ქართველი ჩოგბურთელი ქალები მიმდინარე კვირას სამ საერთაშორისო ტურნირში მონაწილეობენ. 25 ოქტომბერს ანტალიის (საპრიზო ფონდი 10.000 დოლარი) კორტებზე ორჯერ გავიდა თბილისელი სოფიო ქვაცაბაია და ორჯერვე თავაწეულმა დატოვა სარბიელი.
ერთეულებში ჩვენებური შეჯიბრების რეიტინგფავორიტია. გუშინ მან იოლად დაჯაბნა შვეიცარიელი ანდრინა პეერი - 6:3, 6:3 და მერვედფინალში დენის-ანტონელა სტოიცას (რუმინეთი) და ანასტასია პოპლავსკას (უკრაინა) შორის უძლიერესს შეხვდება.
წყვილებში ქვაცაბაია ბულგარელ დია ევტიმოვასთან ერთად მეორე ნომრადაა განთესილი. ქართულ-ბულგარულმა დუეტმა ძალების დაუძაბავად აჯობა იულია გრობლევსკისა (გერმანია) და კატერინა რომანიუტას (რუსეთი)
ანტალიის წინა ტურნირის ფინალისტებს - ქვაცაბაიას და ევტიმოვას მეოთხედფინალში მეტოქეობას გაუწევენ ალონა ფომინა (უკრაინა) და სელენ ტაკუნიაჩი (თურქეთი), რომლებმაც ელიზაბეტ დანაილოვა (ბულგარეთი) და ანასტასია პოპლავსკა (უკრაინა) ჩამოიშორეს გზიდან - 6:1, 6:3.
სოფიო შაფათავა ჩინურ ლიუჟოუს 50.000-იან ტურნირში თამაშობს. გუშინ წყვილთა სტარტზე იგი რუს ანგელინა გაბუევასთან ერთად მასპინძლებთან - ძიუ სანსა და ჟანლან ვეისთან დამარცხდა - 5:7, 2:6. ქართველ ჩოგბურთელს დღეს ერთეულებში ეძლევა რევანშის შანსი - პირველ წრეში კვალიფიკაციიდან აღზევებულ ჟანლან ვეის დაუპირისპირდება.
დიდ ბრიტანეთში 10.000-იან ტურნირში იასპარეზებს მარიამ ბოლქვაძე. მას განთესვით მე-4 ნომერი აქვს და დღეს მასპინძელ მანიშა ფოსტერს გამოცდის.
(იბეჭდება მცირე ცვლილებით)
ყოველდღიური სპორტული გაზეთი "ლელო"
