დუდუ დადიანის მემორიალი 2002 წლიდან იმართება. პირველად თასი "დინამომ" აღმართა. მეათე, საიუბილეო გათამაშებამ ახალი ჩემპიონი გამოავლინა: "არმია" მესამე სეზონია, ქართული კალათბურთის კაბადონზეა, მაგრამ აქამდე დადიანის მემორიალში მონაწილეობა არ მიუღია. დებიუტი არმიელებმა ტრიუმფით აღნიშნეს, თუმცა მწვრთნელი, კოტე ტუღუში ჩაფიქრებული და, როგორც საუბრისას გაირკვა, უკმაყოფილო იყო.
რატომ? ამ კითხვაზე პასუხს ქვემოთ მიიღებთ. შესავალში კი მხოლოდ "არმიას" ხსენება მართებული არ იქნება, რადგან მას ღირსეული მეტოქე ჰყავდა ("შსს აკადემია"), სწორედ ისეთი, რომელმაც ევროჩელენჯისთვის მზადებაში მყოფი არმიელების მინუსები სააშკარაოზე გამოიტანა.
სეზონისწინა შეჯიბრება კი იმისთვისაა, რომ
თავის მხრივ, უკმაყოფილო იყო "შსს აკადემიას" მწვრთნელი გიორგიოს კეცელიდისი. არა, მისმა გუნდმა სუსტად არ ითამაშა; პირიქით, ვფიქრობთ, შსს-ელებმა შესაძლებლობები კარგად გამოავლინეს - მწვრთნელი უკმაყოფილო იმიტომ უნდა ყოფილიყო, რომ შედარებით ძლიერი შემადგენლობის მეტოქეს სამი პერიოდი თანაბრად ეთამაშა და რომ არა მცირე ჩავარდნა, შეიძლებოდა, სეზონი ტიტულის მოგებით დაეწყო.
არადა, ეს შსს-სთვის მემორიალის ზედიზედ მესამე წაგებული ფინალია.
* * *
შესავალში დავწერეთ "შედარებით ძლიერი შემადგენლობის მეტოქეს". ეს "არმიას" ეხებოდა, რომელსაც ევროპულ კალათბურთში გამოცდილი, ევროთასსა თუ ევროჩელენჯზე გამოწვრთნილი ლეგიონერები ჰყავს. მათ დავუმატოთ საქართველოს ნაკრების წევრები და არანაკლებ სასარგებლო ქართველი კალათბურთელები.
გავბედავთ და ვიტყვით, რომ ასეთი შემადგენლობით ოპტიმალურ ფორმაში მყოფ "არმიას" ევროჩელენჯზე ღირსეულად გამოსვლა შეუძლია.
რაც შეეხება "შსს აკადემიას", ისეთი მაღალანაზღაურებადი უცხოელები არ ჰყავს, როგორც მეტოქეს, ქართველთაგან კი საქართველოს ნაკრების წევრი მხოლოდ ბესიკ ლეჟავაა.
* * *
მაშ, რამ განაპირობა სამი პერიოდის განმავლობაში თანაბარი თამაში? ეს მხოლოდ ანგარიშზე არ ითქმის, საბოლოო სტატისტიკაც არაერთ კომპონენტში იყო თანაბარი: რეალიზებული ორქულიანები - 15:15, ჩაჭრები - 5:5, სამწამიანი ზონიდან ჩაგდებული ქულები - 22:22, მოხსნები - 40:38, პასები - 17:16 (ბოლო ორი მაჩვენებლით ოდნავ წინ "არმიაა"), შეცდომები - 18:16 (აქ უფრო მეტი შსს-ია).
თამამად შეიძლება ითქვას, რომ ასეთი უმნიშვნელო სხვაობები თამაშის საბოლოო შედეგზე გავლენას არ მოახდენდა. იყო ერთი ნიუანსი, რამაც შეხვედრის ბედი გადაწყვიტა. ამაზე მეოთხე პერიოდზე მსჯელობისას დავწერთ. მანამდე უნდა გავარკვიოთ, რამ განაპირობა ის, რომ მესამე პერიოდის შემდეგ ტაბლოზე 39:39 ეწერა.პირველი მიზეზი "შსს აკადემიას" სწორი თამაში იყო. ამ გუნდის კალათბურთელებმა დაცვაში გააზრებულად, ენერგიულად იშრომეს და ამიტომაც გამოვიდა ქულამწირი შეხვედრა. აღსანიშნავია, რომ ფარქვეშიდან ბურთის ჩაგდება ორივე გუნდს უჭირდა. ერთმაც და მეორემაც სამწამიანი ზონიდან მხოლოდ 22-22 ქულა მიითვალეს, რაც არცთუ დიდი რიცხვია.
