გასული კვირის ყველაზე მნიშვნელოვანი ორთაბრძოლა მეორე საშუალო წონაში გაიმართა - ლონდონში IBF-ის ჩემპიონი, ბრიტანელი კარლ ფროჩი WBA-ს ტიტულის მფლობელს, დანიელ მიკელ კესლერს ხვდებოდა.სამი წლის წინ ეს მოკრივეები Super Six-ის ტურნირზე შეხვდნენ ერთმანეთს და მაშინ მსაჯებმა უპირატესობა კესლერს მიანიჭეს. ახლა პირიქით მოხდა - სამივე არბიტრმა ფროჩის მხარე დაიჭირა, რაც სავსებით კანონზომიერი იყო.
ფროჩიც და კესლერიც გამოირჩევიან მოკრივეთა საერთო მასისგან - ისინი დადებითი მამაკაცის იმიჯს ფლობენ: ძლიერებიც არიან და ამასთან, არააგრესიულებიც. ერთხელ ფროჩს პრესკონფერენციაზე ზედმეტი მოუვიდა და ჟურნალისტებთან შემდეგ შეხვედრაზე მოიხადა
ბრძოლა ყოველგვარი დაზვერვის გარეშე დაიწყო (მათ ერთმანეთი სამი წლის წინ დაზვერეს). პირველ წუთებში კესლერი უფრო აქტიური ჩანდა, მაგრამ შემდეგ ფროჩმა მარცხენა გვერდითი და მარჯვენა პირდაპირი დარტყმა შეასრულა და ჩაახშო დანიელის აქტიურობა. ამის შემდეგ ბრიტანელი თავისი საფირმო ჯებით მოქმედებდა და ამის დახმარებით, მისთვის კომფორტული დისტანცია დააყენა.
მომდევნო ორ რაუნდშიც დაახლოებით იგივე ხდებოდა: ფროჩი ჯებით მუშაობდა და პერიოდულად დარტყმების სერიებსაც მიმართავდა. კესლერი პასუხობდა, თუმცა ნაკლებად და უხარისხოდ. ასე რომ, ბრძოლის ბედი, ფაქტობრივად, გადაწყვეტილი იყო.
მაგრამ დანიელმა მეოთხე რაუნდში მოიპოვა ინიციატივა და შემდეგ სამწუთეულში მარჯვენა პირდაპირი და მარცხენა გვერდითი დარტყმების კომბინაცია გამოუვიდა. ფროჩის ადგილას შედარებით სუსტი მეტოქე რომ ყოფილიყო, ბრძოლა დასრულებული იქნებოდა, მაგრამ ბრიტანელს წარბიც არ შეუხრია. იგივე კომბინაცია გაიმეორა დანიელმა მეექვსე რაუნდში, თუმცა ფროჩმა მოახერხა უფრო ხშირი და ზუსტი პასუხი.
მეშვიდე რაუნდში შეტევების მორიგი გაცვლა იყო - იმაზე უკეთესი, ვიდრე წინა რაუნდებში, თუმცა ფროჩი კვლავაც უფრო ძლიერი მოჩანდა. განსაკუთრებით გაუჭირდა კესლერს ბრიტანელის სამმაგი დარტყმის შემდეგ, თუმცა ფროჩის უპირატესობა არც ერთ მომენტში არ ყოფილა უდიდესი. იგივე სურათი ვიხილეთ მერვე რაუნდში. სამაგიეროდ, მეცხრეში კესლერმა აშკარად აჯობა მეტოქეს.
მეათე რაუნდში მასპინძელს მეორე სუნთქვა გაეხსნა. მართალია, კესლერმა უფრო აქტიურად დაიწყო, მაგრამ ფროჩმა ორივე ხელით შეტევა შეაგება, შემდეგ კი მარცხენა გვერდითმა დარტყმამ მიაღწია მიზანს, რასაც სერია და ინიციატივის დაბრუნება მოჰყვა.
მე-11 რაუნდში დანიელი ოდნავ უკეთესი იყო, მაგრამ იმ მომენტისთვის ჩანდა, რომ ფროჩი იგებდა შეხვედრას. ბოლო 3-წუთეულში ორმხრივი იერიშები ვნახეთ, წერტილი კი ფროჩმა დასვა კარგი სერიით, თუმცა კესლერმა აქაც გაუძლო.
როცა ბრიტანელი გამარჯვებულად გამოაცხადეს, კესლერი მას ტაშს უკრავდა. WBA-ს წესებით, ფროჩი, რომელიც ახლა ორ ტიტულს ფლობს, ამ ვერსიით სუპერჩემპიონად გამოცხადდება.
ყოველდღიური სპორტული გაზეთი "ლელო"
ასევე იხილეთ:
კრივის სამყაროში მეტოქეები დარიგებულია
