"ბორჯღალოსნები" "ფრანგ ბარბაროსებთან" მატჩისთვის მზადებას შეუდგნენ

AutoSharing Option
31 მაისს, საღამოს 20 საათზე ბორჯღალოსნები ‘დინამო არენაზე’ ‘ფრანგ ბარბაროსებს’ ერკინებიან. მეტოქე თბილისში დღეს ღამით ჩამოდის, მილთონ ჰეიგის შეგირდებმა კი, ნაშუადღევს გულშემატკივრისთვის ღია ვარჯიში გამართეს.

ბორჯღალოსნებმა დერეფნიდან და შერკინებიდან შეტევითი კომბინაციები დაამუშავეს, რის შემდეგაც ერთმანეთში მაღალი ინტენსივობის თამაში გამართეს. ღია ვარჯიშის დასრულების შემდეგ, დაცვის მწვრთნელმა ლევან მაისაშვილმა მზადების შესახებ და მომავალი მატჩის მოლოდინებზე ისაუბრა:

„იმ მორაგბეებთან ერთად, რომლებიც დიდი 10-ის კლუბებში თამაშობენ და საფრანგეთიდან ადრე შემოგვიერთდნენ, დიდი ხანია ვემზადებით. დანარჩენებიც ერთი კვირაა ჩვენთან არიან. სამწუხაროდ, გვაქვს ტრავმები. ჩვენთვის მნიშვნელოვანია, რომ
ივნისის ტესტების წინ მაღალი დონის მოსამზადებელი თამაში გვექნება, რისი მსგავსიც აქამდე არ ყოფილა და ეს მომდევნო შეხვედრებშიც დაგვეხმარება.

მეტოქე საფრანგეთის მეორე დივიზიონის ნაკრებია, რომელიც გამოცდილი და ძლიერი მოთამაშეებითა დაკომპლექტებული. რა სტილს შემოგვთავაზებენ ‘ფრანგი ბარბაროსები’ არ ვიცით. ჩვენის მხრივ ვეცდებით, რომ დავხვეწოთ თამაში როგორც შეტევაში, ასევე დაცვაში“.

გუნდის კაპიტანი გიორგი ნემსაძე ძლიერ მეტოქესთან კარგი თამაშის მოლოდინშია:

„ჩვენი სურვილია, რომ სულ ასეთ კარგ გუნდებთან გვქონდეს თამაში. ‘ფრანგი ბარბაროსები’ არცერთი ქვეყნის ეროვნული ნაკრები არაა, მაგრამ ძლიერი მოთამაშეებითა დაკომპლექტებული. კარგი თამაში იქნება და ვეცდებით 31-ში მეტოქე სავსე ტრიბუნების წინაშე დავამარცხოთ.

პრო დე2 საკმაოდ მაღალი დონის ჩემპიონატია და მისგან გაკეთებული ნაკრები უდაოდ ძლიერი გუნდი იქნება. ვთვლი, რომ ის საფრანგეთის ეროვნულ გუნდს ბევრი არაფრით ჩამოუვარდება. საქართველოში თამაშისას ჩვენი პრიორიტეტი მუდამ გამარჯვებაა და ვეცდებით გულშემატკივარი გავახაროთ“.

ერთწლიანი შესვენების შემდეგ ნაკრებში დაბრუნებით ბედნიერია თამაზ მჭედლიძე:

„ერთი წელია საქართველოს ნაკრებში არ ვყოფილვარ და ძალიან ბედნიერი ვარ გუნდში დაბრუნებით. მეორეს მხრივ, ეს უდიდესი პასუხისმგებლობაა, რადგან გულშემატკივრებს და მწვრთნელებს უნდა ვაჩვენო, რომ ნაკრებში ყოფნას ვიმსახურებ. მეტოქის შემადგენლობას გადავხედე და მოთამაშეთა 90%-ს ვიცნობ. შემიძლია გითხრათ, რომ ძალიან ძლიერი გუნდის წინააღმდეგ ვითამაშებთ, გულშემატკივარს მოვუწოდებ, რომ მოვიდნენ სტადიონზე, ჩვენც მაქსიმუმს გავიღებთ და ვეცდებით გამარჯვებით გავახაროთ“.

მომზადებულია rugby.ge-ს მიხედვით
მკითხველის კომენტარები / 0 /
კომენტარი ჯერ არ გაკეთებულა.

სიახლეები პოპულარული