"ბორჯღალოსნები" ბუქარესტში გაემგზავრნენ - ღია ვარჯიში და კომენტარები [VIDEO]

საქართველოს მორაგბეთა ეროვნული ნაკრები დღეს, გამთენიისას ბუქარესტში გაემგზავრა, სადაც "რაგბი ევროპის ჩემპიონატის" ბოლო მატჩში რუმინეთის ეროვნულ გუნდს შეხვდება. 16 მარტს კი "ბორჯღალოსნებმა" "შევარდენის სანაკრებო ბაზაზე" ღია ვარჯიში გამართეს.

საქართველოს ნაკრებმა, ტრადიციულად, ბევრი იმუშავა ხელდახელ, მრავალფაზიანი კომბინაციების გათამაშებაზე. ვარჯიშის მიხედვით თუ ვიმსჯელებთ, ჩვენი გუნდის ძირითადი შემადგენლობა რუმინელთა წინააღმდეგ ასეთი იქნება:

15. მერაბ კვირიკაშვილი, 14. ალექსანდრე თოდუა, 13. დავით კაჭარავა, 12. მერაბ შარიქაძე, 11. ირაკლი სვანიძე, 10. ლაშა ხმალაძე, 9. ვასილ ლობჟანიძე. 1. მიხეილ ნარიაშვილი, 2. ჯაბა ბრეგვაძე, 3. იოსებ ბეკოშვილი, 4. გიორგი ნემსაძე, 5. კონსტანტინე მიქაუტაძე, 6. გიორგი თხილაიშვილი, 7. მამუკა გორგოძე, 8. ბექა გორგაძე.

როგორც ხედავთ, ახალგაზრდებიდან შემადგენლობაში მხოლოდ ორია - გარემარბი ირაკლი სვანიძე, რომელიც ეროვნულ გუნდში მეორე მატჩს გამართავს და მესამეხაზელი ბექა გორგაძე, რომელიც უკვე საკმაოდ გამოცდილი მოთამაშეა.

ნაკრებში ახალი მოთამაშეა პირველხაზელი სოსო ბეკოშვილიც.

გიორგი ნემსაძე, საქართველოს ნაკრების მეორეხაზელი:
"რაგბი ევროპის ჩემპიონატის სხვა მონაწილეებს არ ვაკნინებ, მაგრამ ფაქტია, რუმინეთი ჩვენთვის გამორჩეული მეტოქეა. ისინი ამბობენ, რომ იციან, როგორ უნდა გვაჯობონ და პირდაპირ აცხადებენ, მოვიგებთო. მათ უძლიერესი შემადგენლობა შეკრიბეს და უნდათ, შარშანდელი მარცხის გამო რევანში აიღონ. ჩვენ წინასწარი საუბრისგან ყოველთვის თავს ვიკავებდით და ახლაც ასე ვიტყვი, გავალთ მოედანზე და გამარჯვებისთვის ვიბრძოლებთ".

მერაბ შარიქაძე, საქართველოს ნაკრების შუამარბი:
"წინ ფინალის ტოლფასი, რთული თამაში გველოდება. რუმინელები დიდი მონდომებით ემზადებიან და როგორც პრესასთან ამბობენ, აქვთ შანსი, რომ ექვსწლიანი მოუგებელი სერია შეწყვიტონ. ჩვენც ვემზადებით და გუნდში დაძაბულობაც იგრძნობა. იმედია, მოვახერხებთ სასურველი თამაშის ჩვენებას და გამარჯვებას. პროგნოზებს არასდროს ვაკეთებ, თუმცა გულშემატკივარს შემიძლია დავპირდე, რომ მოედანზე მაქსიმუმს გავიღებთ და ვნახოთ, ეს რა შედეგის მომტანი იქნება".

ლევან მაისაშვილი, საქართველოს ნაკრების მთავარი მწვრთნელის ასისტენტი:
"რაგბი ევროპის ჩემპიონატზე ეს ჩვენი ბოლო კვირაა და თამაშისთვის კარგად მოვემზადეთ. მარტივი თამაში არ გვექნება. რუმინელები ჩვენ დასახვედრად დიდი მონდომებით ემზადებიან და მაქსიმუმს გავიღებთ, რათა შინ გამარჯვებულები დავბრუნდეთ. ყველა ძლიერ მხარეს გამოვიყენებთ, რაც თამაშის მოსაგებად იქნება საჭირო. ბიჭები მზად არიან და შეხვედრას სრულიად მობილიზებულნი ვხვდებით".

რუმინელებს "რაგბი ევროპის ჩემპიონატზე" პირველობის მოსაპოვებლად "ბორჯღალოსნების" ნებისმიერი ანგარიშით დამარცხება მართებთ. ჩვენს გუნდს კი ხელს ფრეც აძლევს. აღსანიშნავია, რომ ნებისმიერი ანგარიშით მარცხის შემთხვევაში, საქართველოს ნაკრებს რეიტინგში ქულები დააკლდება, მაგრამ მე-12 პოზიციას მაინც შევინარჩუნებთ.