იყო მეორე მიზეზიც, რაზეც მატჩის შემდეგ "არმიას" მთავარმა მწვრთნელმა კოტე ტუღუშმა ილაპარაკა:
"ამჟამად ფიზმომზადებას გავდივართ, რათა ნოემბრის დასაწყისს და ევროჩელენჯის მატჩებს ოპტიმალურ კონდიციებში შევხვდეთ. თუმცა მხოლოდ ეს არ იყო დაბალი პროცენტული მაჩვენებლით ტყორცნების მიზეზი. გვქონდა შეცდომები, რომელთა გამოსწორებაზეც ბევრი უნდა ვიმუშავოთ".
როგორც ირკვევა, არმიელებს ამჟამად ფიზიკური დატვირთვები აქვთ და, ალბათ, ესეც იყო იმის მიზეზი, რომ ბევრი ისეთი ტყორცნა ვერ გამოიყენეს, მაღალი დონის კალათბურთელი ხშირ შემთხვევაში რომ აგდებს. ამას დავუმატოთ, რომ ფეისონი და უილსონი ახალი ჩამოსულები არიან და გუნდთან შეთამაშება სჭირდებათ.
რამდენად საკმარისია დარჩენილი დრო ერთ მუშტად შესაკვრელად და სათანადო კონდიციების მისაღწევად, ამას ნოემბრის დასაწყისში ვნახავთ: "არმია" ევროჩელენჯის გახსნით შეხვედრას 7 ნოემბერს ისრაელში "ჰაპოელთან" ჩაატარებს.
* * *
მეოთხე პერიოდი წინა სამისგან რადიკალურად განსხვავებული გამოდგა. თუ მანამდე გუნდებს ქულების მოგროვება უჭირდათ, ბოლო 10 წუთში თითქმის იმდენი ქულა ვიხილეთ, რამდენიც საწყის ორ მეოთხედში ერთად.
შედარებით გრძელი სათადარიგოთა სკამის მქონე "არმიელებთან" ბოლომდე "საჭიდაოდ" ძალა არ ეყოთ შსს-ს კალათბურთელებს.
კოტე ტუღუშის შეგირდებმა მეოთხე რაუნდში ჩაგდებული 29 ქულიდან 21 სამქულიანი ტყორცნების შედეგად მოაგროვეს. დაუჯერებელია? ქრონოლოგიას გადახედეთ:
IV პერიოდი
9:42 ა. ბოისა (არმია) 3ქ - 42:39
8:35 ვონი (შსს აკადემია) 3ქ - 42:42
8:16 წივწივაძე (არმია) 3ქ - 45:42
7:52 ბოქოლიშვილი (შსს აკადემია) 2ქ - 45:44
7:38 ა. ბოისა (არმია) 3ქ - 48:44
6:21 გამყრელიძე (არმია) 3ქ - 51:44
5:36 არჩიბეკი (შსს აკადემია) 2ქ - 51:46
5:13 უილსონი (არმია) 3ქ - 54:46
4:56 ლეჟავა (შსს აკადემია) 3ქ - 54:49
4:56 არჩიბეკი - არასპორტული შენიშვნა
4:56 მილეიჯი (არმია) 1+1ქ - 56:49
4:41 უილსონი (არმია) 2ქ - 58:49
3:58 მილეიჯი (არმია) 2ქ - 60:49
3:01 ბოქოლიშვილი (შსს აკადემია) 3ქ - 60:52
1:55 მილეიჯი (არმია) 3ქ - 63:52
1:39 ბექაური (შსს აკადემია) 2ქ - 63:54
1:17 ვონი (შსს აკადემია) 1+1 - ორივე ააცილა
0:55 მილეიჯი (არმია) 3ქ - 66:54
0:43 პრუეტი (შსს აკადემია) 3ქ - 66:57
0:10 უილსონი (არმია) 2ქ - 68:57
დუდუ დადიანის მემორიალი. ფინალი
16 ოქტომბერი. სპორტის სამინისტროს დარბაზი
არმია-შსს აკადემია 68:57
