ფარის მხეცი - ესპანური "ვაველის" პუბლიკაცია გიორგი შერმადინზე

ესპანურმა გამოცემა "ვაველმა" საქართველოს ნაკრებისა და "უნიკახას" ცენტრ გიორგი შერმადინს საინტერესო პუბლიკაცია მიუძღვნა. გთავაზობთ მის თარგმანს.

"გიორგი შერმადინი გასულ სეზონში ესპანეთის ჩემპიონატის საუკეთესო ცენტრად დასახელდა. იგი ამ ზაფხულს "ანდორადან" "მალაგაში" გადავიდა და ახალ კლუბთან ეცდება საუკეთესოობის დამტკიცებას. ეს იყო ესპანური ბაზრის ერთ-ერთი ყველაზე საინტერესო ტრანსფერი.

28 წლის, 216 სმ სიმაღლის ცენტრი მალაგის "უნიკახაში" საკმარისი გამოცდილებითა და საუკეთესო კონდიციებით მივიდა. მას ზურგს უმაგრებს კარგი სეზონი "ანდორაში", სადაც საშუალოდ 15.3 ქულასა და 7.6 მოხსნას აგროვებდა 25,8 წუთში.

სიმაღლის მიუხედავად, იგი მშვენივრად გადაადგილდება მოედანზე, კარგი კოორდინაცია აქვს, იცის, როგორ გამოიყენოს თავისი ტანი, რასაც ბევრი ტანმაღალი ცენტრი ვერ ახერხებს. იგი ხშირად იგებს პოზიციას, რაც ძალიან ეხმარება შეტევების შედეგიანად დასრულებაში. სწრაფია და შეუძლია ნებისმიერი მხრიდან ჩაგდება, რაც ყოველთვის საფიქრალში აგდებს შერმადინის დამცველებს.

დაფარებისა თუ მოხსნის შემდეგ კარგად გადადის შეტევაში. მოხსნებისთვისასაც მშვენივრად იბრძვის. შესაძლოა, ბევრ ცენტრს არ მოეთხოვება მაღალი სიზუსტით საჯარიმოების ტყორცნა, მაგრამ როდესაც თავისუფალ სროლებში კარგი ხარ, შენი ფასიც მატულობს. შერმადინი კი 80-პროცენტიანი სიზუსტით სტყორცნის საჯარიმოებს. ცხადია, ჯარიმებსაც ხშირად გამოიმუშავებს. შეიძლება ითქვას, რომ გიორგი "ძველი კონტინენტის" ერთ-ერთი საუკეთესო ცენტრია.

ეჭვგარეშეა, იგი მწვრთნელის, ჟოან პლაზას სქემებში ერთ-ერთი მთავარი ფიგურა იქნება. "ანდორაში" თამაში მასზე ეწყობოდა და გუნდიც დიდ სარგებელს იღებდა. "უნიკახას" ხელმძღვანელობასაც სჯერა გიორგის. ქართველი ცენტრის დამატებამ მალაგელებს საშუალება მისცა, იოლად შელეოდნენ დეიან მუსლის. კატალონიელ მწვრთნელს სჯერა, რომ ვინი ოკოუო კარგად შეცვლის შერმადინს; ასევე სასარგებლო იქნება შედარებით ტანდაბალი, თუმცა მოძრავი ჯეიმს აუგუსტინი.

გიორგი შერმადინმა პროფესიონალი კალათბურთელის კარიერა 16 წლის ასაკში თბილისის "მაქაბიში" დაიწყო. ასაკის მიუხედავად, ძალიან სასარგებლო იყო: 28.5 ქულასა და 14.7 მოხსნას აგროვებდა. ნამდვილი მხეცი იყო. მომდევნო სეზონში ქართულ ლიგაში ვერავინ აჩერებდა: 35.1 ქულა, 16.4 მოხსნა, 4.7 პასი, 4.4 დაფარება.

ასეთი სტატისტიკით გიორგიმ არაერთი წამყვანი ევროპული კლუბის ყურადღება მიიპყრო. სატრანსფერო ომში გაიმარჯვა საბერძნეთის "პანათინაიკოსმა" და 2008 წელს შერმადინი ათენში გადავიდა. შემდეგ იყო სლოვენია, იტალია, ისრაელი და ისევ საბერძნეთი, ოღონდ ამჯერად "ოლიმპიაკოსი", რომელთან ერთადაც ევროლიგა მოიგო.

მოგვიანებით გიორგი ესპანეთში გადმოვიდა და ვიქტორ სანიკიძესთან ერთად "სარაგოსაში" შეუჩერებელი დუეტი შექმნა. გასულ სეზონში კი, როგორც მოგახსენეთ, "ანდორას" ღირსებას იცავდა და საქართველოდან წამოსვლის შემდეგ საუკეთესო სეზონი ჰქონდა. წლეულს გაცილებით ძლიერ კლუბში, გაცილებით მაღალი მიზნებისთვის საბრძოლველად გადავიდა."

(იბეჭდება მცირე ცვლილებით)
ყოველდღიური სპორტული გაზეთი "ლელო"