შეგახსენებთ, რუმინეთის ნაკრებს აქამდე ოცჯერ შევხვედრივართ. აქედან 11 მოვიგეთ, 8 წავაგეთ და ერთხელ ფრე ვითამაშეთ. რუმინეთთან ბოლო 3 თამაში მოგებული გვაქვს, ბოლო 7 მატჩიდან კი ერთიც არ წაგვიგია. ბოლოს რუმინეთთან 2010 წელს ბუქარესტში დავმარცხდით.

მატჩი საქართველოსა და რუმინეთის ნაკრებებს შორის კვირას, თბილისის დროით 17 საათზე დაიწყება.

საქართველო
პირველი ხაზი: მიხეილ ნარიაშვილი (მონპელიე), გიორგი თეთრაშვილი (აჟენი), თორნიკე მატარაძე (ლიონი), ჯაბა ბრეგვაძე (ვორსტერი), ზურაბ ჟვანია (სტად ფრანსე), სოსო ბეკოშვილი (ბრივი), ლაშა ტაბიძე (ბორდო)
მეორე ხაზი: გიორგი ნემსაძე (ბრისტოლი), კონსტანტინე მიქაუტაძე (მონპელიე), ნოდარ ჭეიშვილი (ლელო)
მესამე ხაზი: მამუკა გორგოძე (ტულონი), გიორგი თხილაიშვილი (ბათუმი), ლაშა ლომიძე (ბეზიე), საბა შუბითიძე (აკადემია), ბექა გორგაძე (მონ დე მარსანი), ოთარ გიორგაძე (კლერმონი), გიორგი ცუცქირიძე (ბრივი)
#9: ვასილ ლობჟანიძე (ბრივი), გიორგი ბეგაძე (ყოჩები), გელა აფრასიძე (ლელო)
#10: ლაშა ხმალაძე (ლელო), ლაშა მალაღურაძე (კრასნი იარი), რეზო ჯინჭველაშვილი (ბაგრატი)
#12-13: მერაბ შარიქაძე (ორიაკი), დავით კაჭარავა (ენისეი), გიორგი კოშაძე (ხარები), ბადრი ლიპარტელიანი (არმაზი)
#11-14: ალექსანდრე თოდუა (ლელო), ირაკლი სვანიძე (ჯიქი)
#15: მერაბ კვირიკაშვილი (ლელო), ბექა წიკლაური (ლოკომოტივი)

რუმინეთი
პირველი ხაზი: კონსტანტინ პრისტავიტა (ბაია მარე), ალექსანდრუ ტარუსი (ბეზიე), ალექსანდრუ გორდასი (სტიაუა), იონელ ბადიუ, ანდრეი ურსაკე (ორივე-კარკასონი), მარიან კაპატანა, ანდრეი რადოი (ორივე-ტიმიშოარა), ოთარ ტურაშვილი (კოლომიე)
მეორე ხაზი: ვალენტინ პოპარლანი, იონუც მურეშანი (ტიმიშოარა), იოჰან ფან ჰერდენი (ბაია მარე), მარიუს ანტონესკუ (ტარბი)
მესამე ხაზი: ვიორელ ლუკაჩი (სტიაუა), ანდრეი გორჩიოაია (მასი), მიჰაი მაკოვეი (კოლომიე), ვლად ნისტორი (ალბი), დორინ ლაზარი (ტიმიშოარა)
#9: ვალენტინ კალაფეტეანუ (ბუქარესტი), ფლორინ სურუჯუ (სტიაუა), ტუდორელ ბრატუ (დინამო)
#10: ჯოდი როსი (ტიმიშოარა), ფლორინ ვლაიკუ (სტიაუა)
#12-13: ჯეკ უმაგა, ფლორინ პოპა (ორივე-ტიმიშოარა), სიონე ფაკაოსილეა (ბაია მარე)
#11-14: სტივენ შენანი, მადალინ ლემნარუ (ტიმიშოარა), იონუც დუმიტრუ (სტიაუა), ჯეკ კობდენი (ბუქარესტი)
#15: კატალინ ფერკუ (ტიმიშოარა)

რაგბი ევროპის ჩემპიონატი. V ტური
18 მარტი
ესპანეთი-ბელგია
რუსეთი-გერმანია

19 მარტი
რუმინეთი-საქართველო

სატურნირო მდგომარეობა
ა გ თ მ ფ წ ბ ქ პ
1. საქართველო 4 4 0 0 +93 18 2
2. რუმინეთი 4 3 0 1 +43 15 3
3. ესპანეთი 4 2 0 2 +7 8 0
4. გერმანია 4 2 0 2 -53 8 0
5. რუსეთი 4 1 0 3 -37 4 0
6. ბელგია 4 0 0 4 -53 2 2.

(იბეჭდება მცირე ცვლილებით)
ყოველდღიური სპორტული გაზეთი "ლელო"