მიხეილ გაბრიჩიძე: ნუ დავკარგავთ ყველაფერს, სჯობს დავსხდეთ და დავილაპარაკოთ

დღეს, 6 ივნისს, კალათბურთის ეროვნული ფედერაციის გამგეობის სხდომა გაიმართა, რისი დასრულების შემდეგაც გამგეობის წევრებმა და ფედერაციის პრეზიდენტმა მიხეილ გაბრიჩიძემ პრესკონფერენცია გამართეს.

პრესკონფერენციაზე "სასკი ბასკონიასთან" გაფორმებულ ხელშეკრულებასა და მასთან დაკავშირებით ბოლო დროს განვითარებულ მოვლენებზე ისაუბრეს.

შეგახსენებთ, რომ 1-ელ ივნისს, ფედერაციის ვიცე-პრეზიდენტმა კახა შენგელიამ და გამგეობის წევრმა თემურ დათიკაშვილმა გამგეობის სხდომა სკანდალურად დატოვეს. ისინი ფედერაციას მილიონობით ლარის არამიზნობრივად გახარჯვაში ადანაშაულებენ. საუბარია ესპანურ კლუბ "სასკი ბასკონიასა" და საქართველოს კალათბურთის ფედერაციას შორის გაფორმებულ ხელშეკრულებაზე, რომელიც ახალგაზრდა ქართველი კალათბურთელების ესპანეთში მომზადებას ითვალისწინებს.

აღსანიშნავია, რომ პრესკონფერენციის პარალელურად, კალათბურთის ფედერაციასთან საპროტესტო აქცია მიმდინარეობდა. აქციის წევრები მიხეილ გაბრიჩიძის თანამდებობიდან გადადგომას მოითხოვდნენ.

მიხეილ გაბრიჩიძე:
"ყველას კარგად მოგეხსენებათ, ბოლო პერიოდში როგორი შავი პიარ-კამპანია აგორდა ჩვენი ფედერაციის წინააღმდეგ. რაც ყველაზე დიდ წუხილს იწვევს, ისაა, რომ ეს ყველაფერი ჩვენი გუნდის წევრებმა დაიწყეს - იმ ადამიანებმა, ვისთანაც რამდენიმეწლიანი მეგობრობა მაკავშირებს და მიყვარს.

მაგრამ, როგორც ჩანს, არსებობს ამ ქვეყანაში მეგობრობასა და  სიყვარულზე დიდი ფასეულობა და ზუსტად ამ ასპექტებმა გამოიწვია ეს.

დღეს შედგა გამგეობის სხდომა, რომელსაც ესწრებოდა 6 წევრი. მეშვიდე წევრი, ვლადიმირ ბოისა, არ იმყოფება საქართველოში, მაგრამ სრულიად იზიარებს სხდომის პათოსს. მან თქვა, ჩათვალეთ, ხელს ვაწერ ამ ყველაფერსო...

ფედერაციის გამგეობამ კიდევ ერთხელ იმსჯელა სკეფ-სა და "სასკი ბასკონიას" შორის გაფორმებული ურთიერთთანამშრომლობის ხელშეკრულებაზე. გამგეობის წევრთა საერთო მოსაზრებით, პროექტი კიდევ ერთხელ შეფასდა, როგორც ერთ-ერთ წარმატებულ და დიდი იმედების მომცემ წამოწყებად, გამომდინარე მისი ფინანსური რისკების შემცირებისა და იმ მოსალოდნელი შედეგების გათვალისწინებით, რომლებიც შეუწყობს ხელს ქართული კალათბურთისთვის მაღალი ევროპული დონის მოთამაშეების აღზრდასა და მათ შემდგომ განვითარებას.

მიუხედავად იმისა, რომ ბატონები, თემურ დათიკაშვილი და კახა შენგელია ითვლებოდნენ საქართველოს კალათბურთის ეროვნული ფედერაციის არჩევნებში გამარჯვებული გუნდის წევრებად, სრულყოფილად ჰქონდათ გააზრებული გუნდის მიზნები და ამოცანები, მხარი დაუჭირეს საარჩევნო პროგრამას, ისინი სისტემატურად ცდილობდნენ ფედერაციის სტრუქტურებში, მათი სტატუსიდან გამომდინარე, პირადი ინტერესების გატარებას, რაც დაკავშირებული იყო საკალათბურთო ინფრასტრუქტურის (დიდუბის და ვერის ბაღის საკალათბურთო კომპლექსების) მათ პირად განკარგულებაში გადაცემასა და მათ მიერ დაფუძნებული საკალათბურთო კლუბ "ვითას" არამართლზომიერ ლობირებაში, რასაც, რა თქმა უნდა, კალათბურთის ფედერაცია ვერ გაიზიარებდა.

გამგეობისთვის გასაგებია, თუ რატომ ახდენენ ხსენებული ბატონები ერთ-ერთი ყველაზე წარმატებული პროექტის დისკრედიტაციას. გამგეობისთვის მიუღებელია მისი ყოფილი წევრების მიერ მედიასაშუალებებში გავრცელებული ფედერაციის საქმიანი რეპუტაციის შემლახავი, შეგნებულად არასწორად მიწოდებული და შეურაცხმყოფელი ინფორმაცია.

გამგეობა მოუწოდებს კახა შენგელიასა და თემურ დათიკაშვილს, შეწყვიტონ საზოგადოებისთვის არასწორი ინფორმაციის მიწოდება და უარყონ მათ მიერ მედიაში გავრცელებული ცრუ ინფორმაცია.

გაკეთდა განცხადება, რომ კახა შენგელია ტოვებს ვიცე-პრეზიდენტის პოსტს. ჩვენ მისი ეს განცხადება დავაკმაყოფილეთ, მაგრამ საჭიროა, რეესტრში მივიდეს და წერილობით თავად დაადასტუროს გადადგომის სურვილი. ასევე უნდა მოიქცეს დათიკაშვილიც, თუკი გამგეობის წევრობის დატოვება სურს.

ბოლო ვიზიტზე "ბასკონიაში" ჩვენთან ერთად იმყოფებოდა სპორტისა და ახალგაზრდობის საქმეთა მინისტრის ორი მოადგილე, რომლებიც შეხვდნენ კლუბის ხელმძღვანელობას. ამ შეხვედრებზე, სპორტული ასპექტების გარდა, იყო საუბარი იმ ტექნოლოგიებზე, რითაც ვითარდება ბასკეთში კალათბურთი და გადაწყდა, შეიქმნას ბიზნესპროექტი, სადაც ქართველი ბიზნესმენებიც მიიღებდნენ მონაწილეობას.

ორი ბასკური კომპანია დაინტერესებულია საქართველოში ინვესტიციის ჩადებით და მათ მუშაობაც დაიწყეს ამ მიმართულებით. ამ სკანდალმა კი, შესაძლოა, ამას ხელი შეუშალოს. ამიტომ ვთხოვ ყველას, კორექტულები ვიყოთ და პირადი ამბიციების გამო ნუ დავკარგავთ ყველაფერს - სჯობს თავი შევიკავოთ, დავსხდეთ და ვისაუბროთ", - განაცხადა ფედერაციის პრეზიდენტმა.

ასევე იხილეთ:
"სასკი ბასკონიასა" და "ფონდ 5+11"-ის განცხადება ქართულ კალათბურთში მომხდარ ამბებზე