ზაზა ფაჩულიას უქულო მატჩი - "გოლდენ სტეიტმა" "ლეიკერსთან" უშანსოდ წააგო [VIDEO]

თბილისის დროით 5 ნოემბერს, საქართველოს ნაკრების კალათბურთელის ზაზა ფაჩულიას გუნდმა "გოლდენ სტეიტ უორიორსმა" NBA-ს რეგულარული სეზონის მეექვსე მატჩი სტუმრად "ლოს ანჯელეს ლეიკერსთან" გამართა და უშანსოდ, ანგარიშით 97:117 დამარცხდა.

ქართველმა ცენტრს, რომელმაც თამაში ტრადიციულად, სტუმართა სასტარტო ხუთეულში დაიწყო, მოედანზე გატარებულ 19:02 წუთში მეტოქის კალათისკენ ბურთი არც უსვრია. მის ანგარიშზე 3-3 მოხსნა და შედეგიანი პასია. ზაზამ ბურთი ორჯერ დაკარგა და ერთხელ დაჯარიმდა.

რაც შეეხება უშუალოდ მატჩს, მასპინძლებმა თამაში პირველსავე წუთებიდან უკეთესად დაიწყეს და პირველი ტაიმი ანგარიშით 65:49 მოიგეს. მესამე მეოთხედში "უორიორსმა" ჩამორჩენა უმნიშვნელოდ შეამცირა, თუმცა გადამწყვეტ მეტოთხედში "ლეიკერსმა" დაცვაში ბრწყინვალედ გარჯის წყალობით, მეტოქეს მხოლოდ 15 ქულის ჩაგდების საშუალება მისცა.

გამარჯვებულთა შორის ყველაზე შედეგიანები 20-20 ქულით ლუ უილიამსი და ჯულიუს რენდლი იყვნენ. ზაზას გუნდში კი გამოსარჩევი კევინ დიურანტი იყო, რომლის აქტივში 27 ქულაა. სულ 13 ქულა და 11 პასი მიითვალა სტეპ კარიმ, რომელმაც 10 ცდიდან ვერცერთი 3-სამქულიანი ჩააგდო.

"გოლდენ სტეიტი", რომელსაც 4 მოგება და 2 მარცხი აქვს და დასავლეთ კონფერენციაში მე-4 ადგილზეა, მომდევნო შეხვედრას, თბილისის დროით 8 ნოემბერს, "ნიუ ორლენა პელიკანსთან" საკუთარ მოედანზე ჩაატარებს.