ჯოკოვიჩის დისკვალიფიკაციის მიზეზიც ეს იყო... - US Open-ის მთავარი მსაჯი

US Open-ის მთავარმა მსაჯმა სიორენ ფრიმელმა ისაუბრა თავისი გადაწყვეტილების შესახებ, თუ რატომ დაისაჯა ნოვაკ ჯოკოვიჩი დისკვალიფიკაციით კარენო-ბუსტასთან მიმდინარე მატჩის დროს.

"ჯოკოვიჩმა მსაჯს მოარტყა და ტრავმა მიაყენა. ეს ფაქტია. ჩემთვის მთავარი იყო იმის ზუსტად გაგება, რაც მოხდა. სუპერვაიზერმა და კოშკურის მსაჯმა ყველაფერი მომახსენეს. პროტოკოლშივე წერია, რომ მე ნოვაკსაც ვესაუბრე.

ჯოკოვიჩმა მომხდარის საკუთარი ხედვა გამაცნო. თუმცა, ცხადი იყო, რომ მან ბურთი ხაზის მსაჯს კისერში მოარტყა. სწორედ ამის შემდეგ მივიღეთ გადაწყვეტილება მისი დისკვალიფიკაციის შესახებ.

ჩემთან საუბრისას ნოვაკი დაჟინებით ამბობდა, რომ მსაჯს შემთხვევით მოარტყა და ამის გამო მისი შეჯიბრებიდან მოხსნა არ შეიძლებოდა. ჩვენ შევთანხმდით, რომ მას ეს განზრახ არ გაუკეთებია, თუმცა რეალობა ასეთია - ჯოკოვიჩმა მსაჯს ბურთი გაარტყა და ტკივილი მიაყენა", - განაცხადა ფრიმელმა.

მსაჯმა დააკონკრეტა, რომ ამ შემთხვევაში ვიდეოგამეორება არ გამოიყენება, გადაწყვეტილების მიღებისას კი "კისერში მოხვედრის დროს ბურთის სისწრაფეც" იქნა გათვალისწინებული. 

მომზადებულია Marca-ს მიხედვით

ჯოკოვიჩმა ქალ მსაჯს ბურთი გაარტყა და ტურნირიდან მოხსნეს [VIDEO]