სუპერ თასი | "შავი ლომი" ტიტულის დაცვას ბათუმიდან იწყებს

რაგბი ევროპის სუპერ თასის ჩემპიონი "შავი ლომი" ტიტულის დაცვას ქართული დერბით იწყებს. 11 სექტემბერს ის „ბათუმი არენაზე“ საქართველოს ჩემპიონ "ბათუმს" 16:30 საათზე ეთამაშება.

2021/2022 წლების სუპერ თასის გამარჯვებული უკვე ბათუმშია. მანამდე გუნდმა 10-დღიანი შეკრება გაიარა „აია არენაზე“, სადაც ამ სეზონში საშინაო შეხვედრებს გამართავს. ტრავმის გამო პირველ შეხვედრას ექვსი მოთამაშე ტოვებს. ესენი არიან ლაშა ხმალაძე, სოსო მათიაშვილი, ნიკა ხატიაშვილი, თენგიზ ზამთარაძე, ტარიელ დონაძე და გრიგორ ქერდიყოშვილი.

„სამწუხაროა, რომ ამდენი ტრავმირებული გვყავს. მათ ნაწილს ძველი ტრავმები გადმოყვა. ქერდიყოშვილმა ოპერაცია საფრანგეთში გაიკეთა, მაგრამ ის წარმატებული არ აღმოჩნდა და ახლიდან დაჭირდა ქირურგიული ჩარევა. მოთამაშეთა ნაწილს ძველი ტრავმები გადმოყვა. გვაქვს იმედი, რომ მათგან რამდენიმე მალე დაგვიბრუნდება, ნაწილს კი შედარებით გრძელვადიანი ტრავმა აქვს“ – ამბობს მაისაშვილი.

სამწვრთნელო შტაბმა უკვე დაასახელა სათამაშო შემადგენლობა. სასტარტო 15-ეულში ის მორაგბეები არიან, რომლებიც შარშანაც იცავდნენ "შავი ლომის" ღირსებას, მარქაფაში კი 5 დებიუტანტია:

„ახალი სეზონისთვის ძირითადი ბირთვი შევინარჩუნეთ, თუმცა გვაქვს გარკვეული ცვლილებები. შემადგენლობაში ისეთი მოთამაშეებიც არიან, რომლებსაც ტრავმის გამო დიდი დრო გაუცდათ (ნიკო აფციაური და მიხეილ გაჩეჩილაძე) და საინტერესო იქნება მათი საქმეში ხილვა. ხუთი დებიუტანტია მარქაფაში – გიორგი ჭყოიძე, დათო აბდუშელიშვილი, გიორგი ჩხარტიშვილი, მიხეილ გაჩეჩილაძე და გიორგი მარგალიტაძე. ეტაპობრივად ვეცდებით, რომ ყველას მივცეთ საკმარისი სათამაშო დრო. პირველი შეხვედრისთვის შევარჩიეთ ის მორაგბეები, რომლებიც ამ ეტაპისთვის ყველაზე უკეთ არიან მომზადებულები“.

მაისაშვილი მიიჩნევს, რომ ‘შავი ლომი’ სეზონის პირველ თამაშს მომზადებული ხვდება და მეტოქის შესახებ საუბრობს:

„ქუთაისში მოსამზადებლად ყველანაირი პირობა გვქონდა. ვფიქრობ, მომავალი შეხვედრისთვის მზად ვართ და ვიმედოვნებ, ნამუშევარს მოედანზე კარგად გადავიტანთ. ‘ბათუმის’ სუპერ თასში ჩართვა ბოლო მომენტში გადაწყდა. მანამდე მათ ნაცვლად სუპერ თასში იტალიური კლუბის მონაწილეობა განიხილებოდა, იყვნენ სხვა მსურველებიც, თუმცა რაგბის კავშირმა დიდი სამუშაო გაწია, რათა ევროტურნირებში ‘ბათუმი’ მოხვედრილიყო“.