ფორმულა 1. ბრაზილიის გრანპრის წინ: მოიგებს და ჩემპიონია!

ფორმულა 1-ის სეზონის დასრულებამდე ორი რბოლაა დარჩენილი - ამ უქმეებზე ბრაზილიაში და ორი კვირის შემდეგ, აბუ დაბიში. ნიკო როსბერგი და ლუის ჰემილტონი აგრძელებენ ბრძოლას ჩემპიონის ტიტულისთვის.

მას შემდეგ, რაც 2014 წელს "მერსედესი" წინ გაიჭრა, ჩემპიონობისთვის ყოველთვის ჰემილტონი და როსბერგი იბრძვიან. ზედიზედ ორი წელია, ბრიტანელი ამარცხებდა თანაგუნდელს, რითაც მსოფლიოს სამგზის ჩემპიონი გახდა, მაგრამ, ამჯერად, გერმანელი მზად არის რევანშის ასაღებად.

ფინიშამდე ორი რბოლით ადრე, როსბერგი ჰემილტონს 19 ქულით უსწრებს, ეს კი იმას ნიშნავს, რომ ბრაზილიის გრანპრის მოგების შემთხვევაში, ნიკო ვადაზე ადრე გაიფორმებს ჩემპიონობას. თუმცა, ლუისი შესანიშნავ ფორმაშია და აშშ-სა და მექსიკაში გამარჯვების შემდეგ, მზად არის წარმატებული სერიის გასაგრძელებლად. ისიც დავამატოთ, რომ ბრაზილიის ბოლო ორი რბოლა როსბერგს აქვს მოგებული.

აღვნიშნავთ, რომ თუ როსბერგი შეინარჩუნებს უპირატესობას, მაშინ პირველად მრავალი წლის განმავლობაში, გუნდის მეორე პილოტი ჩემპიონობას გამოსტაცებს საჯინიბოს ლიდერს - ეს ვერ შეძლეს ვერც მასამ, ვერც უებერმა, ვერც ბარიკელომ და ვერც კულტჰარდმა. გარდა ამისა, ნაიჯელ მენსელის დროიდან მოყოლებული, არავინ მიდიოდა ტიტულამდე ასე დიდხანს: მიკა ჰაკინენისთვის 1988 წლის სეზონი მერვე იყო, ჯენსონ ბატონმა ჩემპიონატი კარიერის მეათე წელს მოიგო, როსბერგისთვის კი ეს სეზონი მეთერთმეტეა.

* * *
მომავალ რბოლაში სხვა ინტრიგებიც არსებობს. კონსტრუქტორთა თასზე სერიოზული ბრძოლაა მეორე ადგილისთვის "რედ ბულსა" და "ფერარის" შორის, ხოლო მეოთხე ადგილისთვის იბრძვიან "ფორს ინდია" და "უილიამსი".

კიდევ ერთი საინტერესო ფაქტი ის არის, რომ ბრაზილიელი ფელიპე მასა ბოლო საშინაო გრანპრის ჩაატარება კარიერაში. რა თქმა უნდა, "ინტერლაგუშის" ტრიბუნებიდან ვეტერანს დიდი მხარდაჭერა ექნება.

ბრაზილიის ტრასა
სიგრძე: 4 309 მეტრი
წრეების რიცხვი: 71
რბოლის დისტანცია: 305.909 კილომეტრი
DRS-ის ზონა: ორი
ტრასის რეკორდი: 1:11.473 (მონტოია, "უილიამსი", 2004)
ყველაზე მეტი მოგება: 6 - ალენ პროსტი

უქმეების განრიგი
11 ნოემბერი, 16:00 - I პრაქტიკა
11 ნოემბერი, 20:00 - II პრაქტიკა
12 ნოემბერი, 17:00 - III პრაქტიკა
12 ნოემბერი, 20:00 - კვალიფიკაცია
13 ნოემბერი, 20:00 - რბოლა

საერთო ჩათვლა
1. ნიკო როსბერგი 349 (9)
2. ლუის ჰემილტონი 330 (8)
3. დანიელ რიკარდო 242 (1)
4. სებასტიან ფეტელი 187
5. კიმი რაიკონენი 178
6. მაქს ფერსტაპენი 177 (1)
7. სერხიო პერესი 85
8 ვალტერი ბოტასი 85


ბრიტანელმა პილოტმა ჯოლიონ პალმერმა ერთი წლით გაახანგრძლივა კონტრაქტი "რენოს" საქარხნო გუნდთან.

ასე რომ, 2017 წელს, ფრანგული საჯინიბოს ღირსებას დაიცავენ პალმერი და გერმანელი ნიკო ჰიულკენბერგი.

პალმერმა წარუმატებლად დაიწყო სეზონი, მაგრამ შემდეგ შეძლო ადაპტირება და კარგი დონე აჩვენა. ამ სეზონში ბრიტანელის საუკეთესო შედეგია - მე-10 ადგილი მალაიზიის გრანპრიზე.

ასევე ირკვევა, რომ პალმერის ამჟამინდელი პარტნიორი კევინ მაგნუსენი ცალი ფეხით ამერიკულ საჯინიბო "ჰაასშია", რომელთანაც შეათანხმა ორწლიანი კონტრაქტი.

P. S. გუშინ, გვიან გახდა ცნობილი, რომ "ფორს ინდიამ" ჰიულკენბერგის შემცვლელად ესტებან ოკონი აირჩია და მასთან მრავალწლიან კონტრაქტს გააფორმებს. 20 წლის ფრანგი, ამჟამად, "მანორში" გამოდის.

ყოველდღიური სპორტული გაზეთი "ლელო"