არაერთი ვეტერანი ჟურნალისტი, ჩემსავით, პირველად ესწრება მსოფლიოს ჩემპიონატს ხელბურთში, ეს კი თვით ორგანიზატორების დამსახურებაა, მიწვევა მათი სურვილით მოხდა. გინდა-არ გინდა, მრავლისმომსწრე-მნახველი კოლეგები აქ ერთმანეთს უზიარებენ სახელბურთო სამყაროს ისტორიის ყველაზე მნიშვნელოვან ამბებს, თუმცა მათ უმეტესობას ხელბურთზე საერთოდ არაფერი დაუწერია ცხოვრებაში.
მიუხედავად ამისა, ლეგენდებს, სპორტის რომელი სახეობის წარმომადგენელიც გინდა იყოს, ყველა მაინც იცნობს მეტ-ნაკლებად. წარმოიდგინეთ, რაოდენ სასიამოვნო და საამაყო იყო ჩემთვის, როცა ასეთ ლეგენდებს შორის განსაკუთრებულად მოიხსენიეს ჯემალ ცერცვაძე.
ცხადია, ჩემგან მიიღეს უფრო მეტი ინფორმაცია ჩვენს ვეტერან ხელბურთელზე და ისიც შევატყვე, რომ
განსაკუთრებით სასიამოვნო მათთვის იმის შეტყობა იყო, რომ ჯერ კიდევ 1980 წელს თბილისში გაიხსნა ჯემალ ცერცვაძის სახელობის ოლიმპიური რეზერვის ხელბურთის სპეციალიზებული სპორტული სკოლა, რომელიც პირველი იყო საბჭოთა კავშირში.
ამ სასწავლებლისთვის ახალი, იმ დროისთვის გამორჩეულად თანამედროვე კომპლექსიც საგანგებოდ აიგო, ახლა კი ამ კომპლექსში უკვე მისივე სახელობის ხელბურთის აკადემია ფუნქციონირებს და ამზადებს მომავალ ოსტატებს. იქვე ტარდება 16 წლამდე ბიჭებსა და გოგონებს შორის ჯემალ
ცერცვაძის სახელობის თბილისის საერთაშორისო ტურნირი.
მასმედიის ძველი თაობის წარმომადგენლებიდან ბევრი პირადად იცნობდა ომგამოვლილ პოლონელ ცნობილ სპორტულ ჟურნალისტ იან როსკის, რომლის სიტყვები არასდროს დამავიწყდება, ამ 28 წლის წინ რომ მითხრა, რომში მძლეოსნობაში მსოფლიოს ჩემპიონატზე და ახლა მისი ნათქვამი, რაკი სიტუაციამ მოითხოვა, ლაპარაკში კოლეგებსაც გავუზიარე.
მაშინ იანმა ჯემალზე თქვა: "თქვენ გყავთ ხელბურთის უნიკალური დიდოსტატი. მის სახელს და ავტორიტეტს თუ უნარიანად გამოიყენებთ, მსოფლიოში საქართველო გახდება სახელბურთო ქვეყანა. ეს შანსი არ უნდა გაუშვათ ხელიდან და იმავე შედეგს მიიღებთ, რაც პელემ გააკეთა ბრაზილიური ფეხბურთის წინსვლისთვის".
თავის დროზე, სამწუხაროდ, ეს რჩევა, რაც ცხადია, ჩვენი სურვილიც იყო, სურვილად დარჩა. არადა, მაშინ ხელს არაფერი გვიშლიდა, იმედიანად გვევლო მიზნის მიღწევის გზაზე. მერე, გასული საუკუნის ბოლო ათწლეულიდან, ჟამი დადგა ისეთი, ნაღდი პატრიოტული საქმეებისთვის ვიღას ეცალა.
დღეს სხვა ვითარებაა. ვინძლო, აღსრულდეს და საქმედ იქცეს პოლონელი კეთილისმსურველი მეგობრისა და კოლეგის მიერ ჯერ კიდევ როდის ჩვენ მაგივრადაც გულით ნათქვამი.
რაკი აქ, დოჰაში, ასე დაინტერესდნენ კოლეგები, მათ ვუთხარი ისიც, რომ ჯემალ ცერცვაძეს შარშან დაბადების 75 წელი შეუსრულდა და ჩვენი ქვეყნის უმაღლესი სპორტული ჯილდოთი - "სპორტის რაინდის" წოდების მინიჭებით აღნიშნა საქართველოს სპორტის სამინისტრომ მისი დამსახურება.
იქვე ჩემი კომპიუტერი ჩავრთე და კოლეგებს ჯემალ ცერცვაძის ფოტოები ვაჩვენე. ძალიან გაეხარდათ. ეს ორი სურათი კი, რომელსაც აქვე გთავაზობთ, ყველამ გადაიწერა...
ჩემპიონატი დოჰაში თანდათან იძაბება. "ლუსაილ არენაზე", როგორც იქნა, ადგილობრივი მაყურებელი გამოჩნდა. ყატარმა 31:29 მოუგო სლოვენიას.
მს. ჩემპიონატი
ესპანეთი-ჩილე 37:16
ბელორუსი-ბრაზილია 29:34
სლოვენია-ყატარი 29:31
ხორვატია-ირანი 41:22
ბოსნია-მაკედონია 22:25
ავსტრია-ტუნისი 25:25
ყოველდღიური სპორტული გაზეთი "ლელო"
