შაბათს, საფრანგეთის ქალაქ ნიცაში გარდაიცვალა ფორმულა 1-ის პილოტი ჟიულ ბიანკი. "მარუსიას" ყოფილი წევრისთვის საბედისწერო აღმოჩნდა გასულ წელს, იაპონიის გრან-პრის დროს მიღებული ტრავმები. ფრანგი ტრასიდან გადავარდა და შეეჯახა ევაკუატორს, რომელსაც "ზაუბერის" პილოტის, ადრიან სუტილის მანქანა გადაჰყავდა. თავის არეში მიღებული ტრავმის შემდეგ ბიანკი ერთ-ერთ ადგილობრივ კლინიკაში მიიყვანეს და იქ ოპერაცია ჩაუტარდა. ნოემბერში ჟიული ქალაქ ნიცას კლინიკაში გადაიყვანეს, სადაც ხელოვნური კომის მდგომარეობიდან გამოიყვანეს.
"როგორც ყოველთვის, ჟიული ბოლომდე იბრძოდა, მაგრამ დღეს მისი ბრძოლა დასასრულს მიუახლოვდა", - წერია პილოტის ოჯახის განცხადებაში.
ფორმულა 1-ის სამყარო სრული
"სამწუხარო იყო ახალი ამბავი ჟიულის შესახებ. ძალიან დაგვაკლდება ნიჭიერი პილოტი და შესანიშნავი ადამიანი. ჩვენ აღარ უნდა დავუშვათ მსგავსი რამ ჩვენს სერიაში", - ამბობს ექლსტოუნი.
"დიდი მღელვარებით შევიტყვე ჟიულ ბიანკის სიკვდილის ამბავი. მისი სახით ფრანგულმა სპორტმა ერთ-ერთი დიდი იმედი დაკარგა", - ეს საფრანგეთის პრეზიდენტის, ფრანსუა ოლანდის სიტყვებია.
ბიანკი ფორმულა 1-ის პირველი მსხვერპლია 21 წლის წინ დაღუპული აირტონ სენას შემდეგ. მან ორი სეზონი (2013 და 2014) გაატარა ფორმულა 1-ში, სულ "მარუსიას" ბოლიდით 34 რბოლა ჩაატარა და ერთი ქულა მოიპოვა.
ჟიულ ბიანკი 1989 წლის 3 აგვისტოს ნიცაში, ავტომრბოლელების ოჯახში დაიბადა. მისი ბაბუა მაურო ბიანკი ბელგიელი პილოტი იყო, რომელიც დაბალ სერიებში გამოდიოდა და სამჯერ გახდა ჩემპიონი GT-ის კლასში.
მაუროს ძმამ - ლუსიენმა 19 რბოლა ჩაატარა ფორმულა 1-ში და ექვსი ქულა მოიპოვა. 1968 წელს, მან მოიგო ლე მანის ლეგენდარული 24-საათიანი რბოლა, ერთი წლის შემდეგ კი ამავე რბოლის ტესტებისას დაიღუპა.
ყოველდღიური სპორტული გაზეთი "ლელო"
