"არმაზი" - მარნეულის სახელით პლეი-ოფისთვის

AutoSharing Option
ბოლო წლებში თბილისის "არმაზი" საქართველოს ჩემპიონატის უმაღლეს ლიგაში მუდმივად ადგილის შესანარჩუნებლად იბრძოდა. როგორც ჩანს, მომავალ სეზონში ვითარება რადიკალურად შეიცვლება...

კლუბისა და მარნეულის რაიონის ხელმძღვანელობას შორის გაფორმებული ხელშეკრულების თანახმად, "არმაზი" საქართველოს ჩემპიონატში მარნეულის სახელით ითამაშებს და რაიონში რაგბის პოპულარიზაციაზე იზრუნებს. პირველი ნაბიჯები უკვე გადადგმულია: "არმაზმა" რეგიონში მწვრთნელები მიავლინა და მათი ხელმძღვანელობით 200-მდე ქართველი, აზერბაიჯანელი და სომეხი ბავშვი ერთად ვარჯიშობს.

"ჩვენი კლუბი მარნეულის რაიონში რაგბის განვითარებაზე იზრუნებს. აქ 200-მდე ბავშვი უკვე ვარჯიშობს, ისინი და მათი მშობლები დამეგობრდნენ. ეს ამ პროექტის უმნიშვნელოვანესი ნაწილია.
რაგბის პოპულარიზაციის მიზნით, სამომავლოდ, მარნეულში სტადიონს გამოგვიყოფენ, სადაც ჩემპიონატის მატჩებს გავმართავთ" - თქვა "არმაზის" მთავარმა მწვრთნელმა ირაკლი მაჩხანელმა rugby.ge-სთან საუბრისას.

იქამდე "არმაზი" საშინაო მატჩებს თბილისში გამართავს. ვაზისუბნის მეოთხე მიკრორაიონში დაწყებული მოედნის მშენებლობის დასრულება ოქტომბრის დასაწყისში იგეგმება.

სეზონს "არმაზი" მნიშვნელოვნად გაძლიერებული შემადგენლობით ხვდება. თუმცა გუნდი რამდენიმე მორაგბემაც დატოვა, მათ შორის, გარემარბმა მურაზ გიორგაძემ. "არმაზს" დაემატნენ "ბორჯღალოსანთა" მგეზავი რეზო ჯინჭველაშვილი (ბაგრატი); საქართველოს ახალგაზრდული ნაკრების წევრები, ილია სპანდერაშვილი (არმია) და გიორგი კვესელაძე (ლელო); საქართველოს შვიდკაცა რაგბის ნაკრების წევრი ალექსანდრე ხუციშვილი (ყოჩები).

სიახლეა "არმაზის" მწვრთნელთა შტაბშიც. გუნდში საქართველოს ახალგაზრდული ნაკრების მწვრთნელები ილია მაისურაძე და ლადო კილასონია იმუშავებენ.

გუნდმა სეზონისთვის მზადება თბილისში დაიწყო, მერე კი ასპინძაში არსებულ სარაგბო ბაზას მიაშურა და იქ 19 აგვისტომდე დაჰყო. საწვრთნელი შეხვედრის გამართვა კი პატარძეულის "ვეფხვებთან" იგეგმება.

თუ განხორციელებული ცვლილებების მიხედვით ვიმსჯელებთ, მარნეულის "არმაზმა" წლეულს, მინიმუმ, პლეი-ოფში მოხვედრისთვის უნდა იბრძოლოს. პირველი ტურის მატჩში არმაზელები შინ დაუპირისპირდებიან ვიცე-ჩემპიონ "ბათუმს".

არმაზის განაცხადი
შერკინება: დავით ფხაკაძე, თორნიკე ჯიბლაძე, ზვიად ესართია, არჩილ გაგნიძე, გოგა ხუროშვილი, ვაჟა თაგაური, გიგა ფრიდონიშვილი, კობა ჯიმშელეიშვილი, ბესო ბარბაქაძე, საბა ერაძე, ილია სპანდერაშვილი, ოთარ მინაშვილი, გიორგი სოსელია, თენგო გიგოლაშვილი, ბექა გუგეშაშვილი, გიორგი ჭურაძე, ზაურ კაჭარავა.
უკანა ხაზი: ლაშა მამუჩარაშვილი, ლუკა დვალიშვილი, საბა ხურცილავა, რევაზ ჯინჭველაშვილი, გიორგი კვესელაძე, ბადრი ლიპარტელიანი, ნიკოლოზ გიგაური, სანდრო სვანიძე, ვილიამ კაიფაჯიანი, ნიკა წიკლაური, ვაკო შალიკაშვილი, ალექსანდრე ხუციშვილი, ბექა ფრუიძე, ზურა გოგლიჩიძე, ვალერი ლეგაშვილი, დათო ალიბეგაშვილი, გიგა ჩაბაკაური, შახო ჯავახია, ნუკრი გოგოჩაშვილი, ანრი გორდაშვილი, ნოდარ გურგენიძე, გიორგი ზაგაშვილი, ვასიკო ყველაიძე.

(იბეჭდება მცირე ცვლილებით)
ყოველდღიური სპორტული გაზეთი "ლელო"
მკითხველის კომენტარები / 0 /
კომენტარი ჯერ არ გაკეთებულა.

სიახლეები პოპულარული