მარტყოფში "ბორჯღალოსნების" ზაფხულის შეკრება დაიწყო

"ბორჯღალოსნების" 37-კაციანი, გაფართოებული შემადგენლობა, ზაფხულში გასამართი ოთხი თამაშისთვის მოსამზადებლად შეკრებაზე „მარტყოფის“ ბაზაზე შევიდა.

26 ივნისს საქართველო 2021 წლის რაგბი ევროპის ჩემპიონატის დასკვნით მატჩში ნიდერლანდებს თელავში უმასპინძლებს და თასს ოფიციალურად ჩაიბარებს; 2 და 9 ივლისს "ბორჯღალოსნები" სამხრეთ აფრიკაში, მოქმედ მსოფლიო ჩემპიონ "‘სპრინბოქსს" ეთამაშება, რომელიც 2019 წლის ფინალის შემდეგ პირველად ითამაშებს; 17 ივლისს „დინამო არენაზე“ შოტლანდიას დავუხვდებით. ის ჯერჯერობით ტიერ1-ის ერთადერთი ქვეყანაა, რომელიც საქართველოში მეორედ ჩამოდის.

„მოსამზადებლად ძალიან კარგი პირობებია და რაც მთავარია, კოვიდ-რეგულაციებიდან გამომდინარე, სრულიად იზოლირებულნი ვართ. ამ ორ კვირას გარე სამყაროსგან მოწყვეტილნი, ჩვენ და ბაზის პერსონალი ერთად გავატარებთ“ – ამბობს "ბორჯღალოსნების" მთავარი მწვრთნელი ლევან მაისაშვილი.

ნიდერლანდებთან მატჩის კვირაში, გაფართოებული რაზმი 33 მორაგბემდე შემცირდება. მანამდე არსებული კონტინგენტი სამ ჯგუფადაა გაყოფილი:

„ზაფხულის ტურნეს სიმძიმიდან და მნიშვნელობიდან გამომდინარე, არსებული რესურსით მაქსიმალურად ძლიერი შემადგენლობა შევარჩიეთ. სამწუხაროდ, გვაკლია ტრავმირებული მოთამაშეები. გარდა ამისა, ტოპ 14-სა (ერთი ეტაპი) და პრო დ2-ში პლეი-ოფები ახლა დასრულდა და ამ გუნდის მოთამაშეები ჯერ არ ჩამოსულან. "რასინგი" ნახევარფინალშია და გურამ გოგიჩაშვილი გუნდთან ერთადაა. მოგვიანებით დაგვემატება ბექა გიგაშვილი, რომელსაც ჯანმრთელობის მცირე პრობლემა აქვს. შეკრება ადრე უნდა დაგვეწყო, თუმცა დიდი 10-ის ფინალმა გადაიწია და გვიან შემოგვიერთდნენ ამ კლუბების მოთამაშეები“.

„შეკრების პირველ კვირაში შემადგენლობა სამ ჯგუფად გვეყოლება გაყოფილი. ძირითადი ბირთვის გარდა, ცალკე ვარჯიშობენ ლიმიტირებული მორაგბეები. ესენი არიან მოთამაშეები, რომლებმაც ცოტა ხნის წინ გადაიტანეს კოვიდი ან ასრულებენ ტრავმისშემდგომ რეაბილიტაციას. ისინი ცალკე, ფიზმომზადების ჯგუფის დაკვირვების ქვეშ ვარჯიშობენ. ასევეა რისკ-ჯგუფი – ფინალში მოთამაშე მორაგბეები, რომლებიც იზოლირებულად ივარჯიშებენ. კვირაში სამჯერ გავიკეთებთ ტესტებს და როგორც კი ვირუსის გავრცელების რისკი გამოირიცხება, გუნდის საერთო სქემასა და მონახაზზე დავიწყებთ მუშაობას. გუნდის სრულად შეკრება ნიდერლანდებთან თამაშის კვირამდე ვერ მოხერხდება. ამ ერთ კვირას გამოვიყენებთ უნარების გასაუმჯობესებლად და სათამაშო სქემის მცირე დეტალებზე ვიმუშავებთ“.

გაფართოებულ რაზმში შვიდი დებიუტანტია – მიხეილ ორაგველიძე, ლუკა ნიორაძე, ლუკა ჯაფარიძე, მიხეილ ბაბუნაშვილი, ილია სპანდერაშვილი, ოთარ ლაშხი და დავით მესხი.

მაისაშვილის ფიქრობს, რომ ეს კონკურენციას აამაღლებს და სიღრმეებს გაზრდის:

„გამომდინარე იქიდან, რომ გიგაშვილი და გოგიჩაშვილი გვიან ჩამოდიან, პირველი ნომრის დაკლების რისკი გვქონდა. საჭირო იყო დაზღვევა და მსჯელობის შემდეგ არჩევანი ორაგველიძეზე შევაჩერეთ, რომელიც ძლიერია სტატიკაში. პირველ ხაზში ასევე გვყავს ბურჯი ლუკა ჯაფარიძე და კვაჭი ლუკა ნიორაძე. ჯაფარიძე იმ ბურჯთაგანია, რომელსაც ტოპ 14-ში დიდი სათამაშო დრო ჰქონდა და მას ყურადღებით ვაკვირდებოდით. ის გვყავდა 3-დღიან შეკრებაზე საფრანგეთში, კარგია სტატიკაში და საინტერესო შეტევაში. პრო დე2-ში საკუთარ პოზიციაზე საკმარისი სათამაშო დრო ჰქონდა ახალგაზრდა ნიორაძეს და მას შეკრებაზე დავაკვირდებით“.

„მეორე და მესამე ხაზში ბაბუნაშვილს და სპანდერაშვილს ვნახავთ. მათ 20-წლამდელთა ნაკრებიდან ვიცნობთ. სპანდერაშვილმა რუსეთის ჩემპიონატი მაღალ დონეზე ჩაატარა, ასევე გვყავდა რეზერვად კალინინგრადში გამართულ შეხვედრაში. ლაშხი გაფართოებულ შეკრებაზე აქამდეც გვყავდა. ის ამ პოზიციისთვის საჭირო უნარებს და იქს-ფაქტორს ფლობს. წელს რუსეთში კარგი სეზონი ჰქონდა და ტრავმის შემდეგ პლეი-ოფებსა და ფინალში ბრწყინვალედ ითამაშა მესხმა. დათო ძალიან სწრაფია, რაც ჩვენთვის მნიშვნელოვანია“.

გამოძახებულთა შორისაა ნიკა ხატიაშვილი, რომელმაც "ბორჯღალოსნების" კვართით ბოლოს 2017 წელს ითამაშა. ასევე - გიორგი ცუცქირიძე. მან ტრავმამდე ბოლო საერთაშორისო მატჩი 2020 წლის თებერვალში ჩაატარა.