იტალიის დედაქალაქ რომში დასასრულს მიუახლოვდა პლაჟის ფრენბურთში მსოფლიოს რიგით მერვე ჩემპიონატი. ოქროს მედლებს კარგად ნაცნობი ბრაზილიური და ამერიკული წყვილები გაითამაშებენ.ფრენბურთის ეს ნაირსახეობა სულ უფრო მეტად პოპულარული ხდება. შემთხვევითი არ არის, რომ წლევანდელ პირველობაზე 31 ქვეყნის 96-მა გუნდმა მიიღო მონაწილეობა, საპრიზო ფონდმა კი მილიონი დოლარი შეადგინა. გამარჯვებული წყვილი 60 ათასს მიიღებს, ვერცხლის მედლის მფლობელი - 45 ათასს, ბრინჯაოსი - 35 ათასს.
ტურნირი იტალიის დედაქალაქის ერთ-ერთ ღირსშესანიშნავ ადგილას გაიმართა - "ფორო იტალიკოს" პარკში, რომელიც 1960 წლის ოლიმპიადისთვის აშენებული ოლიმპიური სტადიონის მეზობლად
ბრმა წილისყრის გამო კაცებს შორის მერვედფინალურ ეტაპზე "ნაადრევი ფინალი" გაიმართა - ერთმანეთს დაუპირისპირდნენ პირველ ნომრად განთესილი დუეტი და წინა ჩემპიონატის გამარჯვებული. მოედნის ერთ მხარეს ამერიკელები - ტოდ როჯერსი და ფილ დალჰაუსერი იდნენ, მეორე მხარეს გერმანელი მოქმედი ჩემპიონები - ჯულიუს ბრინკი და იონას რეკერმანი.
ფავორიტად ამერიკელები მიიჩნეოდნენ და მათ მოიგეს კიდეც პირველი სეტი - 21:17, მაგრამ მომდევნო ორ პარტიაში ორ-ორ ქულიანი უპირატესობით (21:19) ბრინკმა და რეკერმანმა იმარჯვეს.
საბოლოოდ მათ ნახევარფინალამდე მიაღწიეს, მაგრამ იქ ორი სეტი ერთნაირი ანგარიშით - 15:21 წააგეს ბრაზილიელებთან - ალისონთან და ემანუელთან, რომლებსაც "დიდი სლემის" ბოლო ორი ტურნირი აქვთ მოგებული პრაღასა და პეკინში.
ასევე წილისყრას უნდა დავაბრალოთ ის, რომ ლატვიელთა წყვილს (მარტინს პლავინში/იანის სმედინში) ნახევარფინალამდე იოლი გზა ჰქონდა, მაგრამ იქ მესამე ნომრად განთესილ ბრაზილიელებს - მარსიო არაუჟოსა და რიკარდოს გადაეყარა (თავად ბალტიისპირელთა განთესვის ნომერი იყო - 15). სხვათა შორის, ბრაზილიელ ვირტუოზებს იოლად არ გაუმარჯვიათ, განსაკუთრებით პირველ სეტში - 22:20, 21:16. ასე რომ, კაცებში ფინალი ბრაზილიური იქნება.
ქალებს შორისაც იყო ერთი მოულოდნელობა: საუკეთესო ოთხეულში მოხვდა ჩეხური დუეტი ჰანა კლაპალოვასა და ლენკა ჰაჟეჩკოვას შორის. ამ სპორტსმენებს სამშობლოშიც კი არ მიიჩნევენ უძლიერესებად. მათ ოქროსკენ გზა გადაუღობეს დღეისთვის უძლიერესმა ბრაზილიელებმა - ლარისამ და ჟულიანმა.
მეორე ნახევარფინალში პეკინის ოქროსმედალოსნებმა და მსოფლიოს სამგზის ჩემპიონებმა, ამერიკელებმა კერი უოლშმა და მისტი მეი-ტრენორმა ურთიერთობა გაარკვიეს ბოლო ოლიმპიადის ბრინჯაოს პრიზიორებთან ჩენ სიუსთან და სი ჟანთან. მართალია, ჩინელებმა ბოლო დროს ძალიან მოუმატეს, მაგრამ თუნდაც არაოპტიმალურ ფორმაში მყოფ სუპერამერიკელებს მაინც ვერ გაუმკლავდნენ.
ყოველდღიური სპორტული გაზეთი "ლელო"
