მარტინა ჰინგისი და სხვები: დიდების დარბაზში მატებაა

ტრადიციულად, ნიუპორტის ტურნირის მსვლელობის დროს, ამერიკის ამ ქალაქში მდებარე ჩოგბურთის დიდების დარბაზში ახალი წევრები შეიყვანეს.

ამჯერად, დიდების დარბაზის ექსპერტებმა ოთხი ცნობილი ჩოგბურთელი დააფასეს - კლიფ დრისდეილი, ჩარლი პასარელი, იონ ცირიაკი და მარტინა ჰინგისი.

72 წლის დრისდეილი ერთეულებსა და წყვილებში წარმატებული მოთამაშე იყო. 1972 წელს, მან დუეტებს შორის მოიგო აშშ-ის ღია პირველობა, რეიტინგში კი ერთხელ მეოთხე პოზიცია ეკავა. ის გახლავთ ATP World Tour-ის დამაარსებელი და პირველი პრეზიდენტი , აგრეთვე მუშაობდა ESPN-ის კომენტატორად.

ჩარლი პასარელი 1967 წელს აშშ-ის საუკეთესო მოთამაშედ მიიჩნეოდა და ერთი წლის შემდეგ, ამერიკის ნაკრებს დევისის თასის მოგებაში დაეხმარა. 1969 წელს, არტურ ეშთან და შერიდან სნაიდერთან ერთად დააარსა იუნიორთა ეროვნული საჩოგბურთო ლიგა, რომელშიც ქვეყნის საუკეთესო ახალგაზრდა ჩოგბურთელები თამაშობდნენ.

74 წლის ცირიაკი 15 წელი თამაშობდა დევისის თასზე რუმინეთის ნაკრებში. მას 1970 წელს ილიე ნასტასესთან ერთად მოგებული აქვს როლან გაროსი წყვილთა თანრიგში. ცირიაკი ისეთი ცნობილი ჩოგბურთელების მენეჯერი იყო, როგორებიც არიან გილერმო ვილასი, გორან ივანიშევიჩი, ბორის ბეკერი... გარდა ამისა, რუმინელი რომის მასტერსის დირექტორი იყო და ახლა, ანალოგიური პოსტი უკავია მადრიდის მასტერსზე.

რა თქმა უნდა, ამ ოთხეულში ყველაზე წარმატებული იყო შვეიცარიელი მარტინ ჰინგისი, რომელსაც ერთეულებში, წყვილებსა და მიქსტში მოგებული აქვს "დიდი სლემის" 15 ტიტული. ის მსოფლიოს პირველი ჩოგანი იყო WTA-ის ერთეულებისა და წყვილების რეიტინგში.

ჩოგბურთის საერთაშორისო დიდების დარბაზი 1955 წელს დაარსდა და მას შემდეგ, იქ 11 ქვეყნის 234 წარმომადგენელი შეიყვანეს.

* * *
სანამ ჰინგისი ნიუპორტში იმყოფებოდა, მის ყოფილმა მეუღლემ ტიბოლტ ჰუტინმა სკანდალური განცხადება გააკეთა: მისი თქმით, შვეიცარიელი ჩოგბურთელი ხშირად ღალატობდა ქმარს. მარტინამ და ტიბოლტმა 2010 წლის დეკემბერში იქორწინეს და 2013 წელს გაეყარნენ.

"ქორწილიდან ერთი თვის თავზე ნიუ იორკში ჩავედი მარტინასთვის სიუპრიზის გასაკეთებლად, მაგრამ ის ნომერში უცხო მამაკაცთან ერთად დამხვდა. გარკვეული დროის შემდეგ, მან ისევ მიღალატა. ვფიქრობ, მას უბრალოდ არ შეუძლია ნებისმიერი მამაკაცის ერთგული იყოს", - მოჰყავს ფრანგულ პრესას ჰუტინის სიტყვები.

ამჟამად, მარტინა ჰინგისი ხვდება ესპანეთის სპორტის სამინისტროს ერთ-ერთ ხელმძღვანელს დავიდ ტოასა-როსს.

მარია შარაპოვას ჯიმი კონორსი გაწვრთნის
რუსული ჩოგბურთის ლიდერის მარია შარაპოვას ახალი მწვრთნელი იქნება ლეგენდარული ამერიკელი ჯიმი კონორსი. ეს ინფორმაცია მარიას ოფიციალურ ვებგვერდზე გავრცელდა.

"მოხარული ვარ გაცნობოთ, რომ ჩემი ახალი მწვრთნელი გახდა ჯიმი კონორსი, - განაცხადა შარაპოვამ. - მას მრავალი წელია ვიცნობ. ჩვენ მცირე ხანი ვიმუშავეთ ერთად 2008 წელს, ავსტრალიის ღია პირველობის წინ. დაინტრიგებული ვარ მომავალი თანამშრომლობით და სიამოვნებით ველოდები უახლოეს ტურნირებს".

შეგახსენებთ, შარაპოვამ სამი დღის წინ გამოაცხადა იმის შესახებ, რომ ასრულებს ურთიერთობას თავის მწვრთნელთან ტომას ჰოგსტედტთან, რადგან ამ უკანასკნელს, პირადი პრობლემების გამო არ შეუძლია მუდმივად ჩოგბურთელის გვერდით ყოფნა.

ჯიმი კონორსი ყველა დროის ერთ-ერთი წარმატებული პროფესიონალი ჩოგბურთელია. მან კარიერაში ATP-ის 109 ტიტული მოიგო, რაც ყველა დროის რეკორდი გახლავა. მის ანგარიშზეა "დიდი სლემის" რვა ტიტული. რაც შეეხება კონორსის სამწვრთნელო კარიერას, ის დიდი ხანი ამერიკელი ენდი როდიკის დამრიგებელი იყო.

მოგვიანებით, ამ სიახლესთან დაკავშირებით ამერიკელის კომენტარიც გავრცელდა: "მოუთმენლად ველოდები "დიდი სლემის" ტურნირების ოთხგზის ჩემპიონთან თანამშრომლობის დაწყებას. ჩემი მიზანია მივაღწიო იმას, რომ მარია შარაპოვამ უფრო მეტი ტურნირი მოიგოს. წინ ძალიან მძიმე, მაგრამ საინტერესო სამუშაო გველოდება".

ყოველდღიური სპორტული გაზეთი "ლელო"

ასევე იხილეთ:
გაიცანით, მწვრთნელი მარტინა ჰინგისი