"მინესოტა თიმბერვულვსის" უნიკალური შანსი წარმატებისათვის

#Sixth_Man

როგორც მოგეხსენებათ, 2020 NBA Draft Lottery-ზე მინესოტა "თიმბერვულვსმა" პირველი პიკის არჩევის უფლება მოიპოვა. გთავაზობთ გზას, თუ როგორ შეუძლია ამ გუნდს, ეს შანსი ხეირიანად გამოიყენოს.

პირველ რიგში, უნდა შეგახსენოთ, რომ დრაფტის ყველაზე ,,კაშკაშა" 3 ახალგაზრდა არ სჭირდებათ (ენტონი ედვარდსი, ჯეიმს უაისმენი და ლამელო ბოლი), რამდენადაც უნდა გაგიკვირდეთ. რატომ?

ედვარდსი - "მინესოტას" უკვე ჰყავს დიენჯელო რასელისთვის (გუნდის ძირითადი გამთამაშებელი) იდეალური  როლის მქონე სამი 3 & D სტილის Shooting Guard-ები: მალიკ ბიზლი, ჯოშ ოკოგი და ჯეიკობ  ევანსი. როდესაც ასეთი დალაგებული სიტუაცია გაქვს უკანა ხაზში, ის, უბრალოდ, არ უნდა არიო.

უაისმენი - დღევანდელ კალათბურთში დიდი სისულელეა, ითამაშო 2 ცენტრით, თუნდაც, ერთ-ერთი პერიმეტრიდან კარგად ისროდეს (კარლ ენტონი-თაუნსი), მეორეს კი სისწრაფეც ჰყოფნიდეს და ენთუზიაზმიც სხვა პოზიციებთან დაცვაში დასადგომად.

ლამელო - ის და დიენჯელო ერთად? გამორიცხულია, ან ერთი უნდა იყოს, ან - მეორე. ბოლოს და ბოლოს, საშინელი დაცვაა უკანა ხაზში.

რეალურად, 2 პოზიცია სჭირდება გუნდს ძირითად ხუთეულში: Small Forward და Power Forward, მაგრამ ასე ზეპირად ვერავის მოვიყვანთ, გვჭირდება სტილების შერჩევა.

SF - დრიბლინგის უნარი სჭირდება და კარგი დაცვა. უნდა ესმოდეს ,,დამხმარის" სტატუსის აუცილებლად. რომც ვერ ისროდეს ძალიან კარგად, ეგეც არ არის კატასტროფა. გუნდს საკმარისზე მეტი კარგად მსროლელი ჰყავს.

PF - დაცვა, დაცვა და დაცვა! რატომ? იმიტომ, რომ თაუნსს ეს ვიღაცამ უნდა დაუბალანსოს, პლუს, ზომით ცენტრებთან არ უნდა იჩაგრებოდეს. გარდა ამისა, მოუწევს მოხსნაზე ორიენტირებაც, რადგან კარლი პერიმეტრზე ხშირად ამოდის და შეტევის დროს 3-წამიანში ვიღაც საჭიროა. როგორც ხედავთ, საკმაოდ კომპლექსურადაა საქმე.

ხსენებული ტიპის მძიმე ფორვარდი წლევანდელ დრაფტზე დგას, საბედნიეროდ, და ესაა ონიეკა ოკონგვუ. 206 სმ სიმაღლისა და 109 კგ წონის 4/5 ნომერი, რომელიც, მე პირადად, ძალიან მაგონებს მონთრეზლ ჰერელსა და ბემ ადებაიოს.
ძალიან ათლეტური ,,ცხოველი", ძლიერი, სწრაფი, კარგი დამცველი, გენიალური მომხსნელი, ცუდი მსროლელი და ლოუ პოსტში გამოუცდელი (რომელიც არ სჭირდება). ესაა ამ ბიჭის დახასიათება. ნუ, როგორც მიხვდით, როულ ფლეიერია.

"თიმბერვულვსისთვის" ოკონგვუს მიღება სურვილის ამბავია, მხოლოდ, თუ მას პირველ პიკად აიყვანს, მაგრამ ეს სისულელე იქნება, რადგან დრაფტის პირველ ხუთეულში არიან გუნდები, რომლებიც ედვარდსს, ლამელოსა და უაისმენს არავის დაუთმობენ. შესაბამისად, საჭიროა სარფიანი ტრეიდი, რათა შეგვრჩეს ტოპ პიკიც და შევავსოთ სხვა ცარიელი ადგილებიც.

