სტივენ კარის რეკორდი, კობი ბრაიანტის ანტირეკორდი

"გოლდენ სტეიტის" ლიდერმა სტივენ კარიმ "ინდიანასთან" მატჩში ოთხი სამქულიანი ჩააგდო, რის შემდეგაც კარიერაში 1000 ზუსტი შორეული ტყორცნა დაუგროვდა. აღსანიშნავია, რომ ამ ზღვარის მისაღწევად გამთამაშებელს 369 მატჩის ჩატარება დასჭირდა, რაც ეროვნული საკალათბურთო ასოციაციის ახალი რეკორდია.

წინა რეკორდი დენის სკოტს ეკუთვნოდა, რომელსაც 1000 სამქულიანის ჩასაგდებად 457 მატჩი დასჭირდა. იმასაც დავამატებთ, რომ NBA-ს ყველა დროის რეკორდსმენმა ზუსტი სამქულიანების რაოდენობით, ვეტერანმა მცველმა რეი ალენმა ეს ზღვარი 473 მატჩის შემდეგ გადალახა.

გ. სტეიტი-ინდიანა 117:102
23:28, 27:22, 34:26, 33:26
გ-ს: ტომპსონი (40), კარი (21+15 პასი+4 ჩაჭრა), სპეიტსი (18), ლი (13).
ი: ს. ჰილი (21), უესტი (16+7 მოხსნა), სკოლა (14+6 მოხსნა), სლოუნი (14+5 პასი), მაილზი (13), ალენი (12+9 მოხსნა).

* * *
თუ სტივ კარი დღის მთავარი რეკორდსმენი გახდა, "ლოს ანჯელეს ლეიკერსის" ლიდერი კობი ბრაიანტი გუშინდელი სათამაშო დღის მთავარ ანტიგმირად უნდა მოვნათლოთ. ვეტერანმა ვარსკვლავმა ლოსანჯელესურ დერბიში თამაშიდან 12-ჯერ ისროლა და მხოლოდ ორი ტყორცნა მოათავსა კალათში, მისმა შედეგიანობამ კი 4 ქულა შეადგინა.

ეს ქულების ყველაზე ნაკლები რაოდენობაა, რაც ბრაიანტს NBA-ს კარიერაში მოუპოვებია, როცა ერთ მატჩში მინიმუმ 12 ტყორცნას ასრულებდა. ადრე კობისთვის ყველაზე უარესი მაჩვენებელი იყო 2010 წელს "შარლოტთან" მატჩში მოგროვებული 5 ქულა.

გარდა ამისა, "ლეიკერსის" ლიდერმა გაიმეორა შედეგიანობის პირადი ანტირეკორდი იმ მატჩებში, რომლებშიც მინიმუმ 28 წუთი იმყოფებოდა მოედანზე.

კლიპერსი-ლეიკერსი 114:89
34:24, 36:24, 29:15, 15:26
კ: გრიფინი (27+9 მოხსნა+8 პასი+3 ჩაჭრა), პოლი (24+11 პასი+3 ჩაჭრა), ბარნსი (19), ჯორდანი (10+13 მოხსნა+3 დაფარება), რედიკი (10).
ლ: კლარკსონი (14), ელინგტონი (13), ჰილი (13), ლინი (12), იანგი (11), ბუზერი (10).

ყოველდღიური სპორტული გაზეთი "ლელო"