საწყლოსნო კომპლექს "ოლიმპიკში" 7 აპრილს დამთავრდა წყალბურთელ ვაჟთა 2014 წლის ევროპის ჩემპიონატის შესარჩევი ტურნირი A ჯგუფში. პირველობისთვის მასპინძლებთან ერთად დიდი ბრიტანეთის, სლოვაკეთის, ჩეხეთისა და პოლონეთის წარმომადგენლებიც იბრძოდნენ.
"ჯვაროსანთა" სასახელოდ უნდა ითქვას, რომ მათ სამი შეხვედრა მოიგეს, ერთი ფრედ დაამთავრეს და 10 ქულით პირველი ადგილი დაიკავეს.
ახლა კი განვლილ უქმეებზე გამართული პაექრობების შესახებ:
2014 წლის ევროპის ჩემპიონატის შესარჩევი ტურნირი.
თბილისი. "ოლიმპიკი", 6-7 აპრილი.
საქართველო-პოლონეთი 16:10
4:3, 3:0, 7:4, 2:3
საქართველო: ჭუმბურიძე, ქენქაძე (1), ჩიქვინიძე, რუსიშვილი, ლაითაძე (1), ხვედელიანი, ბაღათურია (3), რურუა
პოლონეთი: რაძინსკი (1), ბედნარეკი, კოვალევსკი (1), პიატეკი, სზუმანსკი, მიჩალსკი (1), მიხალ ბარი (3), ლავნიჩაკი (1), მარცინ ბარი, ლუსჩაკი (3), ლეზჩეკი, სზაბლოვსკი. მთავარი მწვრთნელი ქუჯავა.
სამი ტურის შემდეგ პოლონეთის ნაკრები აშკარად გამოკვეთილი აუტსაიდერი იყო. ამიტომაც მასპინძლებმა უგულოდ დაიწყეს თამაში - მაინც დავამარცხებთო. ამგვარ განწყობას მე-2 წუთზე სტუმართა გოლი მოჰყვა - ანგარიში რაძინსკიმ გახსნა.
მართალია, წუთნახევარში გეგელაშვილმა წონასწორობა აღადგინა, მაგრამ პოლონელებმა ამის შემდეგ ზედიზედ ორი ბურთი გაიტანეს ჭუმბურიძის კარში და 3:1 დაწინაურდნენ.
ქართველმა წყალბურთელებმა მატჩში გარდატეხა პირველი პერიოდის ბოლო სამ წუთში შეიტანეს - მეტოქეს სამი გოლით უპასუხეს და წინაც გავიდნენ - 4:3.
მომდევნო ორი რვაწუთიანი მონაკვეთის განმავლობაში ისელიძის შეგირდები დომინირებდნენ აუზში და ანგარიშიც, ცხადია, ჩვენების სასარგებლოდ გაიზარდა - 14:7. მეოთხე პერიოდში სტუმრებმა უკეთ ითამაშეს და პერიოდიც 3:2 მოიგეს.
საქართველოს ნაკრებმა საბოლოოდ 16:10 გაიმარჯვა და ქულებით სლოვაკეთს გაუთანაბრდა. იმავე დღეს ბრიტანელებმა ჩეხები დაჯაბნეს.
დიდი ბრიტანეთი-ჩეხეთი 17:4
5:0, 2:2, 5:0, 5:2
დიდი ბრიტანეთი: სკოტი, ჯეიმსი (2), კარვენი (1), კინგი (2), ფიგესი (1), უაელერი (3), არმსტრონგი, ვინსენტი, პარკერი (4), ჩოლეფილდი (3), რიდერი, ორეგანი (1), ჰოლანდი. მთავარი მწვრთნელი დანსბი.
ჩეხეთი: სრაჯერი, კოპენეკი, ი. ვოლაკი, ა. ვოლაკი, ვოლოშჩუკი, ჰოლესი (1), სნასილი, მრაჩეკი, ნეჟღუბა, იანეჩეკი, რეჟეკი (3), ზიგმუნდი, შუსტრი. მთავარი მწვრთნელი ფამერა.
დიდი ბრიტანეთი-სლოვაკეთი 5:5
2:0, 1:1, 1:3, 1:1
დიდი ბრიტანეთი: სკოტი, ჯეიმსი (1), კარვენი (1), კინგი, ფიგესი, უაელერი (2), არმსტრონგი, ვინსენტი, პარკერი (1), ჩოლეფილდი, რიდერი, ორეგანი, ჰოლანდი. მთავარი მწვრთნელი დანსბი.
სლოვაკეთი: გოგოლა, ფამერა (1), იანიჩეკი (2), ნედბალი, დურიკი (1), ნაგი, მოლნარი (1), მრავიკი, გრუტკა, პოლოვიჩი, ტკაჩი, გიურესი, კოჩმერი. მთავარი მწვრთნელი სიროტნი.
საქართველო-ჩეხეთი 16:5
6:1, 5:1, 1:1, 4:2
საქართველო: ჭუმბურიძე, ქენქაძე (3), ჩიქვინიძე, რუსიშვილი (1), ლაითაძე (2), ხვედელიანი, ბაღათურია (3), რურუა (2), გეგელაშვილი (1), ყაზახიშვილი (1), ცრეპულია (3). მთავარი მწვრთნელი ისელიძე, მწვრთნელი პოპოვიჩი.
