სერენა უილიამსმა "დიდი მუზარადი" 22-ედ მოირგო

სერენა უილიამსის ტრიუმფით დასრულდა "დიდი სლემის" მორიგი გათამაშება უიმბლდონის კორტზე ქალთა შორის. ფინალში სერენამ გერმანელი ანჟელიკ კერბერი ორ სეტში, დაძაბულ ბრძოლაში დაამარცხა.

თავიდან გერმანელი კარგად გამოიყურბოდა საკუთარი ჩაწოდებებისას, უილიამსს გვარიანად არბენინებდა კიდეც, მაგრამ ყველამ კარგად ვიცით, რომ "პანტერა" დაუღალავია. ჰოდა, ვიხილეთ უამრავი ეფექტური გათამაშება. გადამწყვეტი მაინც ჩაწოდებები აღმოჩნდა, სწორედ ამ კომპონენტმა გადაწყვიტა გამარჯვებულის ბედი - სერენა შეუდარებელი იყო საკუთარი ჩაწოდებებისას და დამსახურებულად აღმართა "დიდი სლემის" გამარჯვებულისთვის განკუთვნილი სინი 22-ედ.

ამ მაჩვენებლით იგი გერმანელ შტეფი გრაფს დაეწია, პირველობას კი არავის უთმობს ლეგენდარული მარგარეტ კორტი, რომელსაც 34 "მუზარადი" აქვს. ანჟელიკ კერბერმა თანამემამულე გრაფი უილიამსის შეტევისგან ერთხელ უკვე დაიცვა - ავსტრალიის ღია პირველობაზე ფინალში სწორედ სერენა დაამარცხა, თუმცა ამჯერად ეს ვეღარ მოახერხა. საინტერესოა ისიც, რომ ბოლო 10 წლის განმავლობაში ერთ სეზონში ფინალში ერთი და იგივე სპორტსმენი პირველად ვიხილეთ. სერენა უილიამსი შტეფი გრაფის კიდევ ერთ რეკორდს ემუქრება: გრაფი, თავის დროზე 186 კვირის განმავლობაში იყო რეიტინგის მიხედვით მსოფლიოს ნომერ პირველი ჩოგანი. სერენა 177-ე კვირაა, პირველობას არავის უთმობს. საკმარისია, მან ამერიკის ღია პირველობის ბოლომდე პირველ პოზიციაზე გაძლოს და გრაფის რეკორდსაც დაამხობს.

კერბერის ძლევის შემდეგ სერენამ ასეთი კომენტარი გააკეთა:

- ძალიან მიყვარს ანჟელიკთან თამაში. იგი შესანიშნავი ჩოგბურთელია. იგი დადებითი პიროვნებაა, მუდმივად იღიმის. დიდი მადლობა ანჟელიკ. ზედიზედ ორი ფინალი მქონდა წაგებული და უიმბლდონზე წარმატების მიღწევა ჩემთვის ორმაგად ფასეული და სასიამოვნო იყო. გამოგიტყდებით, უიმბლდონის ცენტრალური კორტი, ფაქტობრივად, ჩემი სახლია.

ქალები
ფინალი
ს. უილიამსი (აშშ)-კერბერი 7:5, 6:3

ყოველდღიური სპორტული გაზეთი "ლელო"