ექვსი ერი. III ტური: დაუმარცხებელი "პომები" და "ურჩხულები"

ექვსი ერის გათამაშების მესამე ტურის შემდეგ დაუმარცხებელი ორი გუნდი დარჩა - ინგლისისა და უელსის ნაკრებები.

მომდევნო ტურში, ლონდონში, "თვიქნემზე" სწორედ ეს გუნდები შეხვდებიან ერთმანეთს. გამარჯვების შემთხვევაში ინგლისს პირველობამდე ერთი ნაბიჯიღა დააშორებს.

მას შემდეგ, რაც "პომების" სათავეში ავსტრალიელი ედი ჯონზი მივიდა, გუნდი ნელ-ნელა იბრუნებს ოდინდელ სიმძლავრეს. თუმცა, ისიც უნდა ითქვას, რომ რაიმე რევოლუციური ცვლილება ინგლისელთა თამაშში ჯერ არ მომხდარა და არც იყო მოსალოდნელი. ედი საკმაოდ ჭკვიანი, არაორდინარული მწვრთნელია და არსად ეჩქარება. ეჭვგარეშეა, რომ მომდევნო მსოფლიოს თასისთვის მისი გუნდი ერთ-ერთი უმთავრესი ფავორიტი იქნება.

ინგლისის ნაკრებმა მესამე ტურში ბოლო წლების ექვსი ერის ტრიუმფატორ ირლანდიას უმასპინძლა და 21:10 დაამარცხა. მატჩის საუკეთესო მორაგბედ მესამეხაზელი ბილი ვუნიპოლა დაასახელეს.

"ბილი სულ უფრო და უფრო უმატებს. ის თითქოს პატარა ბიჭია, რომელიც თამაშს სწავლობს და ამით უდიდეს სიამოვნებას იღებს. ის მოლაპარაკე დიდად არ არის, მაგრამ გვინდა ვიცე-კაპიტნობა ვანდოთ...

ირლანდიელები მოქმედი ჩემპიონები არიან. ამიტომ ძალიან მძიმე ბრძოლის მოლოდინი გვქონდა. შეტევაში კარგად გავისარჯეთ, მაგრამ მისი დაბოლოება სასურველია უკეთესი იყო. ამაზე სერიოზულად გვაქვს სამუშაო. ხაზს კარგად ვჭრიდით, მაგრამ მეტოქე მაინც ახერხებდა იერიშის შეყოვნებას. მოსაფიქრებელია გარკვეული ტექნიკური დეტალები, რაც ამის გამოსწორების საშუალებას მოგვცემს",  - თქვა ედი ჯონზმა.

მატჩი მართლაც რთული გამოდგა მასპინძლებისთვის. ინგლისელებმა გადამწყვეტი უპირატესობის მოპოვება თამაშის დასკვნით 20 წუთში შეძლეს. თუმცა "სამყურებს" დრო საკმარისად ჰქონდათ შეხვედრის გადასარჩენად. "პომებმა" დაცვაში შესანიშნავად ითამაშეს და ზედიზედ მესამე გამარჯვება მიითვალეს.

ორი კვირის თავზე ინგლისის ნაკრებს, თამამად შეიძლება ითქვას, რომ გადამწყვეტი მატჩი აქვთ უელსის ეროვნულ გუნდთან, რომელთანაც ძალიან მწარე მოგონება აკავშირებს. განვლილ მსოფლიოს თასზე "პომები" ჯგუფში სწორედ "წითელმა ურჩხულებმა" ჩატოვეს.

უელსელებმა კარდიფში, "მილენიუმზე" საფრანგეთის ნაკრებს უმასპინძლეს და 19:10 სძლიეს. "ლე ბლომ" მედგარი წინააღმდეგობა მხოლოდ პირველ ტაიმში გასწია, რომელიც სამი ქულით დათმო - 3:6. შესვენების შემდეგ უელსელები დომინირებდნენ. თუმცა მასპინძლებმა მხოლოდ ერთი ლელოს გატანა მოახერხეს. საპასუხო ლელო ფრანგებმა მატჩის მიწურულსღა მიითვალეს.

არანაკლებ საინტერესო იყო აუტსაიდერების, იტალიისა და შოტლანდიის ნაკრებების დაპირისპირება რომში. შეხვედრა "სკოტებმა" დამაჯერებლად მოიგეს - 36:20. ახლა დიდი შანსია, "სკუადრა აძურა" ხის კოვზის მფლობელი გახდეს. შეგახსენებთ, რომ ეს სიმბოლური ალაფია, რომელიც ყველა მატჩის წამგებ გუნდს გადაეცემა.

შოტლანდიელთაგან საუკეთესო, ტრადიციულად, გრეგ ლაიდლოუ იყო, რომელმაც გუნდს 21 ქულა შესძინა (ხუთი საჯარიმო და სამი გარდასახვა).

ექვსი ერი. III ტური
უელსი-საფრანგეთი 19:10
უელსი: ლ - ნორსი. 4ს,გ - ბიგარი.
საფრანგეთი: ლ - გირადო. გ - ტრინ დუკი. ს - პლისონი.

იტალია-შოტლანდია 20:36
იტალია: 2ლ - ჯილარდინი, ფუსერი. 2ს,2გ - ჰაიმონა.
შოტლანდია: 3ლ - ბარკლი, ჰარდი, სეიმური. 5ს,3გ - ლაიდლოუ.
სინბინი: რასელი, ნილი.

ინგლისი-ირლანდია 21:10
ინგლისი: 2ლ - ვოტსონი, ბრაუნი. 3ს,გ - ფარელი.
სინბინი: ჰესკელი, კერი.
ირლანდია: ლ - მურეი. ს,გ - სექსტონი

სატურნირო მდგომარეობა
ა გ თ მ ფ წ ბ ქ
1. ინგლისი 3 3 0 0 +48 6
2. უელსი 3 2 1 0 +13 5
3. საფრანგეთი 3 2 0 1 -6 4
4. შოტლანდია 3 1 0 2 +6 2
5. ირლანდია 3 0 1 2 -12 1
6. იტალია 3 0 0 3 -49 0

IV ტური
12 მარტი
ირლანდია-იტალია
ინგლისი-უელსი
შოტლანდია-საფრანგეთი

(იბეჭდება მცირე ცვლილებით)
ყოველდღიური სპორტული გაზეთი "ლელო"