ამისათვის გთავაზობთ, ჩემი აზრით, ყველაზე ოპტიმალურ სამმაგ ტრეიდს:

"მინესოტას" პირველი და 33-ე პიკი, + ჯარეთ ქალვერი და ბულსის 44-ე პიკი - "ატლანტა ჰოუქსში".

"ჰოუქსის" მე-6 და "ვულვსის" მე-17 პიკები - "ჩიკაგო ბულსში".

"ბულსის" მე-4 პიკი, ქემერონ რედიში, დეანდრე ჰანთერი და ბრუნო ფერნანდო - "მინესოტა თიმბერვულვსში".

ჩემი აზრით, სამივე გუნდს აწყობს ეს სცენარი:

"მინესოტა" - იღებს ხსენებულ 4 ნომერს და, ასევე, ხსენებული ტიპის ახალგაზრდა მსუბუქ ფორვარდსაც, რომელსაც ბონუსად კარგი სროლა მოჰყვება (რედიში) და კომბო ფორვარდს, რომელიც ბენჩიდან 3-ზეც შემოვა და 4-ზეც, თავისი კარგი დაცვით და სროლით (ჰანთერი). + თაუნსის შემცვლელ ცენტრსაც (ფერნანდო).

"ჰოუქსი" - მიიღებენ მას, ვინც განსაკუთრებულად უნდათ - ენტონი ედვარდსს და შეკრავენ ასეთ ხუთეულს:
ტრეი იანგი, ენტონი ედვარდსი, ჯარეთ ქალვერი, ჯონ კოლინსი, კლინტ კაპელა.

"ბულსი" - აქ ცოტა რთულადაა საქმე. თუ ამ გუნდმა დაიჯერა (რატომღაც), რომ ლამელო ბოლი (რომელიც ძალიან უნდათ) მე-4 არჩევნამდე მოაღწევს, ამ პიკს არ დათმობს, თუნდაც განსხვავება სულ 2 პიკსა და, ბონუსად, პირველი რაუნდის კიდევ ერთ პიკში იყოს. მაგრამ ესეც არაა პრობლემა "თიმბერვულვსისთვის", რადგან ოკონგვუ, დიდი ალბათობით, მე-6-მდე ჩამოაღწევს.

გაჩნდება კითხვა, თუ ეს ბიჭი მეექვსემდე ჩამოაღწევს, რატომ ვაძლევთ სხვას მე-17 არჩევანს? იმიტომ, რომ მე-4 პიკი ჩვეულებრივი თავის დაზღვევაა და ამით არაფერი მოაკლდებათ ,,მგლებს", თუ არ მოემატებათ.

სანამ იმაზე ვისაუბრებ, თუ როგორ "მინესოტა თიმბერვულვსს" ვიღებთ, ჯერ, ვახსენოთ ერთი-ორი დეტალი. გუნდს ჰაერივით დასჭირდება ვეტერანი ფოინთ ფორვარდი - ევან ტერნერი და აუცილებლად უნდა გაუხანგრძლივოს კონტრაქტი. პლუს, კარგი იქნება ჯერამი გრანტის ყიდვაც, თუ იაფად მოუვათ. სხვა შემთხვევაში, არ ღირს, რადგან ჯეიმს ჯონსონის 16 მილიონი აქვთ ,,შეტენილი"... თუ ეს არ გამოუვათ, დეანდრე ჰანთერი იქვეა!

მოკლედ - ბირთვი:

PG - დ.რასელი/ე.ტერნერი
SG - მ.ბიზლი/ჯ.ოკოგი/ჯ.ევანსი
SF  - ქ.რედიში/დ.ჰანთერი
PF  - ო.ოკონგვუ/ჯ.გრანტი
C    - კ.ე.თაუნსი/ბ.ფერნანდო

რეზერვი:
SF  - ჯ.ლეიმანი
PF  - ჯ.ჯონსონი/ხ.ერნანგომეზი (თუ დაიტოვეს)
C    - ო.სპელმანი

p.s. ძალიან კარგი გუნდი დგება, მაგრამ აქაცაა ერთი ,,მაგრამ", რომელსაც ყველაფრის გაფუჭება შეუძლია - მწვრთნელი...

წყარო: Sixth Man - ბლოგი კალათბურთი