ჩეხეთი: სრაჯერი, კოპენეკი (1), ი. ვოლაკი, ა. ვოლაკი, ვოლოშჩუკი (1), ჰოლესი, სნასილი (1), მრაჩეკი, ნეჟლუბა (1), იანეჩეკი, რეჟეკი, ზიგმუნდი (1), შუსტრი. მთავარი მწვრთნელი ფამერა.
საქართველოს ნაკრებმა ბოლო ორი შეხვედრა ორი წამყვანი მოთამაშის გარეშე ჩაატარა: მარკო ელეზის და მარკო ელაჩას ევროტურნირებზე მშობლიური კლუბების ღირსება აქვთ დასაცავი, ამიტომ, შეთანხმებისამებრ, სლოვაკეთთან მატჩის შემდეგ შუაგულ ევროპას მიაშურეს.
ამის მიუხედავად, მასპინძლებს არც პოლონეთთან და არც ჩეხებთან მატჩებში პრობლემები არ შექმნიათ.
ფინიშზე ჩვენმა ბიჭებმა, რომლებსაც ბოლო პაექრობაში ნებისმიერი ანგარიშით მოგება ხელს აძლევდათ, აღმავლობით ითამაშეს, თერთმეტი ბურთის სხვაობით აჯობეს ჩეხებს და პირველი ადგილი გაინაღდეს.
გათამაშების საბოლოო ცხრილი
ა გ თ მ ფ წ ბ ქ
საქართველო 4 3 1 0 51:25 10
სლოვაკეთი 4 2 2 0 35:16 8
ბრიტანეთი 4 2 1 1 36:24 7
პოლონეთი 4 1 0 3 22:43 3
ჩეხეთი 4 0 0 4 17:53 0
ვლადიმერ ისელიძე: "ტურნირის შედეგებით კმაყოფილი ვარ. სერბეთსა და თურქეთში ჩატარებულმა საწვრთნელმა შეკრებებმა და იქაურ საკლუბო გუნდებთან გამართულმა სპარინგმატჩებმა შედეგი გამოიღო.
ჩვენს ნაკრებს მეტი პოტენციალი აქვს და ივლისში მეორე ტურისთვის ეს უფრო ნათლად გამოიკვეთება.
ახლა მთავარია, არ მოვდუნდეთ და მიზანმიმართულად განვაგრძოთ ვარჯიში. იმ დროისთვის ნატურალიზებულ წყალბურთელებსაც მეტი დრო ექნებათ. საკუთარი ძალების შესამოწმებლად ივნისში თბილისის საერთაშორისო ტურნირზე ვიასპარეზებთ".
ლევან ყიფიანი, სპორტისა და ახალგაზრდობის საქმეთა მინისტრი: "სასიამოვნოა, რომ ქართველმა წყალბურთელებმა ევროპის ჩემპიონატის შესარჩევი ტურნირის თბილისის ტური მოიგეს.
შემთხვევით შეიძლება ერთ მატჩში მიაღწიო წარმატებას, მაგრამ ტურნირში გაიმარჯვო, ამას დიდი ძალისხმევა სჭირდება, თანაც იმ გუნდებთან, რომლებსაც პრობლემები არ აწუხებთ.
მადლობელი ვარ ჩვენი ბიჭების, რომლებმაც ჭაბუკობისას მრავალ გასაჭირს გაუძლეს და ქართული წყალბურთი შეგვინარჩუნეს.
არადა, ის პერიოდიც მახსოვს, საქართველოს ნაკრებს ტიტულოვანი გუნდებიც იოლად რომ დაუმარცხებია. წყალბურთი ქართული გენის ნაწილია. მისი განვითარება კი შეუძლებელია, ცურვას თუ არ მივხედეთ.
ჯერჯერობით ნიჭის, ქართული გენის წყალობით გავდივართ ფონს, არადა, ეს ყველაფერი სისტემაში უნდა ჩაჯდეს და კანონზომიერებად იქცეს. საამისოდ კი ინფრასტრუქტურის განვითარება და მასობრიობაა საჭირო.
ჩვენთან კი, სამწუხაროდ, მუნიციპალური აუზები არ არსებობს, ყველაფერი კერძოა, ამიტომაც ყველასთვის არ არის ხელმისაწვდომი, რაც მსჯელობის საგნად უნდა იქცეს.
აგერ, გასულ უქმეებზე ახალგაზრდა თბილისელმა მოცურავე თემურ კობახიძემ ჰოლანდიაში ორი პირველი ადგილი დაიკავა.
ყოველივე ეს კი იმის მაჩვენებელია, რომ ჩვენთან საწყლოსნო სახეობებს პერსპექტივა აქვს და ამ სახეობების ეროვნულ ფედერაციას შესაძლებლობის ფარგლებში მაქსიმალურად დავეხმარებით".
ყოველდღიური სპორტული გაზეთი "ლელო"
ასევე იხილეთ:
საქართველო-სლოვაკეთი 7:7 - ზავი პირველობის პერსპექტივით
საქართველო-დიდი ბრიტანეთი 12:3 - ევროპისაკენ წარმატებული სტარტით
