ნაკრების მოთამაშეები ჩვენს მხარეს არიან - შიო ხეცურიანი და კახა შენგელია გაერთიანდნენ

11 დეკემბერს დაგეგმილ კალათბურთის ფედერაციის საპრეზიდენტო არჩევნებში მონაწილეობას ორი კანდიდატი მიიღებს.

დღეს კახა შენგელიამ და შიო ხეცურიანმა პრესკონფერენციაზე გაერთიანების შესახებ განაცხადეს.

"მე არ ვაკეთებ არჩევანს ცუდსა და უარესს შორისს. მე ვაკეთებ არჩევანს უკეთესობისკენ. გავეცანი შიოს პროგრამას და ვთვლი, რომ ეს არის კარგი ქართული კალათბურთისთვის. კალათბურთი არის გადასარჩენი. ჩვენი გაერთიანებით გაერთიანდება ჩვენი ელექტორატი.

ეს გადადგმული ნაბიჯი მიმაჩნია სასიკეთოდ. დღეიდან მე მოვიაზრები შიოს გუნდის წევრად. ფედერაციას აქვს მორგებული ყველაფერი თავის თავზე. ჩვენ გავერთიანდით, ნაკრების მოთამაშეები ჩვენს მხარეს არიან და მინდა, რომ ყველაფერი სასიკეთოდ შეიცვალოს", - ამბობს კახა შენგელია.

"მადლობა კახა შენგელიას ამ გადაწყვეტილებისთვის. დღეიდან, ერთიანი ძალებით ვეცდებით დავასრულოთ ის უსამართლობა, რაც კალათბურთის ფედერაციაში ხდება და დავამარცხოთ კალათბურთის ფედერაციის მმართველი ჯგუფის წარმომადგენელი პაატა გურასპაული.

კიდევ ერთხელ ვაცხადებ, რომ ის ნდობა, რომელსაც მე მიცხადებენ ეს ადამიანები, არის ჩემთვის დიდი სიხარულიც და ამავდროულად, პასუხისმგებლობაც", - განაცხადა ხეცურიანმა.