15:10, 11:14, 13:15, 29:18
არმია წთ ქ მ პ შ ჩ დ ფ
ლაშა გამყრელიძე 26 13 2 4 4 1 0 3
ანატოლი ბოისა 23 8 4 3 0 0 1 1
ვლადიმერ ბოისა 29 5 11 2 4 1 0 3
დავით უგრეხელიძე 15 2 4 1 1 0 0 4
კურტის მილეიჯი 27 14 1 2 0 2 1 0
ბექა წივწივაძე 14 6 5 1 0 0 0 1
იოაკიმ შელბომი 17 4 8 1 2 1 0 3
დავით საყვარელიძე 7 0 1 0 4 0 0 1
მარკუს ფეისონი 6 2 1 1 1 0 0 0
ლემეინ უილსონი 23 12 3 2 0 0 1 0
ლაშა ფარღალავა 13 2 0 0 0 0 0 1
შსს აკადემია წთ ქ მ პ შ ჩ დ ფ
დეონტა ვონი 39 9 3 8 2 0 0 1
ბესიკ ლეჟავა 26 13 4 2 4 1 0 3
მერაბ ბოქოლიშვილი 35 9 2 2 1 1 0 1
ილია ლონდარიძე 7 2 5 0 2 1 0 0
ჩად პრევიტი 35 5 10 2 3 2 1 4
დავით იმნაძე 5 1 4 0 0 0 0 0
აკაკი ლომოური 8 0 1 0 0 0 0 1
ზვიად ანთაძე 4 0 0 0 0 0 0 0
ბექა ბექაური 11 2 0 0 0 0 0 1
კირკ არჩიბეკი 31 16 5 2 3 0 0 3
მსაჯები: მ. კუპატაძე, ზ. მაჩალაძე, დ. ბერეკაშვილი.
ნამატჩევს
კოტე ტუღუში ("არმიას" მწვრთნელი):
"დუდუ დადიანის მემორიალში პირველად მივიღეთ მონაწილეობა და მოხარულნი ვართ, რომ დებიუტი თასის აღებით აღვნიშნეთ.
"შსს აკადემიას" სახით ძლიერი მოწინააღმდეგე გვყავდა, თუმცა, ვფიქრობ, ბევრი შეცდომა დავუშვით, რაც სამომავლოდ გამოსასწორებელი გვაქვს".
ლაშა გამყრელიძე შეჯიბრების საუკეთესო კალათბურთელად დასახელდა და სპეციალური პრიზიც გადაეცა:
"ერთ-ერთ საუკეთესო გუნდს ვეთამაშეთ. სამი პერიოდის განმავლობაში უთანასწორო ბრძოლა მიმდინარეობდა, თუმცა ბოლოს მაინც ვიმარჯვეთ.
ფიზიკურად ვემზადებით და ამიტომაც ვერ ვუჩვენეთ საუკეთესო თამაში. ამ ეტაპზე მთელი ყურადღება ევროჩელენჯზე გვაქვს გადატანილი და ვიმედოვნებ, ამ შეჯიბრებისთვის სათანადო ფორმაში ვიქნებით.
კარგი შემადგენლობა გვყავს და "არმიაში" მეც იმიტომ დავრჩი, რომ ევროჩელენჯზე წარმატებით თამაში და მომდევნო ეტაპზე გასვლა შეგვიძლია.
დადიანის მეორიალში ასპარეზობა და გამარჯვება მნიშვნელოვანი იყო პირადად ჩემთვისაც. მოხარული და მადლობელი ვარ საუკეთესო კალათბურთელად დასახელებისთვის".
გეორგიოს კეცელიდისი ("შსს აკადემიას" მწვრთნელი):
"სამი მეოთხედის განმავლობაში მეტოქეს დიდი წინააღმდეგობა გავუწიეთ და მოგების რეალური შანსიც გვქონდა, თუმცა გადამწყვეტ პერიოდში ჩვენმა ბიჭებმა ვერ შეძლეს "არმიის" კალათბურთელების, კურტის მილიჯის და ანატოლი ბოისას შეჩერება, რომლებმაც მნიშვნელოვანი სამქულიანები ჩააგდეს".
(იბეჭდება მცირე ცვლილებით)
ყოველდღიური სპორტული გაზეთი "ლელო"
