წლეულს, 11-დან 18 აპრილის ჩათვლით, თბილისის სპორტის სასახლე ძალოსანთა ევროპის ჩემპიონატს უმასპინძლებს. ამ შეჯიბრების მაღალ დონეზე ორგანიზებისთვის ძალ-ღონეს არ იშურებს საქართველოს ძალოსნობის ფედერაცია, სამგზის ოლიმპიურ ჩემპიონ კახი კახიაშვილის ხელმძღვანელობით.
სწორედ მისი დიდი მცდელობით შეიძინა საქართველომ ამ ტურნირისთვის მსოფლიოში აღიარებული კომპანიის - "ელეიკოს" სოლიდური რაოდენობის ინვენტარი, რომელიც ჩვენმა ჭაბუკმა ძალოსნებმა სპორტის სასახლეში გამოსცადეს.
შეგახსენებთ, რომ მოზარდები სამი დღის განმავლობაში 15-წლამდელთა საქართველოს პირველობაზე ახალშეძენილ ოლიმპიურ ფიცარნაგზე ახალი შტანგებით ეცილებოდნენ ერთმანეთს პირველობაში.
- დღევანდელი მონაცემებით, ევროპის ჩემპიონატზე საასპარეზოდ 40 ქვეყნის 300-მდე სპორტსმენი აპირებს
საგულისხმოა ისიც, რომ საქართველოში აკრედიტებულ ევროპის ქვეყნების საელჩო-საკონსულოებს უკვე გავუგზავნეთ ჩემპიონატზე დასასწრები მოსაწვევი ბარათები, რომ მათ თავიანთი ქვეყნების წარმომადგენლებს უქომაგონ.
- ახალ ინვენტარზე რას იტყვით?
- დიდი ხანია, საქართველოს ძალოსნობის ინვენტარი არ შეუძენია. სპორტის სამინისტროს დახმარებით, ევროპის ჩემპიონატისთვის ვიყიდეთ "ელეიკოს" 85 შტანგა თავისი დისკებით, მათ შორის - 50 ცალი ვაჟებისთვის. მათგან 15 საშეჯიბროა, დანარჩენი - სავარჯიშო. 35 გრიფი ქალებისთვისაა განკუთვნილი. მართალია, ჩემპიონატის შემდეგ მანდილოსნებისთვის ამდენი გრიფი არ დაგვჭირდება, მაგრამ ისინი შედარებით მსუბუქებია და მოზარდებს გამოადგებათ საწვრთნელად.
შტანგებსა და სხვა ატრიბუტებთან ერთად, შევიძინეთ ორი ოლიმპიური საშეჯიბრო და 40 სავარჯიშო ფიცარნაგი. ერთი სიტყვით, საკმაოდ დიდი რაოდენობის ინვენტარი მივიღეთ, რომლებითაც არა მარტო რეგიონებში ძალოსნობის დარბაზებს დავაკომპლექტებთ, არამედ საქართველოში ნებისმიერი რანგის შეჯიბრების ჩატარება შეგვეძლება.
- დიდი ასპარეზობების წინ ტესტირებისთვის, ჩვეულებრივ, მნიშვნელოვან ტურნირებს ატარებენ. ჩვენ?
- სპორტის სასახლეში ჭაბუკთა საქართველოს პირველობა სწორედ ტესტირებას ემსახურებოდა - "ელეიკოს" ახალი ინვენტარი: ოლიმპიური და სავარჯიშო ფიცარნაგები, ოლიმპიური შტანგები ჩვენმა 15-წლამდელებმა გამოსცადეს.
უპირველესად, ის გვაინტერესებდა, სპორტის სასახლის იატაკს - კალათბურთის ხის საფარს ზიანს ხომ არ მივაყენებდით. ამასთანავე, განათების, აკუსტიკისა და ვიბრაციის შემოწმებაც გვინდოდა. მინდა გითხრათ, რომ გამოცდამ წარმატებით ჩაიარა. თუმცა საქართველოს პირველობამ ის ხარვეზებიც გამოავლინა, რომელთა აღმოფხვრაც ევროპის ჩემპიონატამდე აუცილებელია.
