ევროპის ოლიმპიური კომიტეტების (EOC) 52-ე გენერალურ ასამბლეაზე, რომელსაც სტამბოლმა უმასპინძლა, 2023 წლის სპორტული მოვლენები განიხილეს. ხაზი გაესვა ეროვნული ოლიმპიური კომიტეტების მუშაობას, რომლებმაც მაღალი სტანდარტები დააწესეს.
„ევროპის ოლიმპიური კომიტეტების ისტორიაში ეს იყო ყველაზე დატვირთული წელი. ჩავატარეთ მეტად წარმატებული ღონისძიებები, რომლებმაც თავის მხრივ, ევროპული სპორტი ახალ სიმაღლეზე აიყვანა. კარგად ორგანიზებულ შეჯიბრებებში ვიხილეთ ევროპის საუკეთესო სპორტსმენების ასპარეზობა, - განაცხადა EOC-ის პრეზიდენტმა სპიროს კაპრალოსმა. - ჩვენი მთავარი პრიორიტეტი ყოველთვის იყო ჩვენი სპორტსმენების მსახურება. მიმაჩნია, რომ საამაყოდ გვაქვს საქმე იმის გათვალისწინებით, თუ როგორ გავაკეთეთ ეს
ყოველივე ერთად. ეს იქნა მიღწეული როგორც ევროპის, ისე რიგ შემთხვევებში საერთაშორისო სპორტულ ფედერაციებთან თანამშრომლობით და, რა თქმა უნდა, ევროპის ეროვნულ ოლიმპიურ კომიტეტებთან ერთად. ჩვენ გავაუმჯობესეთ EOC-ის და ჩვენი ღონისძიებების იმიჯი. ყოველივეს მივაღწიეთ მკაცრად გაწერილი ბიუჯეტით.“
გენერალურ ასამბლეაზე განვლილი წლის საკვანძო საკითხებზე მოისმინეს EOC-ის გენერალური მდივნის, რაფაელ პანიოცის მოხსენება, ასევე მოხსენებები ზამთრის და ზაფხულის 2023 წლის ახალგაზრდულ ოლიმპიურ ფესტივალებზე. გარდა ამისა, უახლოესი გეგმები წარმოადგინეს ზაფხულისა და ზამთრის მომავალი ოლიმპიური თამაშების საორგანიზაციო კომიტეტებმა.
ასამბლეის დელეგატების წინაშე მოხსენებით და პრეზენტაციით წარდგნენ 2025 წელს ბაკურიანში გასამართი ზამთრის ახალგაზრდული ფესტივალის საორგანიზაციო კომიტეტის ხელმძღვანელები. მათ დეტალურად ისაუბრეს ბაკურიანის სამზადისზე, შესრულებულ და შესასრულებელ სამუშაოებზე, წარმოადგინეს შესაბამისი ვიზუალური მასალა.
ევროპის ოლიმპიური კომიტეტების გენერალური ასამბლეის მსვლელობისას პიოტრ ნუროვსკის სახელობის ევროპის საუკეთესო ახალგაზრდა სპორტსმენის ნომინაციაში გამარჯვებულებად გამოცხადდნენ გერმანელი ტანმოვარჯიშე დარია ვარფოლომეევა და თურქი მოცურავე კუზეი ტუნჩელი. აღსანიშნავია, რომ ორივე სპორტსმენმა გამოკითხვაში ხმების თანაბარი რაოდენობა დააგროვა. ამიტომაც, პირველად ისტორიაში, ჯილდო ერთბაშად ორ სპორტსმენს გადაეცა.
გენერალურ ასამბლეაზე დამსწრეთ მიმართა საერთაშორისო ოლიმპიური კომიტეტის პრეზიდენტმა თომას ბახმაც. IOC-ის პრეზიდენტმა ხაზი გაუსვა მოვლენებით გაჯერებულ წელს, რომლის ხილვის საშუალებაც ჰქონდა ევროპულ სპორტს. ასევე მადლობა გადაუხადა EOC-ს მომავლისკენ სწრაფვაში, განსაკუთრებით, მდგრადობის სფეროში. შეაქო ევროპელი სპორტსმენები, რომლებმაც 2024 წლის ოლიმპიური თამაშებისთვის კვალიფიკაცია გაიარეს.
„ჩვენ ვერ დავკმაყოფილდებით იმით, რასაც წლის განმავლობაში მივაღწიეთ. ჩვენ მომავლისკენ უნდა ვიყუროთ და ჩვენ წინაშე არსებულ ამოცანები განვსაზღვროთ. რა თქმა უნდა, არის ერთი სფერო, რომლის მიმართაც ერთგულია ოლიმპიური მოძრაობა და ეს არის მდგრადი განვითარების მიზნები. მსურს მადლობა გადავუხადო EOC-ს, გაეროს სპორტი კლიმატის მხარდაჭერის პროგრამაში გაერთიანებისთვის, რომელიც IOC-ის მიერ გაეროსთან ერთად იყო ინიცირებული. ოლიმპიურ მოძრაობას ნათელი მომავალი აქვს, მაგრამ შეგვიძლია, რომ ის უფრო ნათელი გავხადოთ, თუკი არა მხოლოდ ვისაუბრებთ ოლიმპიურ დევიზზე, არამედ მისით ვიცხოვრებთ. მოგიწოდებთ, ცხოვრებაში გავატაროთ ახალი ოლიმპიური დევიზი, რათა სწრაფად ცვალებად სამყაროში სწრაფად ვიმოქმედოთ, ვიყოთ უფრო ძლიერები, ვისწრაფოდეთ მაღალი მიზნებისთვის და ვიყოთ უფრო ძლიერები. ყოველივეს მიღწევა შესაძლებელი იქნება, თუ ყველა ერთად სოლიდარულად დავდგებით“.
სავარაუდოდ, მეოთხე ევროპული თამაშების მასპინძელი იქნება სტამბოლი. როგორც თურქული მეგაპოლისის მერმა ეკრემ იმამოღლუმ საზეიმო მიღებაზე აღნიშნა, სტამბოლი დაინტერესებულია, რომ 2027 წლის თამაშები მათ ქალაქში გაიმართოს.
წყარო: საქართველოს ეროვნული ოლიმპიური კომიტეტი
