დიდი 10: "ლოკომოტივი" - "არმია" 40:22

თბილისის ‘ლოკომოტივმა’ დიდი 10-ის მიმდინარე სეზონის სტარტზე ორი თამაში წააგო, რის შემდეგაც 6-მატჩიანი მოგებების სერია გამოაცხო, აქედან ბოლო სამი ბონუს ქულითაა და სატურნირო ცხრილში მეორე ადგილს ინარჩუნებს.

საგულისხმოა, რომ რკინიგზელებს ერთი გამოტოვებული თამაში აქვთ და პოტენციურად, ამ ეტაპზე ლიდერის, ქუთაისის ‘აიას’ მთავარი კონკურენტები არიან.

პირველი წრის დასკვნითი ტურის პირველ მატჩში ‘ლოკომოტივმა’ დედაქალაქურ დერბიში ‘არმიას’ 40:22 სძლია. რკინიგზელებმა 3 ლელო მიიღეს, თავად 6 გაიტანეს და მეტოქეს ბონუს ქულა არ დაანებეს.

‘ავჭალაზე’ გამართული შეხვედრის დებიუტში ‘არმიელთა’ ფლანკერმა ნიკო აფციაურმა გაიბრწყინა და ინდივიდუალური გარღვევა ლელოთი დააგვირგვინა, რასაც შავლეგ მახარაშვილის ზუსტი გარდასახვა მოყვა. ამან ‘ლოკომოტივზე’ ვერ იმოქმედა და მეტოქის წითელ ზოლში გატარებული 6 წუთის შემდეგ ვახტანგ ამირანაშვილმა ლელო გაქვითა. მან 5-მეტრა შერკინებიდან შეუტია და მისი გამჩერებელი არავინ გამოჩნდა, ხოლო ვახტანგ კავთიძემ გარდასახვით წონასწორობა აღადგინა.

მახარაშვილმა მე-15 წუთზე გატანილი ჯარიმით ‘არმია’ ერთხელაც დააწინაურა, თუმცა ‘ლოკომოტივმა’ დიდი ტერიტორიული და სათამაშო უპირატესობის ლელოებში ასახვა მოახერხა და 28-ე წუთზე მოპოვებული ლიდერობა ხელიდან აღარ გაუშვია. რკინიგზელების გამუდმებული იერიშების შემდეგ, მარჯვენა ფლანგზე გიორგი ჩახვაძე უყურადღებოდ დარჩა და მისი ლელო კავთიძემ გარდასახა. პირველი ტაიმის გაწითლებულ დროზე ‘ლოკომოტივმა’ დერეფნიდან მოლით შეუტია და ფარნა გასვიანის ლელოს ამჯერადაც ზუსტი გარდასახვა მოყვა - 21:10.

მეორე ტაიმიც პირველის მსგავსად დაიწყო - ‘არმიამ’ მე-3 წუთზე ლელო გაიტანა და მისი შემოქმედი კვლავ აფციაური გახდა. ის მარცხენა ფლანგზე გაიქცა, დაახლოებით 40 მეტრი ირბინა, ბოლო მცველი აიყვანა და დიმიტრი კალანდაძეს ოფლოუდი ამოუგდო. მახარაშვილმა გარდასახა, თუმცა ზვიად მაისურაძემ მეტოქეს გახარება არ აცადა, დაახლოებით 3 წუთში ახლოდან შეუტია და ძალისმიერი ლელო გაიტანა.

ასეთი სათამაშო უპირატესობის ფონზე, რკინიგზელები შეცდომებს უშვებედნენ, განსაკუთრებით დერეფანში, თუმცა მორიგი შეცდომის შემდეგ არმიელებიც შეცდნენ, კავთიძემ გადაცემა ჩაჭრა და ლელო ძელებსშუა გაიტანა, რითაც ‘ლოკომოტივი’ პრემიის ზონაში შეიყვანა - 33:17. მალე ‘არმიამ’ აფციაური სინბინით დაკარგა, თუმცა მეტოქის ლელოსთან 5 მეტრში, ‘ლოკომოტივმა’ დერეფანში კვლავ არაზუსტად ითამაშა და სწრაფი კონტრშეტევა მიიღო, გოდერძი ჭინჭარაულმა ის ცენტრამდე აიტანა და ფეხით მარცხენა ფლანგზე დიმიტრი კალანდაძეს გადაუკიდა. რკინიგზელები დაჯარიმდნენ და სინბინით გიორგი ჩახვაძე დაკარგეს, ხოლო დავით გიგაურმა სწრაფი გათამაშების შემდეგ ლელო გაიტანა.

მალე სინბინით ლევან დარასელიაც დაისაჯა, თუმცა 13-მა ‘ლოკომოტიველმა’ ერთით მეტ მეტოქეს იქით შეუტია, გიორგი ცუცქირიძემ უპირატესობა შექმნა და პასის ჩაჭრისთვის ყვითელი ბარათი მახარაშვილმა მიიღო, ხოლო დაჩი კოპაძემ ჯარიმის გათამაშების შემდეგ დაცვის ზღუდე გადალახა და ‘ლოკომოტივს’ ბონუსი დაუბრუნა, ხოლო კავთიძემ საბოლოო შედეგი დააფიქსირა - 40:22.

ხვალ თბილისში ‘ლელო-არენაზე’, 14 საათზე ‘ლელო-სარასენსი’ მარნეულის ‘არმაზს’ უმასპინძლებს, 16 საათზე ქუთაისში ‘აია’ რუსთავის ‘ხარებს’ მიიღებს, ხოლო 18:30 საათზე კარდიფში, ‘პრინციფალითი სთედიუმზე’ ბორჯღალოსნები უელსის ნაკრებს შეხვდებიან.
ლელო,არმია

მომზადებულია Rugby.ge-ს მიხედვით