"ნეკას დავურეკე, ის ტიროდა და მთხოვა, რომ..." - რა განაცხადა სასამართლოზე ნელი დოროყაშვილის მეჯვარემ

23 ივნისს თბილისის საქალაქო სასამართლოში ძალადობაში ბრალდებული ნიკოლოზ ბასილაშვილის მორიგი სასამართლო პროცესი გაიმართა.

დღეს დისტანციურად ნელი დოროყაშვილის მეჯვარე სოფიო შარაშენიძე დაიკითხა, რომელმაც შემდეგი განაცხადა:

"თარიღი არ მახსოვს ზუსტად, დავურეკე და მოვიკითხე [ნეკა]. ვკითხე, რა მოხდა-მეთქი, მან კი მითხრა, რომ ნიკასთან ვიჩხუბე და მივდივარ აღმაშენებელზე, რომ შევხვდე და ვისაუბროო… გავიდა რამდენიმე საათი. რომ არ დარეკა, მე შევეხმიანე. ტელეფონში ტიროდა ძალიან და მთხოვა, რომ მივსულიყავი მათ სახლში აღმაშენებელზე.

რომ მივედი, დივანზე იწვა და ტიროდა. ვკითხე, რა მოხდა და როგორ მოხდა-მეთქი. მითხრა, მე და ნიკამ ვისაუბრეთ და, სამწუხაროდ, შერიგება ვერ მოხერხდაო. ვკითხე, რას ეხება კონფლიქტი… ვუთხარი, რომ ესაუბრათ… თუმცა არ მისმენდა, იმდენად ტიროდა. ვეცადე, რომ ჩავძიებოდი, მეკითხა, რა მოხდა. ნეკამ მითხრა, ამერიკაში მომაყენა ფიზიკური და სიტყვიერი შეურაცხყოფაო".

სოფიო შარაშენიძე იხსენებს, რომ ამის შემდეგ თავად შეხვდა ნიკოლოზ ბასილაშვილს და მომხდართან დაკავშირებით მასაც ესაუბრა. ამის პარალელურად კი ნეკა დოროყაშვილი ფალიაშვილის ქუჩაზე, დედის სახლში დაბრუნდა.

ქალი, როგორც ბრალდების, ასევე დაცვის კითხვებზე პასუხისას აცხადებს, რომ პირადად არასდროს შესწრებია, თუმცა იხსენებს ერთ ეპიზოდს: როგორც ქალი ჰყვება, დოროყაშვილისა და ბასილაშვილის თანაცხოვრების დროს ერთხელ მათთან სტუმრობა მოუწია. შარაშენიძე ამბობს, რომ სახლი უჩვეულოდ არეული იყო, განსაკუთრებით კი, სამზარეულო. რაღაც პერიოდის შემდეგ ბინაში ბასილაშვილიც დაბრუნდა — მას და დოროყაშვილს კი შემდგომ დაძაბული საუბარი ჰქონდათ სამზარეულოში.

საუბრის შინაარსს ქალი ვერ იხსენებს. ამბობს, რომ არ უნდოდა სიტუაციაში ჩარევა, ხოლო სხვა ოთახიდან ხმა არც ისე კარგად ისმოდა.

მოწმე ასევე იხსენებს მაისის მოვლენებს. ნიკოლოზ ბასილაშვილი სამართალდამცველებმა 22 მაისს დააკავეს, მას შემდეგ, რაც დოროყაშვილმა პოლიცია და სასწრაფო სარაჯიშვილის გამზირზე, თბილისში, ე.წ. ხელოსნების ქალაქის დასახლებასთან გამოიძახა. იქ შვილთან ერთად იყო და, როგორც თავად ქალი ამბობდა, მას ყოფილმა მეუღლემ ფიზიკური შეურაცხყოფა მიაყენა, ყოფილმა მამამთილმა კი – სიტყვიერი.

დაცვის მხარის კითხვებზე, რომლებიც ნელი დოროყაშვილის ფინანსებს ეხებოდა, სოფიო შარაშენიძე ამბობს, რომ ქალს ჰქონდა თავისი პატარა ბიზნესი, ასევე, დამატებითი შემოსავალი სამოდელო კარიერიდანაც.

„არ ვიცი, რომელი წელი იყო, თუმცა ვიცი, რომ საოჯახო საბანკო ბარათი გვაქვს და ამ კარტის დაბლოკვა მოჰყვაო... მგონი, განქორწინებულები არ იყვნენ ამ პერიოდში“, — ამბობს ის.

სხდომის შემდგომ დოროყაშვილის დამცველი ორგანიზაციის, „პარტნიორობა ადამიანის უფლებებისთვის“ [PHR] წარმომადგენელმა თამარ გაბოძემ განმარტა, რომ საუბარია განქორწინებამდე პერიოდზე, იმ დროზე, როდესაც დოროყაშვილს საოჯახო საბანკო ანგარიშის ბარათი უეცრად დაებლოკა.

წყარო: Netgazeti.ge