საქართველოს ნაკრების მორაგბეებმა ნამიბიასთან (17:16) მსოფლიოს თასის მატჩის შემდეგ კომენტარები გააკეთეს.გამარჯვების შემდეგ სიხარულს არ მალავდა ლევან დათუნაშვილი.
"გამარჯვების აღნიშვნას, ალბათ, ჯერ ლუდით დავიწყებთ და მერე ვნახოთ. ინგლისში ვართ, ამიტომ ცოტა ვისკის გასინჯვაც მოგვიწევს", - თქვა დათუნაშვილმა
მიუხედავად იმისა, რომ საკუთარ უკანასკნელ მატჩს ატარებდა საქართველოს ნაკრებში, დათუნაშვილმა განაცხადა, რომ მწვრთნელებმა სთხოვეს, ცოტა ხანი კიდევ დარჩენილიყო ნაკრებში.
"ალბათ, კიდევ რამდენიმე თამაშს ჩავატარებ საქართველოს ნაკრებთან ერთად. ამის შემდეგ კი მათი ნომერ პირველი ფანი გავხდები", - აღნიშნა მან.
კომენტარი გააკეთა ასევე დავით ზირაქაშვილმა,
"ჩემს პოზიციაზე საქართველოს ნაკრებს ცოტა მოთამაშე არ ჰყავს. ასე რომ იყოს, არ დავტოვებდი გუნდს. რა თქმა უნდა, სევდიანია ნაკრებიდან წასვლა, მაგრამ ყველაფერს თავისი დასასრული აქვს.
ძალიან მომენატრება თამაში, მაგრამ მე ოჯახი მყავს და მინდა მეტი დრო დავუთმო მათ. ეს ცხოვრების ბუნებრივი განვითარებაა. საქართველოს ნაკრებმა პირველად მსოფლიო ჩემპიონატზე 2003 წელს ითამაშა, ახლა კი ჩვენ ტოპ-15 ნაკრებში შევდივართ. ეს ძალიან დიდი მიღწევაა ჩვენნაირი პატარა ქვეყნისთვის. იმედი მაქვს, რომ მომდევნო წლებში ტოპ-10-ში და ტოპ-8-შიც მოვხვდებით", - განაცხადა ზირაქაშვილმა.
მატჩის შემდეგ კომენტარი მიხეილ ნარიაშვილმაც გააკეთა და აღნიშნა, რომ ნაკრები მუშაობას გააგრძელებს.
"აღნიშვნას ვაპირებთ, რადგან ჩვენი ქვეყნისნაირი პატარა ქვეყნისთვის ეს ისტორიული მომენტია. ჩვენ გავაგრძელებთ მუშაობას და უფრო მეტს მივაღწევთ".
მომზადებულია rugbyworldcup-ის მიხედვით
ასევე იხილეთ:
ერთი ნაბიჯი იაპონიამდე [ბესიკ ჯანგავაძე ექსეტერიდან]
