შესანიშნავი თამაშით განაახლა სეზონი ახალგაზრდა მორაგბეებით დაკომპლექტებულმა ქუთაისის "აიამ", რომლის მეტოქეც ინგლისელი, სამხრეთაფრიკელი და ახალზელანდიელი ლეგიონერებით გაძლიერებული "ბათუმი" იყო. მატჩი საკმაოდ ძლიერი ქარის ფონზე მიმდინარეობდა, რამაც თამაშში გარკვეული კორექტივები შეიტანა, თუმცა საბოლოო შედეგზე გავლენა არ ჰქონია.
პირველ ტაიმში ზურგის ქარი სტუმართა მხარეს იყო, მაგრამ მათ ეს ბუნებრივი უპირატესობა ვერ გამოიყენეს. ბესიკ ხამაშურიძისა და კობა გიორგაძის გუნდმა თავიდანვე მოიპოვა უპირატესობა და სწრაფი ლელოთი დაწინაურდა.
მასპინძლებმა მრავალფაზიანი შეტევა განახორციელეს, ჯერ მარაო გაშალეს, შემდეგ მოლით მიაწვნენ, ქუთაისელთა მარჯვენაფლანგელ ბექა ტორაძისკენ კარგი გადაცემა გააკეთეს,
თამაში კვლავ ბათუმელთა ნახევარზე მიმდინარეობდა. ქუთათურები მწყობრად და ლამაზად უტევდნენ, თანაც მეტოქეზე ნაკლებ შეცდომებს უშვებდნენ. მათი გარჯა სულ მალე მეორე გატანილ ლელოში აისახა. რამდენიმეფაზიანი შეტევა გიორგი ჯავახიამ დააგვირგვინა, ბაბუნაშვილმა კი გარდასახვით ანგარიში 12:0 გახადა.
ამის შემდეგ ბათუმელებიც გააქტიურდნენ და ზედიზედ ორჯერ ჯარიმის დარტყმის უფლება მოიპოვეს. ზღვისპირელთა მგეზავმა ზვიად ოდიშარიამ ორივე საჯარიმო ზუსტად დაარტყა და ანგარიში შეამცირა - 12:6. სტუმრების უპირატესობა დიდხანს არ გაგრძელებულა. "აია" ყველა კომპონენტში სჯობდა მეტოქეს და 34-ე წუთზე კიდევ ერთხელ შეაღწია მეტოქის ლელოში. მასპინძელთა მრავალფაზიანი და ძალისმიერი შეტევის შემდეგ ბურთი "აიას" მღლეტელმა ბადრი დანგაძემ იგდო ხელთ და მესამე ლელო გაიტანა - 17:6.
მატჩის მეორე ნახევარში ქარი უკვე მასპინძელთა სასარგებლოდ ქროდა და ისედაც კარგად მოთამაშე ქუთაისელებმა მთლად გაილაღეს. ბათუმელებს განსაკუთრებით მასპინძელთა ახალგაზრდა გარემარბების - გიორგი ფრუიძის, ბექა ტორაძისა და ფულბეკ ზურაბ ძნელაძის შეჩერება უჭირდათ.
სტუმრებმა, რომელთა ლეგიონერებმაც თავი ვერაფრით დაგვამახსოვრეს, 20 წუთი კიდევ გაუძლეს მეტოქეს, შემდეგ კი დაღლაც დაეტყოთ და "აიასთვის" წინააღმდეგობის გაწევაც ვეღარ შეძლეს. 61-ე წუთზე ზურაბ ძნელაძემ ზღვისპირელებს ხაზი გაუჭრა, დიდი სიჩქარე აკრიფა და ბურთი ძელებს შორის დაამიწა.
ბაბუნაშვილის ნაცვლად მოედანზე შესულმა რეზო ჯინჭველაშვილმა ხელსაყრელი პოზიციიდან გარდასახვა ზუსტად დაარტყა.
მატჩის დასრულებამდე მასპინძლებმა კიდევ ორი ლელო მიითვალეს. ლამაზად გათამაშებული მარაოს შემდეგ გიორგი ფრუიძე შეიჭრა ჩათვლის მოედანში და ჯინჭველაშვილმაც ზუსტად გარდასახა. ბოლო წუთზე კი, მოლით შეტევისას სტუმრებმა ტორაძე ვერ შეაკავეს და მანაც თავისი მეორე ლელო გაიტანა.
ჯინჭველაშვილი გარდასახვისას კვლავ ზუსტი იყო და საბოლოო ანგარიშიც დააფიქსირა - 41:6. ბრწყინვალე სტილში გამარჯვებასთან ერთად, "აიამ" პრემიალური ქულაც მიითვალა და ლიდერებს წამოეწია.
აია-ბათუმი 41:6
აია (15-9) ძნელაძე, ბ. ტორაძე, ფრუიძე, ირემაძე, კვერნაძე, ბაბუნაშვილი (ჯინჭველაშვილი 62.), თ. თუთბერიძე (ზ. თუთბერიძე 75.); (1-8) რატიაშვილი, სალდაძე (გ. ტორაძე 55.), ულუმბელაშვილი (ჩხიკვაძე 64.), შალამბერიძე, ჯავახია (ჩიტეიშვილი 46.), რევიშვილი, დანგაძე, ყურაშვილი (ლოსაბერიძე 55.)
6 ლ: ბ. ტორაძე (2), ჯავახია, დანგაძე, ძნელაძე, ფრუიძე 4გ: ბაბუნაშვილი, ჯინჭველაშვილი (3). ს: ბაბუნაშვილი
სინბინი: თ. ირემაძე
ბათუმი (15-9) ჰემპსონი, გოგიტიძე, რუქი (ოქროპირიძე 55), ხონელიძე, ევგენიძე, ოდიშარია (ვენი 74), შამულო; (1-8) სულაბერიძე (ხოჭოლავა 45), გიგაშვილი, კაიკაციშვილი (ბერიძე 47), ნიუვენჰეიზერი, ხელაძე (კორტავა 45), ცირეკიძე (ალიქაძე 45), კეიკოჰობსი, გუგუშვილი
2 ს: ოდიშარია
მსაჯი: გიორგი ამირხანაშვილი
საქართველოს ჩემპიონატი
ა გ თ მ ფ წ ბ ქ
1. ლელო 12 9 0 3 +171 44
2. აია 12 9 0 3 +112 41
3. არმია 12 8 1 3 +142 41
4. ლოკომოტივი 12 9 0 3 +72 40
5. ყოჩები 12 7 1 4 +35 34
6. ჯიქები 13 5 2 6 +49 31
7. არმაზი 11 4 0 4 -13 30
8. ხარები 13 2 0 11 -167 11
9. აკადემია 12 1 0 11 -178 8
10. ბათუმი 11 1 0 10 -223 6
XIII ტური
ყოჩები-არმაზი, აია-ჯიქები, არმია-ლოკომოტივი, ლელო-ბათუმი, აკადემია-ხარები.
აიას დამაჯერებელი გამარჯვება (იბეჭდება მცირე ცვლილებით)
ყოველდღიური სპორტული გაზეთი "ლელო"
