გასული კვირა ასოციაციაში: MVP-ის პრეტენდენტთა შეხვედრა

მატჩი
საახალწლო კვირამ ბევრი საინტერესო მატჩი აჩუქა NBA-ის მოყვარულებს, მაგრამ დაძაბულობით არც ერთი ახლოს არ ყოფილა "ოკლაჰომასა" და "ჰიუსტონის" შეხვედრასთან. წელს, ამ გუნდების პირველი ორი მატჩის ბედი ბოლო წამებზე გადაწყდა და გამონაკლისი არც მესამე შეხვედრა ყოფილა.

პირველი ნახევრის შემდეგ, "ჰიუსტონი" დამაჯერებლად ლიდერობდა - 67:56, სამი მეოთხედის ბოლოს კი უპირატესობა 14 ქულამდე გაიზარდა. "ოკლაჰომას" დაუჯერებელი ქამბექი რასელ უესტბრუკის მიერ იყო ორგანიზებული, რომელიც იმ საღამოს ქულების დაგროვებაზე იყო კონცენტრირებული. ჰარდენმა კი თავისი ნორმა არ დაივიწყა, 12 შედეგიანი პასი შეასრულა და ორი მოხსნა არ ეყო სამმაგ დუბლამდე.

სირენამდე წუთნახევრით ადრე, ანგარიში თანაბარი იყო, რის შემდეგაც, მოედანზე ნამდვილი საგიჟეთი დაიწყო: სამქულიანები, საშუალო ტყორცნები მაქსიმალური წინააღმდეგობით და ფარქვეშ შესვლები. მატჩის ბედი უესტბრუკს უნდა გადაეწყვიტა, რომელმაც თავის სტილში, დაუფიქრებლად გაუშვა სამქულიანი, მაგრამ ააცილა. ბურთი ბევერლიმ აიღო.

"როკეტსს" პასუხისთვის სამი წამი რჩებოდა, რომელიც კარგად გამოიყენა. სამწამიანში ნენემ ბურთის ჩატენვა მოინდომა. ჯარიმა და ორი ზუსტი თავისუფალი ტყორცნა - "ჰიუსტონი" აგრძელებს დასავლეთი კონფერენციის ლიდერებზე დევნას.

სერია
"ოკლაჰომას" ძლევის შემდეგ, "ჰიუსტონმა" მოგებათა სერია "ორლანდოსთან" (100:93) და "ტორონტოსთან" (129:122) მატჩებში გააგრძელა და მესამე გუნდი გახდა, რომელსაც 30 მოგება დაუგროვდა. "როკეტსს" ყველაზე გრძელი მოგებათა სერია აქვს.
შემდეგ მოდის "ატლანტა", რომელიც თანდათან გამოდის სათამაშო კრიზისიდან. "ჰოქსმა" გაიმეორა სეზონის დასაწყისში ნაჩვენები შედეგი - ზედიზედ 6 მოგება.

უესტბრუკი
"ოკლაჰომას" ლიდერმა თავის აქტივს, ტრადიციულად, ორი სამმაგი დუბლი შემატა, თუმცა, ერთ-ერთი ვერ დაეხმარა მის გუნდს "შარლოტთან" (112:123) მატჩში. სამაგიეროდ, გამარჯვებისთვის საკმარისი აღმოჩნდა "დენვერთან" მოპოვებული 32 ქულა, 17 მოხსნა და 11 შედეგიანი პასი.

საერთო ჯამში, გასული კვირა "ოკლაჰომასთვის" წარუმატებელი იყო და ამან მაშინვე მოისროლა გუნდი მეშვიდე პოზიციაზე. თუმცა, უნდა აღინიშნოს დიდი სიმჭიდროვე დასავლეთის პლეი ოფის ზონაში.

ჰარდენი
"ჰიუსტონის" ლიდერი, თავის მხრივ, განაგრძობს თავად უესტბრუკის დევნას. ბოლო ექვს მატჩში ჰარდენმა ოთხჯერ შეასრულა სამმაგი დუბლი, თან ისეთ შემთხვევებში, როცა სროლა საერთოდ არ მისდიოდა. ბრძოლა მთავარ ინდივიდუალურ პრიზზე (MVP) სეზონის ბოლომდე არ დასრულდება.

მიღწევა
"კლიპერსი" დიდი ხანი წვალობდა კრის პოლის გარეშე. იყო მომენტი, როცა კალიფორნიელებმა ზედიზედ ექვსი მატჩი წააგეს. მაგრამ, გუნდის გულშემატკივართა სასიხარულოდ, ახლა, ყველაფერი ლაგდება. გამთამაშებელი მწყობრში ჩადგა და სწორედ მან ითამაშა მთავარი როლი "საკრამენტოზე" (106:98) და "მაიამიზე" (98:86) მოგებებში. "ჰიტთან" მატჩში პოლი გახდა მხოლოდ მე-10 მოთამაშე NBA-ის ისტორიაში, ვინც კარიერაში 8 ათასი შედეგიანი პასი დაარიგა.

გაცვლა
კაილ კორვერის თითქმის ხუთწლიანი მოგზაურობა "ატლანტაში" დასრულდა. თანამედროვეობის ერთ-ერთი საუკეთესო სნაიპერი, გაცვლის შედეგად, "კლივლენდში" გადავიდა და იქ ჯეი არ სმიტს შეცვლის, რომელიც დიდი ხნით გამოვიდა მწყობრიდან სერიოზული ტრავმის გამო.

ტრავმა
"მაიამი" ერთ-ერთი პირველი დანებდა პლეი ოფის საგზურისთვის ბრძოლაში. უფრო მეტიც, ერიკ სპოელსტრას შეგირდებმა გათამაშების ცხრილში "ფილადელფიაც" კი წინ გაუშვეს. ამ ყველაფერს დაემატა ისიც, რომ ტრავმა მიიღო ახალგაზრდა ფორვარდმა ჯასტის უინსლოუმ.

პერსპექტიულმა მოთამაშემ ელ ჰორფორდთან შეჯახებისას მხარი დაიზიანა და სასწრაფოდ საოპერაციო შეიქნა. სამწუხაროდ, ვერდიქტი მკაცრი აღმოჩნდა - დასვენება სეზონის ბოლომდე.

ყოველდღიური სპორტული გაზეთი "ლელო"