კვლავ ისახელა თავი მოხმალავე მიხეილ მარდალეიშვილმა. ჯგუფში მან სამი შეხვედრა მოიგო და ამდენივე დათმო. მეთექვსმეტედფინალში იოლად სძლია ირანელ ამირ მუხტარს - 15:7, მერე თურქ ნეჰირ ფირატს დააყრევინა ფარ-ხმალი - 15:14, არადა, შეხვედრას ორი ქულით აგებდა. მეოთხედფინალში ახალგაზრდებში აზიის ჩემპიონატის მეორე პრიზიორს, ფარსად ბაჰერს აჯობა 15:8,
მეტს მოელოდნენ სანდრო ბაზაძისგან, მაგრამ მეთექვსმეტედფინალში თურქ ენვერ ილდიმთან შეხვედრისას მსაჯებს აშკარად დაუჯაბნიათ და საბოლოოდ მე-18 ადგილი ხვდა. 22-ე იყო ქუთაისელი იური ნებიერიძე, რომელიც ფლეიოფში უკრაინელ ალექსანდრ კრასოვსკის ვერ გასცდა.
რაც შეეხება დაშნით მოფარიკავეებს, შალვა ბილანიშვილმა და ანზორ ყურაშვილმა მეტოქეებს სათანადო წინააღმდეგობა ვერ გაუწიეს და 30-ე და 31-ე ადგილებზე გავიდნენ. მათგან მეტს არც მოელოდნენ, ნაკრების ძირითადი წევრები გიორგი ქაფიანიძე და ზვიად სისაური სტუდენტები არიან და საკურსო გამოცდების გამო შეჯიბრებაზე გამგზავრება ვერ მოახერხეს.
''ირანული შედეგებით უკმაყოფილო არ ვართ, - გვითხრა დავით სახვაძემ. - ამ შეჯიბრებით წლევანდელი ტურნირები ამოიწურა. ახლა აზერბაიჯანელ მოფარიკავეებთან ერთად ახალი სეზონისთვის ვემზადებით თბილისში. 8-9 იანვარს მოხმალავე თეოდორა კახიანი იტალიაში ახალგაზრდებს შორის მსოფლიოს თასის ეტაპზე იასპარეზებს, მიხეილ მარდალეიშვილი 15-16 იანვარს რეიკიავიკსა და 29-30 იანვარს ლონდონში ევროპის თასის ეტაპებზე გამოვა. ჩვენი ოლიმპიური იმედი ბექა ბაზაძე კი ლონდონის ოლიმპიადის საგზურისთვის ბრძოლაში თებერვლიდან ჩაებმება.''
წლეულს ფარიკაობის მსოფლიო ფედერაციის კონგრესზე, რომელსაც ჩვენი ფედერაციის პრეზიდენტი არჩილ გოგელია და საპატიო პრეზიდენტი იური ოსიპოვი ესწრებოდნენ, გადაწყდა, რომ გაისად 24-25 სექტემბერს თბილისში მოხმალავეთა ევროპის თასი გათამაშდება.
