. საამისოდ კი ოპტიმალური შემადგენლობის შეკრებას დიდი მნიშვნელობა აქვს. ძლიერი, კონკურენტუნარიანი გუნდი გვყავს და ეს მოედანზე უნდა დავამტკიცოთ".
საქართველოს ნაკრებს ევროპის 2017 წლის ჩემპიონატის შესარჩევ ეტაპზე ჩერნოგორიასთან, სლოვაკეთთან და ალბანეთთან მოუწევს საქმის გარჩევა.
"ჩვენი მიზანი ევროპის ჩემპიონატზე მოხვედრაა. ნაკრებმა ზედიზედ სამჯერ ითამაშა ევრობასკეტზე და მეოთხედი საგზურის ვერმოპოვება დიდ წარუმატებლობად ჩაითვლება. ისიც მესმის, რომ განთესვისას პირველ კალათაში ვიყავით და ჯგუფის ფავორიტები ვართ.
მაქვს ინფორმაცია, რომ ჩვენი მეტოქე ჩერნოგორია ძლიერი შემადგენლობის შეკრებას აპირებს. ჩამოჰყავს კალათბურთელები NBA-დან და ევროლიგის გუნდებიდან. სერიოზული ნაკრები იქნება, თუმცა ჩემი გუნდისა უფრო მჯერა. ბევრი მუშაობით და ბრძოლით მიზანს მივაღწევთ".
მახსოვს, იგორ კოკოშკოვის წინამორბედმა გორდონ ჰერბერტმა მითხრა - საქართველოს ნაკრების საფირმო ნიშანი დაცვა უნდა იყოსო. არ გამოვიდა. ფინეთმა 91 ქულა ჩაგვიგდო... იგორ კოკოშკოვის ხელში ჩვენი გუნდი ისეთ ძალად იქცა, თვით გრანდებმაც რომ არ იციან, მისგან რას უნდა ელოდნენ. ილიას ზუროსი აცხადებს, რომ კოკოშკოვს სწორი სტრატეგია ჰქონდა დასახული და არც თვითონ აპირებს მიმართულების შეცვლას. თუმცა დაცვაში მეტი აგრესია დაგვჭირდებაო.
"იგორ კოკოშკოვის სტრატეგიას შედეგი მოჰქონდა და მისი შეცვლა მიზანშეწონილად არ მიმაჩნია. დაცვაში რაღაცებს დავამატებთ, მეტი აგრესიაა საჭირო. შეტევაში კი საქართველოს ნაკრებს საკმარისი ტალანტი აქვს.
ჩემს გაწვრთნილ გუნდებს ერთი მახასიათებელი აქვთ - ბურთი სწრაფად მოძრაობს და ყველა კალათბურთელი საქმეშია ჩართული. შესაბამისად, შეტევისთვის მეტი ოფცია ჩნდება და მეტოქისთვისაც რთულდება საქმე".
ილიას ზუროსს ძირითადად საკლუბო კალათბურთში მუშაობის გამოცდილება უმაგრებს მხარს. ნაკრებში 2011 წელს მოღვაწეობდა. მისი გაწვრთნილი საბერძნეთი ევრობასკეტზე საქართველოსაც ეთამაშა.
"კლუბში საქმე შედარებით იოლადაა - გუნდის შესაკვრელად, ფორმაში შესაყვანად დრო საკმარისად გაქვს. ამიტომ, მწვრთნელი ცდილობს შეგირდებმა ოპტიმალურ კონდიციებს პლეი ოფისთვის მიაღწიონ. სეზონი ხომ 10 თვეს გრძელდება.
ნაკრებში ცვლილებებისთვის დრო არ გაქვს, გეზსა და შემადგენლობას რომ აირჩევ, შეცვლას ვეღარ მოასწრებ. თამაშებიც მოკლე დროში ეტევა და კალათბურთელებს სხვა დატვირთვის გაძლება უწევთ. თუმცა ნაკრებში თამაში კლუბში ასპარეზობისგან იმითაც განსხვავდება, რომ ეროვნულ გუნდში ფულის გამო კი არა, ეროვნული დროშისთვის, გულით, სიამაყით თამაშობენ...
ვიცი, რომ ქართველი კალათბურთელებისთვისაც ბევრს ნიშნავს საკუთარი ქვეყნის ღირსების დაცვა და მაქსიმალურად ვეცდები ხელი შევუწყო, რომ ერთად გავახაროთ ქართველი გულშემატკივარი".
(იბეჭდება მცირე ცვლილებით)
ყოველდღიური სპორტული გაზეთი "ლელო"