ცხადია, სარბიელის შესამოწმებლად მხოლოდ მოზარდთა საქართველოს პირველობით ვერ შემოვიფარგლებით. მთავარი ტესტი 10 აპრილს გვექნება, ზედ შეჯიბრების წინ. საქართველოს საუკეთესო ძალოსნების მონაწილეობით საცდელ ასპარეზობას ჩავატარებთ.
შესაძლოა, უცხოელი სპორტსმენებიც მოვიწვიოთ. იმ დღეს ინვენტართან ერთად შემოწმდება ყველა აპარატურა, რომელსაც ევროპის ძალოსნობის ფედერაცია თავად ჩამოიტანს.
- იქნებ ჩვენი ათლეტების სამზადისზეც გვითხრათ?
- ქართველი ძალოსნები ოლიმპიური ჩემპიონის - გიორგი ასანიძის ხელმძღვანელობით, ამჟამად წყალტუბოში გადიან საწვრთნელ შეკრებას. აპრილის დასაწყისიდან დუშეთში განაგრძობენ ვარჯიშს.
ჩემპიონატში ჩაებმება დავით გოგია, რომელსაც დისკვალიფიკაციის ვადა დაუმთავრდა, საკმაოდ კარგ ფორმაშია. საერთოდაც, სოლიდური გუნდი შეიკრიბა. გაუთვალისწინებელი რამ თუ არ მოხდა, ორი-სამი მედლისთვის ბრძოლა შეგვიძლია.
ერთი სიახლეც გვაქვს - ქართული ძალოსნობის ისტორიაში პირველად, ევროპის ჩემპიონატზე ჩვენი ქვეყნის სპორტულ ღირსებას დაიცავენ გოგონები - თათია ლორთქიფანიძე (63 კგ) და სოფიო ლუკატარიძე (69). ეს დებიუტია და მათ მიმართ ძალიან მომთხოვნები ვერ ვიქნებით.
- ჩემპიონატისთვის მზადებისას პრობლემებს ხომ არ შეუშლია ხელი?
- ლარის კურსის ვარდნამ სერიოზული პრობლემების წინაშე დაგვაყენა. მართალია, საორგანიზაციო თანხებში მომჭირნეობას ვიჩენთ, მაგრამ ეს საქმეს ვერ შველის, რადგან ის ბიუჯეტი, რომელიც მოვითხოვეთ, სამწუხაროდ, ბოლომდე არ არის დამტკიცებული.
შეჯიბრებას, ცხადია, ნებისმიერ შემთხვევაში ჩავატარებთ, მაგრამ არ გვინდა, ისე გამოგვივიდეს, რომ ჩემპიონატის თბილისში გამართვა ევროპის ძალოსნობის ფედერაციას სანანებელი გაუხდეს, სტუმრები უკმაყოფილონი გავუშვათ.
ჯერაც არ არის გადაწყვეტილი სპორტის სასახლის იჯარის თანხის საკითხი. ჩემპიონატზე 50 სტუმარი გვეწვევა. ხელშეკრულების თანახმად, მსაჯების, ევროპის ფედერაციის პრეზიდენტის, დოპინგ-კონტროლის მომსახურე პერსონალის ხარჯები ასპარეზობის ორგანიზატორმა უნდა გაიღოს.
არც ამ თანხის საკითხია ბოლომდე გარკვეული. სპორტისა და ახალგაზრდობის საქმეთა სამინისტროს უკვე მივმართეთ თხოვნით, რომ დროულად დაგვეხმაროს და შეფერხებები არ შეიქმნას. ამ მნიშვნელოვანი შეჯიბრების საორგანიზაციოდ დიდი შრომაა გაწეული და ყველაფერი უნდა ვიღონოთ, რომ ზოგიერთი ხარვეზის გამო ევროპის ჩემპიონატს ჩრდილი არ მიადგეს.
(იბეჭდება მცირე ცვლილებით)
ყოველდღიური სპორტული გაზეთი "ლელო"
